Read Sangir KARARATUANG KARUANE 12 Bible Online

KARARATUANG KARUANE 12 - Sangir bible

KARARATUANG KARUANE 12

¹Sarětạeng kawasang Rehabeam nakoạ datu mang seng kakạkuate, i sie ringangken patikụ anạ u kawanuang Israelẹ̌ timal᷊ikudẹ̌ toratʼu MAWU Ruata,

²kụ mang seng mẹ̌tětěngkaraun Sie. Ual᷊ingu ene MAWU Ruata něhukung si sire. Su taung kal᷊imane pẹ̌paparentan Rehabeam i Sisak datun Misirẹ̌ simekẹ e Yerusalem,

³dingangu 1.200 suwaụ e karetan paraěng, 60.000 su kataune sordado su wowong kawal᷊o ringangu měngkai lawọ sordado narekeng lai sordadon Libia, Suki dingangu Sudan.

⁴I sie něhampasẹ̌ manga soa ghagherẹ piạ těndạ e su Yehuda bọu ene natol᷊ọ sol᷊ong Yerusalem.

⁵Su tempo ene Ratu i Rehabeam dingangkeweng manga těmbonangu Yehuda mẹ̌kẹ̌komol᷊ẹ̌ su Yerusalem, batụu kai tumal᷊ang i Sisak. Nabi i Semaya diměnta su anun sire, kụ nẹ̌bera, ”Kai kere ini hengetangu MAWU Ruata, ’I kamene kai naněntang u Iạ, tangú su orasẹ̌ ini, Iạ mal᷊aing měněntang i kamene, hakịeweng i kamene manawo su kawasan Sisak.’ ”

⁶Datu ringangkeweng manga těmbonange něngaku u i sire seng limampa ore nẹ̌dosa. I sire měngkate němpẹ̌bera, ”Apang kụ nịkakoạ u MAWU ene adilẹ̌.”

⁷Sarětạeng MAWU Ruata nakasilo u i sire seng nẹ̌tengkasanạ u watangeng i sire, i Sie něhengetangke si Semaya, angkuěngʼE, ”Ual᷊ingu i sire seng němpěngaku rosan sire ute Iạ e tawe misěhụ měminasa si sire. Iạ e hinong mal᷊ighạ měliun sire; Yerusalem tawe iapakaupu. Maningbeng kerene i Sisak

⁸mang sarung měkawasa si sire, tadeạu i sire makakasingkạ pẹ̌tatěntangengu mẹ̌tahamawu si Siạ dingangu mẹ̌tahamawun dunia.”

⁹ Tangú narěntạ e Ratu i Sisak simekẹ soan Yerusalem kụ něhampasẹ̌ manga apal᷊iwụ mal᷊aarěga kạtataho su Wal᷊em MAWU ringangu su wal᷊en datu, mangạe kěllung bul᷊aeng kinoạen Datu Salomo.

¹⁰Nakoạ e laaweng ute i Rehabeam něněsal᷊e kěllung bọu tambaga, kụ nisarakang kere i sie su manga těmbonangu sordado měndariagạ tukadẹ̌ sasěbangengu wal᷊en datu.

¹¹Su tempon datu sumuẹ̌ su Wal᷊em MAWU, tangú měndariagạ nẹ̌bawạ e kěllung tamai ene, mase saụewe něndesọ kapia su kamarʼu pěndariagateng.

¹²Ual᷊ingu ratu e nẹ̌těngkasanạ u watangenge su těngom MAWU, dingangu kai wědang piạ manga hal᷊ẹ̌ mapapia su Yehuda, tangú nal᷊enehe ral᷊angehʼu MAWU si Rehabeam kụ tanisěhụ něminasa si sie, marihutu.[8]

¹³I Rehabeam nẹ̌parenta su Yerusalem kụ kawasane mang kakạsariane. I sie su umbure kaěpạ u pul᷊o ěsane su taunge su tempon nakoạ datu, nẹ̌parenta mapul᷊o pitu su taunge karěngụ e su Yerusalem, soa e pinilen MAWU Ruata su kaguwạu ěntanan Israelẹ̌, kụ piněmẹ̌tikangke Wal᷊em MAWU. I ninang i Rehabeam ute kai i Naama wọu soang Amon.

¹⁴I Rehabeam nẹ̌koạ e ral᷊akị batụu i sie tawe nẹ̌tawakal᷊i timol᷊e kapulun MAWU Ruata.

¹⁵Běkeng mạanụeng Rehabeam bọu tětạ e sarang pěhẹ̌pusang e dingangkewen salakěboěnge tangu mạbawohẹ su ral᷊ungu bukẹ̌ u Wěken Nabi Semaya dingangu su ral᷊ungu bukẹ̌ u Wěken Nabi Ido. Sutal᷊oaran Rehabeam dingangkewen Yerobeam, tinalung piạ pẹ̌sasekẹ.

¹⁶I Rehabeam nate kụ nilěbing su pěndal᷊ěbingang u mararatu su Soan Daud. I Abia anạ e nakoạ datu něngaweng si sie.