Read Sangir KARARATUANG KARUANE 15 Bible Online

KARARATUANG KARUANE 15 - Sangir bible

KARARATUANG KARUANE 15

¹Rohkẹ̌ u Mawu e nẹ̌kawasa su Nabi i Azarya anạ i Oded,

²hakịu i sie tamai nẹ̌sombangu Ratu i Asa, kụ nẹ̌bera, ”Ei Ratu i Asa, ringangu kal᷊awọu tumanạ u Yehuda ringangu Benyamin! Daringihẹ̌ko! MAWU e maraning kamene kereu i kamene maranin Sie. Kereu i kamene mẹ̌dorong tatiala wọu MAWU, i Sie sarung měngonggọu ene. Kaiso kamagengu i kamene tawe mẹ̌pandung si Sie, i Sie mal᷊ain tawe mẹ̌pandung si kamene.

³Marěngụ kahěngang Israel tawe nẹ̌samal᷊ẹ su Ruata kahěngang, tawẹ apa tita hinon tuhukang, dingangu tawẹ apa manga imang kụ měněntiro si sire.

⁴Arawe su tempong i sire su ral᷊ungu kasasěsẹ, i sire mẹ̌dẹ̌dorong tul᷊ung su MAWU, Ruatang Israel. I sire mědědorong laahạʼE kụ i Sie nẹ̌gěllị.

⁵Su tempo ene taumata tawe makapẹ̌daral᷊eng baharia, u apan soa piạ pẹ̌sasilontahẹ̌ masaria.

⁶Bansa sěmbaụ měnědạ bansa wal᷊ine, dingangu soa sěmbaụ měnědạ soa wal᷊inẹ, batụu Ruata e maparěntang pẹ̌sasilontahẹ̌ masaria si sire.

⁷Kaiso i kamene harusẹ̌be pakararagẹ̌ dingangu pakawahani. Tawakal᷊inu e sarungbe piạ ual᷊ine.”

⁸Piạ i Asa nakaringihẹ̌ bawerang Azarya anạ i Oded ene, simahokạ e kal᷊okone. I sie napakaraung kěbị mahang duata su wanuang Yehuda ringangu Benyamin, dingangu manga soa kụ seng kinawatạ e su wawul᷊urang u Efraim, bọu ene i sie něngul᷊ị pananěmbaěng u MAWU kụ kaěbakeng su rělahu Wal᷊em MAWU.

⁹Mal᷊awọ tau Efraim, Manasye ringangu Simeon kụ nẹ̌dal᷊aụ dingang i Asa, kụ nẹ̌tanạ su wanuang kararatuang e, ual᷊ingu i sire nakasilo uade MAWU e nẹ̌tul᷊ung i sie. I Asa něngoro si sire ene kěbị dingangu manga kawanuang Yehuda ringangu kawanuang Benyamin.

¹⁰Pẹ̌tẹ̌tampung su Yerusalem. Tangú nẹ̌tampungke i sire su wul᷊ang katěllune su ral᷊ungu taung kapul᷊o l᷊imane su parentang Asa.

¹¹Su ěllo ene i sire naněmban sapi 700 su waụ e su MAWU ringangu domba 7.000 su waụ e nipul᷊ahon sire kụ nakoạ ul᷊en sire wọu nẹ̌sekẹ.

¹²I sire nẹ̌diandi su MAWU u ringangbeng naung gẹ̌guwạ dingangu himukudi sire sarung mẹ̌biahẹ̌ tumuhụ kapulum MAWU, Ruatang i upung i sire.

¹³Walạewe i sai měnsang maghurang arau mangudạ, esẹ arau wawine, kụ mẹ̌bẹ̌biahẹ̌ tawe tumatuhụ kapulum MAWU nal᷊ahẹ u ihukungu papate.

¹⁴Dingangu tingihe maihạ i sire nẹ̌salu su MAWU u i sire sarung měngumpaedẹ̌ diandi ene. Bọu ene i sire němpahul᷊uasẹ̌ kụ němpěniụ slompretẹ̌.

¹⁵Kal᷊awọu kawanuang Yehuda e němpahul᷊uasẹ̌ ual᷊ingu i sire seng nẹ̌salu ringangu kạguwạu ral᷊ungu naung. I sire mal᷊uasẹ̌ mẹ̌kal᷊iomaneng su MAWU, dingangu MAWU e mal᷊aing mal᷊uasẹ̌ měnarimạ i sire. I Sie něngonggọu karal᷊enehẹ̌ si sire su wanuan sire.

¹⁶Bọu ene Ratu i Asa nělohosʼi nenẹ e i Maakha, bọu kal᷊aianenge kere sěngkatau Marehokang Kakakěllaěng batụu i sie seng nẹ̌koạ tul᷊adang mahang duata masahigẹ̌ baugʼi Asyera, duata wawine su tawang ěntana. I Asa něhaka ringangu něnggaghoghahẹ̌ tul᷊ada ene wọu ene něnutung ene su Wal᷊ang Kidron.

¹⁷Maningbe wal᷊ine kěbị tampạ u pěnaněmbaěng mahang duata su wanua ene nigholang i Asa, kaiso i sie tatapẹ̌be satia su MAWU kanandung pẹ̌bawiahe.

¹⁸Patikụ bul᷊aeng dingangu sal᷊aka ore apal᷊iwụ bal᷊ine lětạ u pul᷊ahon sekẹ tataghuaneng i amange ringangu watangenge hala nipěllọe su Wal᷊em MAWU nakoạ tataghuaneng u MAWU.

¹⁹Sarang taung katěllum pul᷊o l᷊imane pẹ̌paparentang Asa tawẹ běke ren tumimbul᷊ẹ̌ lai pẹ̌sasekẹ su wanua ene.