Read Sangir KARARATUANG KARUANE 13 Bible Online

KARARATUANG KARUANE 13 - Sangir bible

KARARATUANG KARUANE 13

¹Su taung kapul᷊o ual᷊une tempong pẹ̌parentan Datu i Yerobeam su wanuan Israelẹ̌ i Abia naratụ e su Yehuda,

²něparentạ e těllu taung karěngụ e su Yerusalem. I ninang e ute i Mikhaya anạ i Uriel bọu soang Gibea. Bọu ene nawěkạ e sekẹ su tal᷊oarang Abia ringang i Yerobeam.

³I Abia e něndoloheng sordado ěpạ u hasụ su hiwune, arawe i Yerobeam ual᷊u hasụ suhiwune.

⁴Duang kamonaěng ěndaị e němpẹ̌těngo su wěntihu Efraim. I Abia simaka su Wul᷊udu Zemaraim, mase kimuị e si Yerobeam dingangu taumatang Israelẹ̌, ”Daringihẹ̌!

⁵I kamene masingkạ u MAWU, Ruatan Israelẹ̌ kai seng něngikị u pẹ̌dariandi ringang i Daud, u i sie dingangu pal᷊ahitene sarung mẹ̌parenta Israelẹ̌ sarang marěngụ-děngụ. Diandi ene mang tawe mawau.

⁶Manimbeng kerene i Yerobeam anạ i Nebat mang něnggohaeng si Salomo, kụ nạung datun sire.

⁷I sie něngomol᷊eng sěnggapaěngu taumata běgang atorang kụ mang mẹ̌nahěsẹ u kapulun sire si Rehabeam anạ i Salomo kụ su tempo ene wědang tal᷊awuọ měngkai wěga rumokạ.

⁸I kamene manikạ u kai makarokạ kawasa nighěllị u MAWU su pal᷊ahiten Daud, batụu ghapaěng i kamene kai ghagherẹ dingangu i kamene kawe mạnaghuang tul᷊adan sapi wul᷊aeng, kụ kaěbạeweng Yerobeam nikoạ mahang duatang kamene.

⁹Manga imang u MAWU pal᷊ahiteng Harun dingangu manga pal᷊ahiten Lewi seng nirolohʼi kamene e? Kụ makoạ e awenge ute balạeng i saing mapulu makoạ imang, asal᷊ewen tau ene mẹ̌bawa sapi sěmbaụ arau domba pitum baụ, ute i sie makoạ imang u mahan duata, batụu mambeng kerene kakakoạ u wansa wal᷊ine kamagengu měhengkẹ e imang i sire. Arawe bansang kami e tawe mẹ̌kakoạ kerene.

¹⁰I kami e tatapẹ̌be mẹ̌tẹ̌tahamawu MAWU Ruata kụ mambeng ta měnaněntang i Sie. Manga imang i kami mang pal᷊ahiteng Harun dingangu taumatan Lewi tinalung měsẹ̌sumbala si sire.

¹¹Apang kamal᷊ukadẹ̌ dingangu apang kawawěllo i sire mang měnẹ̌nutung dukụ mawawěngi ringangu mẹ̌bẹ̌bawa sasěmba tẹ̌tutungang baugu MAWU ore lai mẹ̌měllọeng borotẹ̌ sẹ̌sadiaěng.[9] Apang kal᷊ahěbi i sire mẹ̌děndikọen sol᷊o piạ kal᷊aianenge wul᷊aeng. I kami e tatapẹ̌ tụtuhụ parentam MAWU, arawe i kamene kawe seng naněntangken Sie.

¹²Pangahạ i kami e kai Mawu Ruata sẹ̌sane, sarangkeweng manga imang e mang ene sini. I sire mambeng sadia měmpěniụ slompretẹ̌, mapakasingkạ u seng měnekẹ si kamene. Hei taumatang Israelẹ̌, kumbahang dumokạ MAWU, Ruatang i upungu. I kamene tawe makauntung!”

¹³Ta nararěnnạ i Yerobeam něndingọeng gapaěngu sordado, iapěněndạ gapaěngu sordadong Yehuda bọu l᷊ikude, arawe sěnggạ ute wọuten těngone.

¹⁴Sarětạen sordadon Yehuda nakasilo u i sire kawe niliwungang, i sire nẹ̌kiạ u kai makịtul᷊ung su MAWU. Manga imang e němpěniụ slompretẹ̌,

¹⁵mase ghapaěngu tau Yehuda e nẹ̌bansagẹ̌, tatialan tětạ u mẹ̌sekẹ těmbonang i Abia. Su piạ e i sire kapẹ̌bẹ̌bansage Mawu Ruata napakarugin Yerobeam dingangu ghapaěngu Israelẹ̌,

¹⁶hakịu i sire nahuntal᷊ang. Mawu Ruata napakauntungu tau Yehuda si sire.

¹⁷Apạ e masaria kararugi kahiang Abia ringangu ghapaěnge nikatarimạ u tau Israelẹ̌; lima hasụ su hiwune sordadon sire kapiaěnge nate.

¹⁸Tau Yehuda e nakauntung, ual᷊ingu i sire měngẹ̌ngunsandehẹ̌be su MAWU Ruatang upung i sire.

¹⁹Su tempong i Abia něnahusu sordadon Yerobeam, i sie nakahampasẹ̌ lai soa pira-piram baụ dingangkewen manga kampong su rěduhe. Soa ene tangú Betel, Yesana dingangu Efron.

²⁰Karěngụeweng pẹ̌paparentang Abia, i Yerobeam tawe nakakoạ mapia kawasane. Kasasueěnge i sie nipateng MAWU.

²¹I Abia mangkeng kạkatoghase kawasane. I sie piạ kawinge mapul᷊o ěpạ, anạ e esẹ duam pul᷊o dua, anạ e wawine mapul᷊o ěnnung.

²²Bẹ̌ke wal᷊ine mạanung Abia, dingangkeweng kěbị bawerane ringangu kakakoạ e seng niwohẹ su ral᷊ungu bukẹ̌ u Wěken Nabi Ido.