Read Sangir KARARATUANG KARUANE 19 Bible Online

KARARATUANG KARUANE 19 - Sangir bible

KARARATUANG KARUANE 19

¹Sarangke i Yosafat datung Yehuda nasul᷊e kapia tạ konsange apa su istana su Yerusalem,

²sěngkatau nabi isẹ̌sẹ̌bạ si Yehu anạ i Hanani riměnta nẹ̌těngon datu. Angkuěngu nabi ene si sie, ”Nihino ngae i Tuang mẹ̌tul᷊ungu taumata ral᷊akisẹ̌ kụ měnumběka su taumata mẹ̌bẹ̌binsị u MAWU? Kakanoạ i Tuang ene makawodaị dal᷊angehu MAWU e si Tuang.

³Maningbe kerene piạbe lai mapiane si Tuang. I Tuang seng nakarěmmẹ kal᷊awọu tul᷊adang duata wawine i Asyera kụ sẹ̌sẹ̌mbaěngu kawanua ringangu i Tuang selaing nẹ̌tawakal᷊i mědeạu mẹ̌biahẹ̌ tuhụ kapulun Duata.”

⁴Datu i Yosafat mẹ̌tẹ̌tanạ su Yerusalem. Kaiso i sie kạdingạ mẹ̌tẹ̌tiwo kawanua su kaguwạu wanua waugu měmahansang si sire pẹ̌bal᷊ị sol᷊ong anung MAWU, Ruatang upung i sire.

⁵Suapan soa piạ těndạ e watu su Yehuda i sie něhengkẹ manga mělahukung,

⁶dingangu něngonggọu tita ini si sire, ”Pẹ̌koạbe pakapelesa, batụu i kamene měhukunge kai wal᷊inewe su arengu taumata kaiso kawe arengu MAWU. I Sie měnẹ̌nahimata si kamene su tempong i kamene němutusẹ̌ pěrkara.

⁷I kamene harusẹ̌ matakụ su MAWU, dingangu mẹ̌kakanoạ pakaingatẹ̌ bue, batụu MAWU Ruatang kitẹ e mẹ̌bẹ̌binsị u taumata maakal᷊ẹ̌, kụ mạběhạ su sěmběka arau měnẹ̌narimạ sasorokẹ̌.”

⁸Kerene lai su Yerusalem, i Yosafat něhengkẹ u manga mělahukung bọu ghal᷊ipohon tau Lewi, manga imang dingangu manga těmbonangu kawanua. I sire harusẹ̌ měmutusẹ̌ kal᷊awọu pěrkarang pěndal᷊ampa Toratu MAWU ringangkewelaing manga pěrkara wal᷊ine.

⁹Baugu manga mělahukung ene i Yosafat něngonggọu parenta ini, ”Pěndal᷊engko munaranu ringangu tatuhụ su MAWU. Tuhukeko titanʼE su ral᷊ungu kal᷊awọu haghi kinoạ i kamene.

¹⁰Kereu manga ringangu wọu soa wal᷊ine měngalakẹ̌ u pěrěkarang papate si kau, pěndal᷊ampa tita arau tawe tumatuhụ ondang-ondang, ute karimạko i kamene měngonggọu tatualagẹ̌ si sire. Ual᷊ingu kerene i sire tawẹ sal᷊ane su MAWU, ringangu MAWU tawe sarung lumangehẹ̌ si kau arau si sire. Dal᷊engko tita ini, tangú i kamene sarung tawe mẹ̌sal᷊a.

¹¹Imang Mawantugẹ̌ i Amarya takụ gěllirangu kawasa karangetange waugu patikụ apang piạ kal᷊ahěmpukange ringangu kal᷊awọu titang agama. I Zebaja anạ i Ismael, pěturu Yehuda, takụ gěllirangu kawasa karangetange waugu kal᷊awọu pěrkara wal᷊ine. Tau Lewi hinong měndiagạ pakapia tadeạu apam putusangu pěngadilang iral᷊eng. Tol᷊ei wue kal᷊awọu tiahane ini ringangu pẹ̌karadiahangke pakasahẹ. Karimạko MAWU e mahundingangu taumata kụ adilẹ̌!”