Read Sangir KARARATUANG KARUANE 20 Bible Online

KARARATUANG KARUANE 20 - Sangir bible

KARARATUANG KARUANE 20

¹Pira-pira tempo tuhụ e sordadong Moab dingangu Amon, sěngkaral᷊eng dingangu manga hapị i sire sordadong Meunim, něnekẹ Yehuda.

²Tangú narěntạ e tau nẹ̌bawa habarẹ̌ ini su Ratu i Yosafat, ”Mal᷊awọ kahěngang sordadong Edom kụ seng narěnta wọu sěmběkang Laudẹ̌ Nate waugu mẹ̌tibulu si Tuang. I sire seng nakapul᷊aho Hazezon-Tamar.” (Hazezon-Tamar ute kai sasunggahị u En-Gedi.)

³I Yosafat natakụ kụ bọu ene i sie nẹ̌kal᷊iomaneng nẹ̌dorong pělal᷊ahẹ u MAWU. Bọu ene i sie nẹ̌parenta sěnaung kakěpal᷊u kawanua pẹ̌pẹ̌puasa.

⁴Bọu apan soa su Yehuda taumata tamai sarang Yerusalem mědeạu mẹ̌dorong tul᷊ung su MAWU.

⁵I sire sěngkasio ringangu tumanạ u Yerusalem nẹ̌tampung su rělahẹ̌ buhu su těngong Bal᷊em MAWU. Datu i Yosafat dimarisị su těngon sire,

⁶ringangu nẹ̌kal᷊iomaneng u tingihe maihạ, ”O MAWU Ruata i upung i kami! I Mal᷊ambe Ruata su sorga kụ nẹ̌parenta su patikụ bansa su dunia. I Kau e kawasa ringangu matoghasẹ̌; tawẹ u sarang sěngkatau kụ makaumal᷊ẹ̌ dumokạ si Kau.

⁷ Seng i Kau e Ruatang kami. Piạ e umatʼU, tau Israel kụ diměnta su wanua ini, i Kau něnokol᷊ẹ̌ taumata apan su tempo ene měngkạtanạ sini. Mase i Kau nẹ̌gěllịu wanua ini su hiteng Abraham, hapịʼU, baugu makoạ ěntana tataghuaneng i sire sarang marěngụ-děngụ.

⁸I sire seng natanạ sini kụ němětị bal᷊e sěmbaụ tampạ u mẹ̌tahamawu si Kau. I sire masingkạ

⁹u kereu i sire makahombang hukumang ual᷊ingu kal᷊awọu rosan sire, dingangu i sire nihombangengu pẹ̌sasekẹ, sahindạ arau karal᷊unusẹ̌, i sire nakakarěnta su anunʼU dingangu rimarisị su těngong Bal᷊em MAWU ini. Su ral᷊ungu kasasěsẹ i sire, i sire nakapẹ̌kal᷊iomaneng si Kau, dingangu i Kau sarung dumaringihẹ̌ kụ mẹ̌tul᷊ung i sire.

¹⁰ Orasẹ̌ ini tau Amon, Moab dingangu Edom něnekẹ si kami. Su tempong i upung i kami narěnta wọu Misirẹ̌, i Kau tawe napakawalan sire nakakaiang su wanuang manga wansa ene. Tangú i upung i kami rimal᷊eng nělikụ kụ tawe napakawinasang tau Amon, Moab dingangu Edom ene.

¹¹Ini tangú kere ini kakanoạ u manga wansa ene si kami. Ini i sire mapulu měnokol᷊i kami wọu wanua kụ nighěllịʼU si kami.

¹²Seng i Kau e Ruatang kami! Hukungke i sire, batụu i kami ini e tawe makakoạ apa tumatěngo sordado mal᷊awọ ene, kụ mapulu měngalo si kami. I kami wěgawue měnsang mẹ̌koạ e apa, ual᷊ingu ene i kami riměnta su anunʼU mẹ̌dorong tul᷊ung.”

