Read Sangir KARARATUANG KARUANE 1 Bible Online

KARARATUANG KARUANE 1 - Sangir bible

KARARATUANG KARUANE 1

¹Salomo ahusu Ratu i Daud seng nakoạ datu matoghasẹ̌ kal᷊aianenge su ral᷊ungu kararatuangu Israel. MAWU Ruatane něngal᷊amatẹ̌ si sie ringangu napakariadin sie ene e makawasa.

²Kal᷊awọu těmbonangu mẹ̌sasekẹ 1.000 su kataune, ringangu mẹ̌sasekẹ pẹ̌tahạ 100 su kataune, kal᷊awọu těmbonangu wanua, ringangu patikụ pẹ̌sěmbal᷊eěng su Israel, nioron Datu i Salomo

³mědeạu sěngkaral᷊eng dingange sarang tampạ u pẹ̌kakal᷊iomanengang su Gibeon. I sire nakoạ sarang paị ene, ual᷊ingu kawe sene kẹ̌kaẹ̌bakeng Tentaʼm MAWU kụ nikoạ i Musa ěllangu MAWU su tempon nạung su wanua l᷊inggi. (

⁴ Arawe Petim Pẹ̌dariandin MAWU e kawe su Yerusalem su ral᷊ungu tenta nạung nisakẹ u Ratu i Daud baugu Peti ene piạ i sie něngal᷊ingu ene wọu Kiryat-Yearim.)

⁵ Pananěmbaěng bọu tambaga laụ u timběha kụ nikoạ i Bezaleel anạ i Uri, pulung i Hur, mal᷊aing kinaěbakeng su Gibeon su těngon Tentam MAWU. Datu i Salomo ringangu kal᷊awọu kawanua e mẹ̌kẹ̌kal᷊iomaneng su MAWU e paị sene.

⁶Su těngon Tenta ene, ratu naněmbang binatang 1.000 su waụ e su wowom pananěmbaěng nikoạ bọu tambaga laụ u timběha nakoạ kere sasěmba tẹ̌tutungang baugu MAWU.

⁷Hěbị ene Ruata e nẹ̌tumpasilom batangengʼE si Salomo kụ něhengetang, ”Salomo, pẹ̌gause apang ilẹ̌ěnningu, ene e sarungbe Takụ ionggọ si kau!”

⁸I Salomo simimbang, ”O Ruata, i Kau e seng nělahẹu i Kau e apạ e makěndagẹ̌ si amangku i Daud, dingangu i Kau seng něhengkẹ u iạ nakoạ datu něngaweng si sie.

⁹ Su orasẹ̌ ini o MAWU Ruata mal᷊umbạko i Kau e, mangitụ diandi-Nu si amangku. I Kau e sen něnduị u iạ niapakakoạ datum bansa masěllahẹ̌ ini ta karekenang kakěpal᷊e.

¹⁰Ual᷊ingu ene mal᷊umbạko si siạ e gělikang u kapelesa ringangu tiněnna kụ hinong paketang mangahạ si sire. Kamagengu tawe kerene, ute kereapa wue iạ měparenta bansa masěllahẹ̌ ene?”

¹¹Sasimbangu Ruata si Salomo, ”Dorongu ene apạ e mapia. I kau tawe mẹ̌dorong kakakalạ, arau arětạ u dunia arau kawawantugẹ̌ arau papateng kal᷊awọu rokạ u pẹ̌seketang arau umurẹ̌ manandụ baugu watangengu hala kaiso kai kapelesa dingangu kasingkạ tadeạu měngahạ bansa-Ku nitilakehẹ̌ si kau.

¹²Ual᷊ingu ene ute kapelesa ringangu kasingkạ tangú sarung ighěllị si kau. Su l᷊ikudu ene, Iạ e sarung mapakakoạ i kau, limembom masukụ, limembong kalạ dingangu limembom timeleng bọu tal᷊oaram patikụ datu sude su tempo nal᷊iu ore lai su tempo ramahi.”

¹³Bọu e i Salomo naněntangken tampạ u pẹ̌kakal᷊iomanengang su Gibeon, suapạewen sene piạ Tentam MAWU, kụ nẹ̌sul᷊ẹ e sol᷊ong Yerusalem. Bọu tampạ ene i sie něndal᷊engu parentane su Israel.

¹⁴ I sie něnukụ buntuangu mẹ̌sasekẹ dingangu karetam pẹ̌seketang 1.400 su waụ e ringangu kawal᷊o pẹ̌seketang mapul᷊o dua su hiwune. Sěnggạ nipěllọ e su Yerusalem, arawe lěmbene ute pinẹ̌papahiạ su apan soa wal᷊inẹ.

¹⁵ Su tempom pẹ̌paparentan Salomo, bul᷊aeng dingangu sal᷊aka e nakoạ kere apal᷊iwụ biasa su Yerusalem, mẹ̌sul᷊ungu kere watu; ringangu kalun cěmaran Libanon mal᷊awọ-l᷊awọ, kere kalung ara.

¹⁶ Bọu apang mẹ̌bawalantẹ kụ měnẹ̌nongka ratu e, kawal᷊o kai rẹ̌dingotang bọu Misirẹ̌ dingangu Kewe,

¹⁷bọu e manga karetan sekẹ e rẹ̌dingotang bọu Misirẹ̌, bọu ene saụ dingotang kapia su manga ratung Het dingangu manga ratun Siria arẹ̌gane roitẹ̌ sal᷊aka 150 su kal᷊ẹ̌pane waugu kawal᷊o sěmbaụ dingangu 600 su kal᷊ẹ̌pane waugu karetan sekẹ sěmbaụ.