Read Sangir KARARATUANG KARUANE 10 Bible Online

KARARATUANG KARUANE 10 - Sangir bible

KARARATUANG KARUANE 10

¹I Rehabeam nakoạ e sol᷊ong Sikem, batụu patikụ kawanuang Israelẹ̌ su sěmběkan sawěnahẹ̌ e seng němpẹ̌komol᷊ẹ̌ paị sene u kai měhengkẹ i sie makoạ datu.

²Su tempon ene i Yerobeam anạ i Nebat bědang ene su Misirẹ̌, tụtal᷊ang u Ratu i Salomo. Su tempong i sie nakaringihẹ̌ mạanụeng Rehabeam, i sie nẹ̌sul᷊e sol᷊ong Israelẹ̌.

³Kawanua su sěmběkan sawěnahẹ̌ něnotẹ̌ i Yerobeam, mase i sire sěngkatamai nẹ̌těngon Rehabeam. I sire nẹ̌bera,

⁴”I Salomo, i amang i Tuange seng něgěllị u wawaěng mawěhạ si kami. Kamageng i Tuang měhaěng bawawaěng, dingangu sigěsạ si kami, i kami e mẹ̌suba si Tuang.”

⁵I Rehabeam simimbang, ”Iạ e reng mẹ̌tiněnna kal᷊amona. Děntako saụ su katěllu ěllone mahi.” Tangú něngkapul᷊ẹ e taumata ene.

⁶Tangú i Rehabeam nẹ̌dorongke těgu su maghaghurang kụ sen nạung bọu nakoạ měnaněgun Salomo i amang i Rehabeam, ”Kai kereapa ngae iạ hinon sumimbang si sire?” I Rehabeam nakiwal᷊ọ e, ”Apạ e těgung kamene?”

⁷I sire simimbang, ”Kamageng i Tuang mapulu, pakapia wue mẹ̌koạ mapia su kawanua ringangu makal᷊uasẹ̌ naung i sire e, sasimbange mapia si sire tangú i sire sarung satia si Tuang sarang karěngụ e.”

⁸Kaiso těgung maghaghurang ene, tawe nipandungang i Rehabeam. Kasul᷊eng e i sie nakoạ e sol᷊ong anun taumata apang sěngumurʼi sie, kụ orasẹ̌ ini e nakoạ mẹ̌sasumbala si sie.

⁹Su těngon sire i sie nakiwal᷊o, ”Apạe těgung kamene si siạ, sumimbang kakiwal᷊on kawanua kụ mẹ̌dẹ̌dorong tadeạu iạ mapakahaěngu wawawaěng i sire?”

¹⁰I sire simimbang, ”Kere ini hinone i Tuang mẹ̌bera su těngon sire, ’Seng kal᷊omene iạ, kai mang bědang matoghaseng iạ, i amangku.[7]

¹¹I amangku e něgěllịeng bawawaěng mawěhạ si kamene, kai iạ e sarung měgěllịu limembong kawěhạ e lai. I sie mělẹ̌hěgisẹ̌ si kamene dingangkeng gagheserẹ̌, arawe iạ e měnggeseru cambokẹ̌ piạ larange uase si kamene!’ ”

¹²Su katěllu ěllone tuhụ e i Yerobeam dingangu kěbị taumata ene nẹ̌saụ e nẹ̌těngon Datu i Rehabeam, kerẹewe niparentane.

¹³Nẹ̌tatěntangken těgung manga maghaghurang, anạ u kawanua suapan diměnta su anun sie nipẹ̌beraěngke mal᷊ahěge.

¹⁴Kerẹewe těgun taumata mangangudạ, i sie nẹ̌bera, ”I amangku něgěllị si kamene bawawaěng mawěhạ, kaiso iạ e měgěllị u wawawaěng limembong kawěhạ e. I amangku mẹ̌gěnggeserẹ̌ dingangu cambokẹ̌, arawe iạ měnggeserẹ̌ dingangu cambokẹ̌ piạ larange uase si kamene.”

¹⁵Dorong u anạ u kawanua e tawe niraringihange kai ene kawe kapulun MAWU Ruata. Ini e piněhengetang u MAWU Ruata su Nabi i Ahia wọu Silo mạanuẹng Yerobeam anạ i Nebat hinon mariadi.

¹⁶ Suapạeweng kawanuang Israelẹ̌ nakasilo u ratu e tawe mapulu rimaringihẹ̌ si sire, i sire e nẹ̌bansagẹ̌ maihạ, ”Kai apạe kaěbakeng i kitẹ bọu i Daud dingangu pal᷊ahitene! I sire mambeng ta mẹ̌kakoạ apa-apa waugi kitẹ. Kawanuang Israelẹ̌, mahịe i kitẹ mapul᷊ẹ! Balạete i Rehabeam pěngěnna watangenge sẹ̌sane!” Tangú napul᷊ẹ e kawanuang Israelẹ̌,

¹⁷kụ i Rehabeam nakoạ e ratu kětạu su weọ u Yehuda.

¹⁸Maningbeng kětạu kerene Ratu i Rehabeam bědang lai něndolohʼi Adoniram, těmbonangu mělahal᷊ẹ̌ sihasa tadeạu mapakal᷊enehu anạ u kawanua. I sire měngkate němereng u watu si sie sarang nate. I Rehabeam tangú nakatal᷊ang, dingangkeweng karetane měngkate masahawụ timal᷊ang sarang Yerusalem.

¹⁹Nanětạ bọu ene kawanuang Israel su sěmběkan sawěnahẹ̌ tinalung mẹ̌gěnggohaeng su ratu pal᷊ahiten Daud.