Read Sangir KARARATUANG KARUANE 2 Bible Online

KARARATUANG KARUANE 2 - Sangir bible

KARARATUANG KARUANE 2

¹Datu i Salomo seng němutusu měmangung Bal᷊em MAWU, ringangu istana sěmbaụ baugu watangenge.

²Baugu ene i sie napasěbangu 70.000 su kataune mělahuwo kakoạ, 80.000 su kataune měmamakange watu su wawul᷊urange ringangu mandorẹ̌ 3.600 su kataune měndariagạ manga mělahal᷊ẹ̌.

³I Salomo něndingọ u habarẹ̌ ini e si Hiram datun Tirus, ”Mapia i Tuang pẹ̌koạko hěmpụ u ragang dingangku kerẹewe ringang i Daud i amangku. I Tuang seng nẹ̌bal᷊ụ u kalun cěmarang Libanon si sie waugu apěmětị istanane.

⁴Ini e iạ mapulu měmětị bal᷊eng pẹ̌kakal᷊iomanengang sěmbaụ kụ itani waugu měngadatẹ̌ MAWU Ruataku. Su wal᷊e ene iạ dingangu kawanuaku e sarung mẹ̌tahamawu si Sie ringangu měnutung buwụ sasěmba wěngi, ringangu maněmbang borotẹ̌ sẹ̌sadiaěng baugi Sie sěntiniạ. Su wal᷊e ene lai i kami sarung maněmbang sasěmba tẹ̌tutungang apang kamal᷊ukadẹ̌ dingangu apang kal᷊ahěbi, apang ěllon Sabatẹ̌, su ěllo masaria ěllong Bul᷊ang Buhu ringangkewen su ěllo nitilakehẹ̌ bal᷊ine mědeạu měngadatẹ̌ MAWU Ruatang kami. U i Sie seng nẹ̌parenta tadeạu hal᷊ẹ̌ ene koatengbe sarang marěngụ-děngụ kahian tau Israel.

⁵Iạ e mapulu tadeạu Wal᷊em MAWU kụ sarung takụ pětikang e kai makoạbe wal᷊e mawantugẹ̌, batụu Ruatang kami e kai limembong kawantuge wọu ruatạewe lai sude.

⁶ Kaiso tumuhụ hinone tawẹu sarang sěngkatau makaumal᷊ẹ̌ měndarisị u wal᷊e waugu Ruata, u patikụ binangaeng masaria e tawe mẹ̌kiong mědeạu katanakengʼE. Kụ tangú Wal᷊em MAWU kụ pětikangku ene e aramanung tumbạeng makoạ tampạ u pěnanutungang buwụ baugu Ruata.

⁷Ual᷊ingu ene, mapiawe i Tuang pěndingọ u sěngkatau tahaketạ dingangu tahawěmbing bul᷊aeng, sal᷊aka, tambaga laụ u timběha, uase, ringangu tahakahiwuang hekạ birụ, kamumụ dingangu mahamụ si kami. I sie hědong sěngkapěhal᷊ẹ̌ dingangu apang tahamunara su Yehuda ringangu Yerusalem kụ seng pinileng amangku e i Daud.

⁸Iạ e masingkạ u apan tahapěngundangeng su wanuang Tuange kụ ual᷊ingu ene mapiawe i Tuang pěndingọ u haghing kalun cěmara ringangu kalun cěndana wọu Libanon si siạ. Iạ hědo mapasěbangu kal᷊awọu taumataku ipẹ̌sumbala taumatan Tuang,

⁹tadeạu i sire pěndiahi kalu pakatimu. U Wal᷊em MAWU kụ takụ pětikang e kai harusẹ̌ masaria ringangu maholẹ.

¹⁰Baugu manga wiahu taumatan Tuang e hědo takụ dingotang si Tuang gandung haghine rarua, sěmbaụ-sěmbaụ e 2.000 su toěnge, anggorẹ̌ kakěpal᷊eweng 400.000 su litere, ringangu lanan zaitun 400.000 su litere.”

¹¹Bawal᷊isẹ̌ suratu Ratu i Salomo e, Ratu i Hiram něndingọ u suratẹ̌ bawerane kere ini, ”Ual᷊ingu MAWU e kụkěndagu taumatanʼE, ute i Sie něhengkẹ i Tuang nakoạ datun sire.

¹²Měngkai rẹ̌daloěng MAWU, Ruatang Israel, Měndariadi langị dingangu runia! I Sie něngonggọu sěngkatau ahusẹ̌ si Daud kụ enẹ e pelesa ringangu matahuěnna, ringangu piạ kasingkạ e, kụ orasẹ̌ ini e kapẹ̌tẹ̌tawakal᷊ine měndarisị u wal᷊e sěmbaụ baugu MAWU ringangu istana sěmbaụ waugʼi sie.

¹³Dingangkeweng ini lai e ute iạ měndingọ u sěngkatau masingkạ mauwuhẹ̌ dingangu masal᷊ikodẹ, arenge i Huram baugu Tuang.

¹⁴I ninange wọu hěnton Dan, i amange tau Tirus. I sie pande mẹ̌koạ apal᷊iwụ, běmbingang bọu wul᷊aeng, sal᷊aka, tambaga laụ u timběha, uase, ringangu koateng bọu watu ringangu kalu. I sie wotonge mẹ̌koạ hekạ birụ, kamumụ, mahamụ dingangu l᷊ai hekạ leneng. Kal᷊awọu haghing hal᷊ẹ̌ u pakang, ikakoạ tuhụewe modelẹ̌ e walạewe měnsang apa ghẹ̌gausang. Mapiawe i sie ipěhal᷊ẹ̌ kere mělahalẹ̌ i Tuang, dingangu mẹ̌sul᷊ungu lai mělahal᷊ẹ̌ u Ratu i Daud i amang i Tuang.

¹⁵I kami e měngẹ̌ngampal᷊ẹ̌ dingọ gandung haghine rarua, anggorẹ̌ dingangu lanan zaitun kụ niriandin Tuang ene.

¹⁶I kami e hědo měnuwang kalun cěmara wọu wawul᷊urangu Libanon kal᷊awọeweng gẹ̌gausang i Tuang, bọu e taghal᷊ẹ̌ ikitang pakakoạ hakị, kụ ipakaonodẹ̌ sarang laudẹ̌ midatingu Yope. Wọu pai ene tangú i Tuang makapěhuwo sarang Yerusalem.”

¹⁷Ratu i Salomo něndol᷊ẹ̌eng kal᷊awọu tau raghị kụ měmpẹ̌tẹ̌tanạ su Israel, kere nạung seng nikoạ u Ratu i Daud i amange. Nal᷊ahẹu kai nạung 153.600 su kataune taumata raghị e.

¹⁸Pitum pul᷊o su hiwune wọʼi sire piněhal᷊ẹ̌ e waugu manga kakoạ bal᷊e ene, 80.000 su kataune piněmakang batu su wawul᷊urange ringangu 3.600 su kataune waugu piněnahimata ore lai masingkạ u munara ene.