Read Sangir KARARATUANG KARUANE 18 Bible Online

KARARATUANG KARUANE 18 - Sangir bible

KARARATUANG KARUANE 18

¹Su tempong i Yosafat datung Yehuda seng kalạ dingangu timeleng, i sie napẹ̌kawingu sěngkatau ral᷊ohom bal᷊ene ringangu sěngkatau wọu walagi Ahab datung Israel.

²Pira taung tuhụ e i Yosafat nẹ̌tiwo si Ahab su soan Samaria. Baugu ipěngadatẹ̌ si Yosafat dingangu wuntuange, i Ahab nẹ̌koạ sal᷊iwang dingangu něngoro pěmotọ domba ringangu sapi mal᷊awọ. Su loahe ene i sie něloke si Yosafat apẹ̌nekẹ soang Ramot su Gilead.

³I sie nakiwal᷊o, ”I kau mapulu i kaduạ tamai měngalo soang Ramot?” I Yosafat simimbang, ”Kerenẹ e, sordadoku e hědo pẹ̌dal᷊aụ u sordadonu. Kụ i kadua mẹ̌sekẹ sěngkapẹ̌sekẹ.

⁴Katewe limembong kapiane i kadua makiwal᷊oko kal᷊imona su MAWU.”

⁵Tangú i Ahab něnampungu manga nabi piạ u 400 su kataune kụ bọu ene nakiwal᷊o si sire, ”Botonge iạ tamai měnekẹ Ramot arau walạ e?” ”Botonge!” angkuěng i sire. ”Duata e sarung měnarakangu soa ene su Ratu.”

⁶Arawe i Yosafat saụ nakiwal᷊o, ”Apa sini tawẹ apa nabi wal᷊ine kụ makakiwal᷊o su MAWU waugʼi kitẹ?”

⁷I Ahab simimbangu, ”Wědang piạ sěmbaụ, i Mikha anạ i Yimla. Arawe iạ e mạběnsing si sie, u tawẹ běke i sie měnighadu apa-apa kụ mapia waugu iạ; kaiso měngkai apang kụ dal᷊akisẹ̌ e.” ”Ah, kumbahang mẹ̌bera kerene!” angkuěng i Yosafat.

⁸Tangú i Ahab nẹ̌kui sěngkatau sawohị u istana kụ něngoro si sie pakạsahawụ tamai měněnsomahẹ̌ si Mikha.

⁹Su tempo ene i Ahab dẹ̌duang Yosafat, dingangu pakeangu kawawantugẹ̌, mạiang su kaderang kararatuang su tampạ u pěndal᷊indaěng gandung su těngon tukadu pasěllangengu Samaria, těntal᷊ang manga nabi ruměnta mẹ̌těngo, ringangu měhabaru tighadʼi sire.

¹⁰Sěngkatau wọu tal᷊oarang manga nabi ene arenge i Zedekia anạ i Kenaana, mẹ̌kẹ̌koạ manga sunge uase wọu ene nẹ̌bera si Ahab, ”Seng ini e piněhengetangu MAWU, ’Dingangu manga sunge kere ini e Datu sarung měmahang Siria ringangu mapakagholọ i sire.’ ”

¹¹Patikụ nabi wal᷊ine kimire ringangu nẹ̌bera, ”Alo e soang Ramot, i Tuang sarungbe makaual᷊i. MAWU e sarung měngonggọu kal᷊auntu si Tuang.”

¹²Těntal᷊ang ene darolohang kụ měněnsomahẹ̌ si Mikha e, nẹ̌bera si Mikha, ”Patikụ nabi wal᷊ine měnẹ̌něbal᷊u kal᷊auntu waugu ratu. Mal᷊owọko i Tuang mal᷊aing měněbal᷊u apang mapia kere i sire.”

¹³Arawe i Mikha e simimbang, ”Ual᷊ingu MAWU kụ biahẹ̌ e, iạ tumbạeng sarung maul᷊ị u apang piněhengetangu Mawu Ruata e si siạ!”

¹⁴Sarangke i Mikha e nahumpạ u těngon Datu i Ahab, datu e nakiwal᷊o, ”Botonge iạ dingangu Ratu i Yosafat tamai měngalo soang Ramot arau walạ e?” ”Alo e!” angkuěng i Mikha. ”Tantu i Tuang sarungbe makaual᷊i. MAWU e sarung mẹ̌gěllịu kal᷊auntu si Tuang.”

¹⁵I Ahab simimbang, ”Kereu i kau mẹ̌bisara ringangku su arengu MAWU, paul᷊ịko kahěngang. Pira sul᷊e i kau harusẹ̌ takụ paul᷊ikangu hal᷊ẹ̌ ene?”

¹⁶ I Mikha němal᷊isẹ̌, ”Iạ nakasilo sordadong Israel nẹ̌kal᷊iaesẹ̌ su wawul᷊urange. I sire mẹ̌sul᷊ungu domba tawẹ měndal᷊ukade, ringangu MAWU e mạanun sire u, ’I sire ini tawẹ apa měngangahạ e. Mapiawe i sire kapul᷊ẹ su pẹ̌darame.’ ”

¹⁷Bọu ene angkuěng i Ahab si Yosafat, ”Kahěngang bue waweraku arau ěng? Tawẹ běke i sie měněbal᷊u mapia waugu iạ! Měngkate apan dal᷊akisẹ̌ samatang!”

