Read Sangir KARARATUANG KARUANE 11 Bible Online

KARARATUANG KARUANE 11 - Sangir bible

KARARATUANG KARUANE 11

¹Su tempon Datu i Rehabeam riměnta su Yerusalem, i sie něngomol᷊eng 180.000 su kataune mẹ̌sasekẹ kapapiaěnge wọu ghal᷊ipohong Yehuda ringangu ghal᷊ipohong Benyamin, mědeạ u sumekẹ tau Israelẹ̌, dingangkewen měmal᷊ịu kawasane su ghal᷊ipohong Israelẹ̌ su sěmběkan sawěnahẹ̌.

²Kaiso MAWU něndolohen Nabi Semaya,

³apạul᷊ị u tatanata kere ini si Rehabeam dingangu su kěbị taumata ral᷊ohon Yehuda ringangu Benyamin,

⁴”Kumbahangbe sumekẹ anạu sěngkataunu tau Israelẹ̌. Kapul᷊ẹ e! Apang kụ seng nariadi ene kai kapulu-Ku.” Tangú i sire kěbị e timuhụ e parentam MAWU, kụ ta nariadi simekẹ si Yerobeam.

⁵I Rehabeam nẹ̌tanạ e su Yerusalem, kụ nẹ̌parentạ e taumata pěkẹ̌koạ e manga těndạ su kěbị soa su wahageangu Yehuda ringangu Benyamin, kụ kai:

⁶manga soam Betlehem, Etam, Tekoa,

⁷Bet-Zur, Sokho, Adulam,

⁸Gat, Mares, Zif,

⁹Adoraim, Lakhis, Azeka,

¹⁰Zora, Ayalon dingangu Hebron.

¹¹I sie napakatoghasu manga soa piạ tatěndạ e, kụ naměllọen těmbonangu wuntuang suapan soa. Apạewen soa e nighanapeng u kaěng dingangu lanan zaitun dingangkewen anggorẹ̌

¹²ore lai kěllung dingangu wěngko. Hakịu ene wọu Yehuda ringangu Benyamin tatapẹ̌ su ral᷊ungu kawasane.

¹³Manga imang dingangu tau Lewi wọu kěbị beọ u Israelẹ̌ natamai nẹ̌dal᷊aụ dingangi Rehabeam.

¹⁴Taumatan Lewi naněntangken bawuraseng piạ děmpugẹ̌ dingangu ěntanan sire, kụ něngal᷊ing sarang Yehuda ringangu Yerusalem, batụu i Yerobeam dingangu manga ratune něngaweng si sie, ta napakawalan sire němunarang pangkatẹ̌ imang u MAWU.

¹⁵ I Yerobeam něhengkẹ manga imang e hala waugu mẹ̌tangkiang su tampạ u pěnanal᷊eěng dingangu měnẹ̌nal᷊e manga dieng dingangu l᷊ai tul᷊adang sapi kinoạ e hala.

¹⁶Manga umatẹ̌ bọuten ghal᷊ipohong Israelẹ̌ kụ kahěnga-hěngang mapulu maněmba MAWU, Ruatang Israelẹ̌, něngal᷊ingke sarang Yerusalem, nẹ̌tuhụ e manga tau Lewi, tadeạu makapěněmbang, sasěmba su MAWU Ruata i upung i sire.

¹⁷Ual᷊ingu ene tangú kararatuangu Yehuda mang kakạtoghase. Su ral᷊ungu těllu taung i sire tụtuhụ si Rehabeam ahusʼi Salomo, měbẹ̌biahẹ̌ ewe kere su tempong pẹ̌paparentan Datu i Daud dingangu Ratu i Salomo.

¹⁸I Rehabeam nẹ̌kawing i Mahalat. I amang i Mahalat ute kai i Yerimot, ahusʼi Daud, i ninange ute i Abihail anạ i Eliab, pulung i Isai.

¹⁹I rẹ̌dua piạ anạ e tatěllu esẹ arenge: i Yeus, i Semarya ringangu i Zaham.

²⁰Bọu ene i Rehabeam nẹ̌kawingi Maakha, anạ i Absalom. I rẹ̌dua nakahombang anạ esẹ ěpạ u katau, arenge: i Abia, i Atai, i Ziza ringangu i Selomit.

²¹I Rehabeam piạ kawinge 18 su kataune dingangu rokạ e 60 su kataune, 28 su kataune anạ e esẹ dingangu 60 su kataune anạ e wawine. Bọu patikụ kawinge ringangu manga rokạ e, tangú i Maakha limembong itẹ̌tal᷊ěntụ e.

²²Ene sěbapẹ̌ e i Abia anạ i Maakha limembong ikẹ̌kapulune, wọuten patikụ pal᷊ahanạ e wal᷊ine, hakịu i Abia mal᷊aing pinilene makoạ laaweng si sie makoạ datu.

²³Měngkai pelesa i Rehabeam něgěllịu hal᷊ẹ̌ su manga anạ e esẹ, kụ němělọen sire su soa piạ tatěndạ e su patikụ beọ u Yehuda ringangu weọ u Benyamin. I sie něngonggọeng kaěng mal᷊awọ dingangu lai wawine makoạ kawingi sire.