Read Sangir KARARATUANG KARUANE 21 Bible Online

KARARATUANG KARUANE 21 - Sangir bible

KARARATUANG KARUANE 21

¹I Yosafat naněntang u dunia kụ nilěbing su pěndal᷊ěbingangu mararatu su Soan Daud. I Yehoram ahuse naratu něngaweng si sie.

²I Yehoram ahusʼi Yosafat, datung Yehuda, piạ anạ u sěngkataune manga esẹ i sire ěnnung: i Azarya, i Yehiel, i Zakharia, i Azariahu, i Mikhail, dingangu i Sefaca.

³I sire nakaěbạ bul᷊aeng mal᷊awọ, sal᷊aka ringangu apal᷊iwụ maarěga lai wal᷊ine wọʼi amang i sire, ringangu sěngkatau-sěngkatau mal᷊aing nionggotangu soa sěmbaụ piạ těndạ e su Yehuda. Kaiso ual᷊ingu i Yehoram ahuse i akang, seng i sie nạung tinantun Yosafat baugu mahengkẹ datu.

⁴Piạ e i Yehoram nakapěndangu kal᷊aianenge kere sěngkatau ratu e seng matoghasẹ̌, tangú i sie něngoro piněmate manga anạ u sěngkataune, ringangu lai mapapangkatẹ̌ marangẹ pira-pirang katau.

⁵I Yehoram nakoạ datu umbure těllum pul᷊o dua su taunge ringangu i sie nẹ̌parenta su Yerusalem karěngụ u ual᷊u taung.

⁶I sie timol᷊e kakakoạ u pẹ̌bawiahu Ratu i Ahab dingangu manga ratung Israelẹ̌ bal᷊ine, ual᷊ingu i sie nẹ̌kawing dingangu sěngkatau wọu anạ i Ahab bawine. I sie nẹ̌dosa su MAWU,

⁷ kaiso MAWU e mạdiri mapakawinasang datu wọu hěnton Daud ual᷊ingu i Sie seng nẹ̌diandi u hěnton Daud sarung tatapẹ̌ mẹ̌parenta.

⁸ Su ral᷊ungu parentan Yehoram, i Edom nẹ̌pahuwungkadẹ̌ su těngon Yehuda kụ němangung kararatuange hala.

⁹Ual᷊ingu ene i Yehoram dingangu manga mol᷊ensekẹ e nahunsěbang dingangu manga karetan sekẹ e bọu ene něngalo Edom. I sie nital᷊iwungang u wuntuangu Edom, kaiso nahěbi i sire nakal᷊ěsọ bọu pěnanal᷊iwungu sědụ apidu nakatal᷊ang.

¹⁰Bọu tempo ene i Edom tawe lai nẹ̌samal᷊ẹ su Yehuda. Su tempo ene lai soang Libna mal᷊aing němpěnggohaeng. Kěbị ene nariadi ual᷊ingu i Yehoram seng naněntangu MAWU, Ruata kụ seng nisěmbang upunge.

¹¹I sie pundangu namětị manga tampạ u pẹ̌sasubaěng su mahang duata su wawul᷊urangu Yehuda, kụ makạbodaị kawanuang Yehuda ringangu Yerusalem nẹ̌dosa su MAWU.

¹²Bọu e Yehoram nakahombang suratẹ̌ sěmbaụ kụ niwohẹ u Nabi i Elia piạ i sie rem bědang biahẹ̌. Kere ini waweran suratẹ̌ ene, ”MAWU, Ruata kụ isẹ̌sẹ̌mban Daud, něhukung i Tuang batụu i Tuang tawe timol᷊e ěnnạ u laedʼi amang dingangu i upung i Tuang.

¹³Su sěmběkane i Tuang nẹ̌biahẹ̌ kere manga ratung Israel, dingangu nakawodaị kawanuang Yehuda ringangu Yerusalem kawe tawẹ satiane su Ruata. I Tuang nẹ̌koạ kere Ratu i Ahab dingangu apang němpangaweng si sie. I Tuang pundangu němate manga anạ u sěngkataun Tuang, sěmbal᷊iau i sire limembong kapiane wọʼi Tuang.

¹⁴Hukumang mawěhạ bọu MAWU e sarung ipakatuhung su kawanua, manga anạ dingangu manga kawing i Tuang, dingangu mapakawinasang kal᷊awọu arětạ tataghuaneng i Tuang.

¹⁵I Tuang hala mal᷊aing masakị su tinai kụ kakạděngụe kakạtědụe!”

¹⁶Su tempo ene piạ tau Pilistin dingangu tau Arabẹ̌ kụ mạtanạ su rěduhu pẹ̌tatanakengu tau Sudan su wiwihu apeng. MAWU e měngẹ̌nganoạ naung i sire ene waugu měnekẹ Yehoram.

¹⁷I sire něnekẹ Yehuda, němul᷊aho istanan datu, mase nẹ̌tangehẹ̌ kal᷊awọu anạ dingangu kawing i Yehoram kere tinaweng, tabeạu katewe i Ahazia ahuse katuariange.

¹⁸Samuring kal᷊awọu karariadi ene, MAWU něhukung i Yehoram nasakị su tinai kụ tawe nul᷊e.

¹⁹Maranin dua taung sakị ene mangkeng kakạtědụ e sarang pěngěnsueěnge apạ e matědụ-tědụ kụ i sie nate e. Kawanuane tawe napakahuneng putung kere pělal᷊ahẹu mělẹ̌lutu kere nạung kẹ̌koateng i sire waugu i upung i sire.

²⁰Tawẹ u sarang sěngkatau kụ mẹ̌sẹ̌sasěsilu papatene. I sie nilěbing su Soan Daud, kaiso wal᷊inewe su ral᷊ungu pěndal᷊ěbingangu mararatu. Su tempon nakoa datu, i Yehoram umbure 32 su taunge, kụ i sie nẹ̌parenta su Yerusalem ual᷊u taung karěngụ e.