Read Sangir KARARATUANG KARUANE 14 Bible Online

KARARATUANG KARUANE 14 - Sangir bible

KARARATUANG KARUANE 14

¹Samurin Datu i Abia napohong dingangu nilěbing su pěndal᷊ěbingang u mararatu su Soan Daud, i Asa ahuse nakoạ datu něngaweng si sie. Su al᷊ungu parentang Asa, wanuang Yehuda mal᷊enehẹ̌ karěngụ u mapul᷊o su taunge.

²I Asa makạl᷊uasẹ̌ naungu MAWU Ruatane ual᷊ingu pẹ̌kakoạ kạadilẹ̌ e ringangu mapia.

³I sie napěngěnsọ u kal᷊awọu pananěmbaěngu wansa wal᷊ine ringangu manga tampạ u pananěmbaěng mahang duata. Manga palẹ̌ u mahang duata e nighoghahe, ringangu manga rihin tul᷊adang mahang duata wawine i Asyera e nịlahakane.

⁴Kawanuang Yehuda e niorone pinẹ̌biahẹ̌ tuhụ kapulung MAWU, Ruatang upung i sire, dingangu rụdaringihẹ̌ kal᷊awọu těntiro-Ne ringangu manga parentanʼE.

⁵Patikụ tampạ u pananěmbaěng mahang duata ringangu tampạ u pěnanawungang buwụ pinakaraune wọu manga soan Yehuda. Tangú nal᷊enehe kararatuang ene su al᷊ungu paparentaěnge,

⁶hakịu i sie nakapěmangung manga tendạ u kal᷊awọu soan Yehuda. Manga pira taung karěngụ e tawẹ apa pẹ̌sasekẹ ual᷊ingu MAWU nẹ̌gěllịu pẹ̌darame si sie.

⁷Angkuěng i Asa su kawanuang Yehuda, ”Mapiawe i kitẹ mapakatoghasu kal᷊awọu soa ringangu měmangung meselẹ̌ ipěngělikụ sene ringangu manga měnara ore lai pasěllangeng dingangkewelaing manga papal᷊ene. I kitẹ seng nakapẹ̌kawasa wanua ini batụu i kitẹ semben timuhụ kapuluʼm MAWU Ruatang kitẹ e. I Sie nẹ̌padul᷊i si kitẹ dingangu mẹ̌dẹ̌dariagạ tadeạu kasěllahu wanuang kitẹ e tawẹ silontahe apa.” Tangú nanětạ e i sire němangung dingangu něngěnsue hal᷊ẹ̌ ene pinakapia.

⁸Sordadon Datu i Asa kai nial᷊ạ bọu tau Yehuda 300.000 su kataune aghide kěllung dingangu těmbahẹ̌, dingangu 280.000 su kataune taumataʼm Benyamin aghide kěllung, naěnakeng dingangu horoʼm papitị. I sire kěbị e kai sordado wawahani ringangu narapal᷊ẹ̌.

⁹Piạ sěnsul᷊ẹ̌ tau Sudan sěngkatau arenge i Zerah něnekẹ Yehuda ringangu wuntuange sordado 1.000.000 su kataune ringangu karetan sekẹ 300 su waụ e. I sire rimal᷊eng karaung Maresa.

¹⁰Tangú siměbangke i Asa nẹ̌těngon Zerah, ringangu i rẹ̌dua něhunduge wuntuangu sěmbaụ-sěmbaụ su Wal᷊an Zefata masandigu Maresa.

¹¹Bọu e i Asa nẹ̌kal᷊iomaneng su MAWU Ruatane, ”MAWU, kětạeng i Kau makạontol᷊ẹ̌ apang lome wọu apang matatoghasẹ̌. Tul᷊ungko i kami su orasẹ̌ ini e MAWU Ruatang kami! Seng i Kau e pěngumbal᷊erang i kami ringangu kai su arengʼU e i kami suměbang mẹ̌sekẹ dumokạ buntuang kereng kasariane ini e MAWU, seng i Kau e Ruatang kami. Abe wala watangengʼU e ikawatạ u sěngkatau taumata.”

¹²Bọu e i Asa ringangu sordadong Yehuda e něnekẹ sordadon Sudan. MAWU e němatạ sordadon Sudan hakịu i sire němpẹ̌tal᷊ang u watangeng i sire.

¹³I Asa ringangu sordadone něnahusu si sire sarang karaung Gerar. Su sěmběkan Sudan mal᷊awọ kahěngang něngkapate hakịu sordadon sire tawe nakakoạ manga apa ual᷊ingu nigholọ u MAWU ringangu sordadon Yehuda kụ mal᷊aing něhampasẹ̌ manga apal᷊iwụ i sire mal᷊awọ. Bọu ene sordadon Yehuda mal᷊aing něnggolọ manga soa su wanua nangělikụ Gerar, ual᷊ingu MAWU e napakariadin tumanạ e něngkatakụ. Sordadon Yehuda něhampasẹ̌ kěbị soa ene ringangu nakaěbạ apal᷊iwụ lawọ kahěngang.

¹⁵I sire lai němpěngalo su rasengu mělahiking binatang, dingangu němpěhengkẹ domba ringangu onta e mal᷊awọ. Bọu ene i sire nẹ̌sul᷊e sarang Yerusalem.