¹³Těntal᷊ang ene patikụ manga esẹ u Yehuda ringangu manga kawing arau anạ i sire kạpahundarisị e su Wal᷊em MAWU.

¹⁴Su tal᷊oaran taumata l᷊awọ ene piạ tau Lewi sěngkatau arenge i Yahaziel. I sie anạ i Zakharia wọu ghal᷊ipohong Asaf su ral᷊ungu wěhị u pal᷊ahiteʼm Benaya, i Yeiel, i Matanya. Su tempo ene i Yahaziel pinẹ̌kawasaěngu Rohkẹ̌ u MAWU,

¹⁵ kụ i sie nẹ̌bera, ”Lẹ̌adateng Mawantugẹ̌ ore manga anạ u sěngkatau patikụ. MAWU něhengetang u i kamene tawe wotonge měngkapěndụ arau matakụ tumatěngo sordado maěnasẹ̌ ene. U mẹ̌sasekẹ e wal᷊inewe i kamene, kaiso kawe Ruata.

¹⁶Diěllo su tempong i sire sumaka wọu ral᷊eng masaka su Zis, seketẹ e i sire. I kamene sarung mẹ̌těngon sire su pondol᷊u wal᷊ane su těngong ngara l᷊inggi maraning Yeruel.

¹⁷I kamene tawahal᷊uasu mẹ̌papate su pẹ̌seketang ini. Tamaị e sarang tampạ kụ seng tinantu waugi kamene kụ měngkate pěngampal᷊ẹ̌ sene. I kamene sarung makasilo MAWU měngonggọu kal᷊auntu si kamene! Ei tumanạ u Yehuda ringangu Yerusalem, kumbahangbe kumal᷊insọ arau matakụ. Měngkate suěke pẹ̌seketang ene, MAWU e sarung mẹ̌tul᷊ung i kamene!”

¹⁸Tangú nẹ̌subạ e Ratu i Yosafat. Kal᷊awọu anạ u wanua natol᷊e lai si sie nẹ̌suba naněmba MAWU.

¹⁹Mase tau Lewi wọu ghal᷊ipohong Kehat dingangi Korah dimarisị, kụ měmpẹ̌gẹ̌gio mẹ̌dalo MAWU, Ruatang Israel.

²⁰Sěngkarịěllone mal᷊uka-l᷊ukadẹ̌, kawanua nahunsěbang kụ dimal᷊eng sarang ngara l᷊inggi su rěduhu Tekoa. Piạ i sire němpahundal᷊eng i Yosafat timanata kere ini si sire, ”Kawanuang Yehuda ringangu Yerusalem! Pangimangke su MAWU Ruatanu, tangú i kamene sarung makaumal᷊ẹ̌ mẹ̌dararagẹ̌. Tarimạ e sasasang manga nabinu, kụ i kamene sarung piạ ual᷊ine!”

²¹Sarangke wọu nẹ̌dal᷊ahintau ringangu kawanua, datu e něngoro sampri pẹ̌pẹ̌pakẹ u pakeang i sire mẹ̌sul᷊ung kere wiasane lẹ̌luheěng su tempong piạ manga komol᷊angu jamaatẹ̌. Sampri ene harusẹ̌ apẹ̌tente pakapia su těngong barisangu sordado kapẹ̌kẹ̌kantarị e, ”Pẹ̌dalo MAWU! KakěndagʼE sarang marěngụ-děngụ!”

²²Su tempong sampri ene nanětạ e nẹ̌giong kantarị, MAWU nẹ̌koạ e pẹ̌sasilontahẹ̌ su tal᷊oarang manga sordadon sědụ kụ kạpẹ̌ngalone.

²³Sordadong Amon dingangu Moab něngalo sordadong Edom kụ nipakagholọ marasai. Bọu ene i sire nẹ̌sul᷊e něnekẹ sěmbaụ su wal᷊ine tawẹ sihinge.