¹⁸I Mikha kapia saụ nẹ̌bera, ”Ini e raringihẹ̌ko apang kụ piněhengetangu MAWU! Iạ nakasilo MAWU mạiang su kal᷊aianengʼE su sorga, dingangu patikụ malạekatẹ̌ rụdarisị su rěduhʼE.

¹⁹MAWU nakiwal᷊o, ’I sai sarung měngologẹ̌ si Ahab tadeạu i sie mapulu tamai mẹ̌sekẹ kụ mairị su Ramot, su Gilead?’ Sasimbahu manga malạekatẹ̌ e mẹ̌tẹ̌tatěntang.

²⁰Pěngěnsueěnge siměpụ e rohkẹ̌ sěmbaụ. I sie nẹ̌těngkaraning MAWU kụ nẹ̌bera, ’Seng Iạ e sarung měngologẹ̌ si sie ’ ’Kereapa koạ e?’ MAWU e nakiwal᷊o.

²¹Rohkẹ̌ ene simimbang, ’Iạ hědon tamai kụ mapakariading kěbị nabing Ahab měmpẹ̌konti.’ MAWU e něhengetang, ’Kerene e koạ e, kụ i kau sarung makaologẹ̌ si sie.’ ”

²²Bọu ene i Mikha nẹ̌bera, ”Kutẹu, kawe seng ene nariadi! MAWU seng napakariading manga nabin Tuang nẹ̌konti si Tuang batụu MAWU seng něnantu waugu mapakaěnsạ u silakạ si Tuang!”

²³Tangú tamaị e Nabi Zedekia nẹ̌těngkaraning Mikha wọu e němeru ghatine ringangu nẹ̌bera, ”Mariadiwe kereapa kụ Rohkẹ̌ u MAWU maněntangu iạ mase mẹ̌bisara si kau?”

²⁴I Mikha simimbang, ”Hědo ikasilonu karal᷊ahẹ e su tempong i kau simuẹ̌ sarang kamarẹ̌ sěmbaụ kụ mẹ̌deạu mẹ̌kěmbuni!”

²⁵”Samẹko i sie!” angkuěngu Ratu i Ahab, ”dingangu wawạe i sie su anung Amon, těmbonangu soa, ringangu su anung mal᷊amben Sekẹ i Yoas.

²⁶Pěngoroko si sire apěnuẹ̌ i sie su ral᷊ungu tahungkụ, dingangu apakaěng mase apěnginung pẹ̌kadodọ sarang iạ mawal᷊ị kapia kụ masal᷊amatẹ̌.”

²⁷Angkuěng i Mikha, ”Kereu i Tuang masul᷊ewe kapia, ute mangal᷊ene MAWU e tawe mẹ̌bisara ringangku. Kụ kěbị apan nasongo sini e makoạbe sahidi.”

²⁸Bọu ene i Ahab datung Israel, dingangu i Yosafat datung Yehuda tamai něnekẹ soang Ramot su Gilead.

²⁹I Ahab nẹ̌bera si Yosafat, ”Iạ sarung hẹ̌dong mẹ̌těngkaunidẹ̌ kụ tumol᷊e mẹ̌sekẹ dingang, arawe wadang ene měngkate pěluheng pakeangu kasěllahengu.” Kerene ratung Israel nẹ̌těngkaunidẹ̌ piạ tamai nẹ̌sekẹ.

³⁰Su tempo ene manga mol᷊ensekẹ u karetan sekẹ u Siria e seng nioron datune mědeạu pianẹ e pěnekẹ datung Israel.

³¹Kụ piạ i sire nakasilo Ratu i Yosafat, i sire kěbị mạngiral᷊ing u i sie kai ratung Israel. Ual᷊ingu ene i sire nẹ̌tibulu si sie. Kaiso i Yosafat e nẹ̌bansagẹ̌, kụ MAWU Ruata e nẹ̌tul᷊ung i sie, bọu e němal᷊eohẹ̌ pẹ̌nanekẹ ene nitimona tampạ bal᷊ine.

³²Piạ e manga mol᷊ensekẹ wuntuangu karetan sekẹ bọu Siria nakahěngangke u ene wal᷊inewe ratung Israel, i sire něngědo nẹ̌tatibulu si sie.

³³Nẹ̌sarětạ u sěngkatau sordadong Siria naparal᷊engu horom papitị e kụ tawe pinakatuntụ su timonane nasahẹ. Kaiso horom papitị e nahino si Ahab kụ timěpasẹ̌ sarang pẹ̌sěmakengu pakeangu pẹ̌seketange. ”Nikahinoěnge iạ!” angkuěng i Ahab su měngangul᷊ing karetane, ”Putarẹ̌ko ringangu wawako iạ apasěbang bọu pẹ̌seketang!”

³⁴Kaiso ual᷊ingu pẹ̌sasekẹ kawe wědang kararamasagẹ̌, tangú Ratu i Ahab těbe rụdarisị apidu tẹ̌tuilang su ral᷊ungu karetane tụtatěngo sordadong Siria. Su tempong matangěllo simědạ tangu i sie napohong.