Read Sangir KARARATUANG KARUANE 17 Bible Online

KARARATUANG KARUANE 17 - Sangir bible

KARARATUANG KARUANE 17

¹I Yosafat nakoạ datung Yehuda něngaweng si Asa i amange, ringangu i sie napakatoghasu watangenge mědeạu rumokạ Israel.

²I sie naměllọu sordado su kěbị soa piạ těndạ e su Yehuda, dingangu su wanua su l᷊ikudu soa su Yehuda, ore lai su apan soa kụ seng nipul᷊ahong amange su wanuang Efraim.

³MAWU e něngal᷊amatẹ̌ si Yosafat ual᷊ingu i sie tụtol᷊e ěnnạ u laedʼi amange; i sie tawe měnaněmba Baal,

⁴kaiso kawe mẹ̌kẹ̌kal᷊iomaneng su Ruata. I sie mararingihẹ̌ su parentan Duata, ringangu pẹ̌bawiahe wal᷊inewe kere mararatung Israel.

⁵MAWU něngonggọu kal᷊aianeng matoghasẹ̌ si Yosafat nakoạ datung Yehuda. Kal᷊awọu kawanua něngonggọu manga poroseěng si sie ringangu i sie nakalạ kutẹu l᷊ai limembong lẹ̌adateng.

⁶Piạko kapulune ghẹ̌guwạ i sie matuhụ su titaʼm MAWU ringangu něnggoghahẹ̌ patikụ tampạ u pananěmbaěng mahang duata ringangu tul᷊adang duata wawine i Asyera su Yehuda.

⁷Su taung katěllune su kararatune i sie něndolohu mapapangkatẹ̌ marangẹ baugu apaněntirong manga titaʼm MAWU su kal᷊awọu soang Yehuda. I sire ute kai: Benhail, Obaja, Zakharia, Netaneel dingangu Mikha.

⁸I sire niringanengu tau Lewi i sire siong katau ringangu imang duang katau. Tau Lewi ene ute kai i Semaya, i Netanya, i Zebaja, i Asael, i Semiramot, i Yonatan, i Adonia, i Tobia, ringangu i Tob-Adonia. Imang darua ene ute kai i Elisama ringangu i Yoram.

⁹Kụ ual᷊ingu pẹ̌bawawa bukẹ̌ u Manga Titaʼm MAWU i sire mẹ̌dẹ̌daral᷊eng su patikụ soang Yehuda ringangu měmpạněntiro kawanua sene.

¹⁰MAWU nẹ̌koạ kěbị kararatuang mạngělikụ Yehuda mạtakụ mẹ̌sekẹ dumokạ Datu i Yosafat.

¹¹Bọu tau Pilistin i sie něnarimạ u sal᷊aka mal᷊awọ dingangkewen manga poroseěng bal᷊ine, dingangu wọu tau Arabẹ̌ i sie nakatarimạ u domba 7.700 su waụ e ringangu kambing 7.700 su waụ e.

¹²Kerene i Yosafat kakạděngụ e kakạkawasane. Su kasěllahu Yehuda i sie němangung manga těndạ batu ringangu manga soa pěndarěpehangu manga wiahẹ̌.

¹³I sie něngomol᷊u manga wiahẹ̌ tamatạ mal᷊awọ suapan soa ene. Su Yerusalem i sie něměllọu manga pěrwira mal᷊ahasa,

¹⁴sěngkatau-sěngkatau ringangu komol᷊ange tuhụ hěntone. I Adna ute kai mol᷊ensekẹ u kasasěmbaụ u hěnton Yehuda. I sie něngahạ u 300.000 su kataune sordado.

¹⁵Taumata karuane ute i Yohanan; i sie těmbonangu sordado 280.000 su kataune.

¹⁶Taumata katěllune ute kai i Amasia anạ i Zikhri; i sie těmbonangu sordado 200.000 su kataune. (I Amasia ute kai sěngkatau nẹ̌těngkakoạ mẹ̌tatangkiang MAWU.)

¹⁷Mol᷊ensekẹ u kasasěmbaụ u patikụ ghal᷊ipohong Benyamin ute kai i Elyada, sěngkatau tumanggihu sekẹ bahani. I sie něngahạ sordado 200.000 su kataune nasukụ u papitị dingangu kěllung.

¹⁸Taumata karuane su ral᷊ungu sěmbihingang ene ute kai i Yosabad; i sie mạngahạ sordado 180.000 su kataune nasukụ u aghidʼi sire.

¹⁹Seng i sire e němunara su Yerusalem. Su l᷊iung ene, ratu e něměllọu manga wuntuang bal᷊ine su apan těndạ u watu su wanuang Yehuda.