Read Sangir KARARATUANG KARUANE 16 Bible Online

KARARATUANG KARUANE 16 - Sangir bible

KARARATUANG KARUANE 16

¹Su l᷊iman Datu i Asa taung katěllum pul᷊o ěnnunge su Yehuda, i Baesa ratung Israel něnekẹ Yehuda kụ nanoghasẹ̌ soang Rama waugu pěhěping dal᷊eng suměbang sarang Yehuda.

²Tangú Ratu i Asa něngal᷊ạ bul᷊aeng dingangu sal᷊aka wọu pěndaresoěnge su Wal᷊em MAWU ringangu istanan datu, kụ niringọ e sarang Damsyik si Benhadad, datun Siria piạ tatanatane kere ini,

³”Mahiko i kitẹ deng měngikị u pẹ̌dal᷊ahapị kere nạung seng nikoạ u maghurang i kitẹ. Kụ dingangu ini tangú kụ iạ měndohong bul᷊aeng dingangu sal᷊aka poroseng dingangu měloke si Tuang tadeạu pěměsụ pẹ̌dal᷊ahapị dingangi Baesa ratung Israel tadeạu i sie měngul᷊e kapia wuntuange wọu wanuaku.”

⁴I Benhadad kimire su paparingang ene wọu ene něngoro manga pěrwirane ringangu wuntuang i sire pěnẹ̌nekẹ manga soang Israel. I sire němatạ Iyon, Dan, Abel-Bet-Maakha ringangu kěbị manga soang pěndaresokangu wiahẹ̌ su Naftali.

⁵Ene Ratu i Baesa nakaringihẹ̌ ene, i sie nẹ̌dungu pěnanoghasẹ̌ Rama ringangu naněntangu soa ene.

⁶Bọu e Ratu i Asa napasěbangu taumata wọu kasěllahu Yehuda apěhengkẹ batu ringangu kalu kụ nipakẹ i Baesa su Rama baugu mapakatoghasʼu soa ene. Manga kakoạ e ene nipakẹ i Asa mědeạu ipěnoghasẹ̌ soang Geba ringangu Mizpa.

⁷Su tempo ene Nabi Hanani riměnta su anun Datu i Asa kụ nẹ̌bera, ”Ual᷊ingu i kau kawe mạngumbala su ratun Siria, wal᷊inewe su MAWU Ruatanu, ute nailangke lěsabu waugu měmatạ sordadon datung Israel.[10]

⁸Kai Sudan dingangu Libia wal᷊inewe piạ buntuangu piạ aghide masaria ringangu karetan sekẹ ore lai sordado piạ kawal᷊one mal᷊awọ tangu? Maning lai kerene, MAWU e něngonggọ u kal᷊auntu si kau wọʼi sire, ual᷊ingu i kau mạngumbalawe si Sie.

⁹MAWU e mạnitị kasěllahu dunia waugu měngonggọu katoghasʼE waugu taumata apan satia si Sie. I kau seng kakanoạ u wodo, ual᷊ingu ene manětạ bọu orasẹ̌ ini, i kau hanesẹ̌ sarung makahombang pẹ̌sasekẹ.”

¹⁰Bawerang Nabi Hanani ene nakariading Asa apạ e limangehẹ̌ hakịu i sie napasuẹ̌ u nabi ene su ral᷊ungu tahungkụ. Su tempo ene lai i Asa něnědạ pirang katau wọu kawanuane.

¹¹Patikụ apan nariadi su l᷊iman Datu i Asa bọu humotong sarang pěngěnsueěnge seng niwohẹ su ral᷊ungu bukẹ̌ u Wěkem Mararatun Yehuda ringangu Israel.

¹²Su taung katěllum pul᷊o sione su l᷊imane i Asa nasakị matědụ su l᷊aede ruam běkạ. Kai maningbe kerene i sie tawe nẹ̌deạ tul᷊umang bọu MAWU, kaiso kawe wọu dokterẹ̌.

¹³Dua taung samuring ene i sie naněntang u dunia.

¹⁴Maiete nịgaghiwukangu manga rampane ringangu wawěngine, bọu e nilěbing su pěndal᷊ěbingang u mararatu su Soan Daud. Kụ baugu pẹ̌gěllikangu adatẹ̌ si sie tangú kawanua e němpěndikọ u putung pinakahune masaria-saria.