²⁴Piạ e sordadong Yehuda sarang měnara pěndal᷊ukadeng su ngara l᷊inggi ringangu kapạnitịe tampạ u sědụ, i sire nakasilo manga maietu sědụ nẹ̌sal᷊iawuhẹ̌ su ěntana. Tawẹu sarang sěngkatau wọu sordadon sekẹ ene reng biahẹ̌.

²⁵Tangú i Yosafat dingangu tumatuhụ e tamai něhampasẹ̌ manga apal᷊iwụ u sědụ. I sire nakaěbạ binatang lahikinang mal᷊awọ, pakakasẹ̌, manga pakeang, dingangu mangạewe barang maral᷊ěgadẹ̌ bal᷊ine. Bọuten něngomolẹ̌ patikụ ene karěngụ u těllu ěllo, bědang lai mal᷊awọ apal᷊iwụ bal᷊ine, katewe hakịu natěntang.

²⁶Su ěllo kaěpạ e i sire kěbị nẹ̌tampung su Wal᷊an Daralo kụ nẹ̌dalo MAWU baugu kěbị apang nikoạʼE. Kai ene sěbapẹ̌ e wal᷊ane ene nisěbạ ”Daralo”.

²⁷Bọu ene i Yosafat něngahạ kal᷊awọu wuntuang kụ napul᷊ẹ sarang Yerusalem dingangu ral᷊uasẹ̌ ual᷊ingu MAWU seng němatạ sědụ i sire.

²⁸Piạ e nahumpạ su soa, i sire nẹ̌barisẹ̌ sol᷊ong Bal᷊em MAWU piạ nalange kěcapi ringangu slompretẹ̌.

²⁹Patikụ něgara wal᷊ine měngkạtakụ mạeng makaringihẹ̌ kakakoạ u MAWU e namatạ manga sědụ u Israel.

³⁰Kai ual᷊ingu ene hakịu i Yosafat nẹ̌parentawe ringangu mal᷊enehẹ̌ kụ MAWU e timal᷊ěntụben sie kụ kasěllahu wanua e maghighilẹ̌ bue.

³¹I Yosafat nakoạ datung Yehuda umure 35 su taunge, kụ i sie nẹ̌parenta su Yerusalem, duam pul᷊o l᷊ima su taunge karěngụ e. I ninange ute i Azuba anạ i Silhi.

³²Mẹ̌sul᷊ungu i Asa i amange, i Yosafat nẹ̌koạbe mapia su silong matang MAWU.

³³Arawe kal᷊awọu tampạ u pěnaněmbaěng mahang duata e tawe nigholange. Kawanua e mal᷊aing bědang tawe natinalung naung i sire mẹ̌tahamawu su Ruatang i upung i sire.

³⁴Wẹ̌kene wal᷊ine mạanung Yosafat, bọu panětakenge sarang pěngěnsueěngu pẹ̌paparentane, niwohẹ su ral᷊ungu Wěken Yehu Anạ i Hanani, kạdal᷊urang su ral᷊ungu bukẹ̌ u Wěkem Mararatung Israel.

³⁵Piạ sěnsul᷊e tempo i Yosafat datung Yehuda nẹ̌koạ kal᷊ahěmpukangu pẹ̌dal᷊ahapị dingang i Ahazia ratung Israel, kụ nẹ̌koạ karal᷊amuhụ lawọ.

³⁶Su pěmamal᷊angoěngu Ezion-Geber i sire nẹ̌koạ manga kapal᷊ẹ̌ mědeạu pẹ̌senggọ sarang Tarsis.

³⁷Arawe Nabi i Eliezer anạ i Dodawa wọu soang Maresa něgěllịu laingatẹ̌ si Yosafat, angkuěnge, ”Ual᷊ingu i Tuang nẹ̌koạ kal᷊ahěmpukangu pẹ̌dal᷊ahapị dingang i Ahazia, MAWU sarung mapakagholọ u munaran Tuang.” Tangú nagholangke manga kapal᷊ẹ̌ nikoạ e hakịu tawe nakapẹ̌sakaeng marihutu.