Read Sangir KARARATUANG KARUANE 22 Bible Online

KARARATUANG KARUANE 22 - Sangir bible

KARARATUANG KARUANE 22

¹Su ral᷊ungu pěngangalong sěnggopol᷊angu tau Arabẹ̌, kal᷊awọu ahusʼi Yehoram, tabeạu katewe i Ahazia rariọ katuariange kinapate. Ual᷊ingu ene tumanạ u Yerusalem něhengkẹ i Ahazia nakoạ datu piněngaweng si amange.

²I Ahazia nakoạ datu su tempong umbure 22 su taunge,[11] ringangu i sie nẹ̌parenta su Yerusalem karěngụ u sěntaung. I Ahazia mal᷊aing nẹ̌biahẹ̌ kere anạu sěngkataun Datu i Ahab, ual᷊ingu i Atalya i ninange mạněntirong ene apẹ̌kẹ̌koạ dal᷊akisẹ̌. I Atalya ute kai sangiang ahusu Ratu i Ahab, pulung i Omri ratung Israel.

⁴I Ahazia nẹ̌dosa su MAWU kere walagʼi Ahab, ual᷊ingu kawe seng i sire nakoạ měnanal᷊ěntihọ e samuring amange naněntangu dunia. Manga měnanasane ene e kụ mapakasilakạ i sie.

⁵Ual᷊ingu pěnanasang sire, tangú i sie nẹ̌těngkal᷊aụ dingang i Yoram datung Israel mědeạu mẹ̌sekẹ dumokạ si Hazael datun Siria. I sire nẹ̌sekẹ su Ramot, banuang Gilead. I Yoram nal᷊esẹ su pẹ̌seketang ene,

⁶bọu e i sie nẹ̌sul᷊e sarang soang Yisreel mẹ̌deạu undangeng, kụ i Ahazia tamai rimal᷊inge si sie paị sene.

⁷Duata seng nělahẹ u i Ahazia sarung masue singongone mạeng i sie mẹ̌tiwo si Yoram. Su pẹ̌tatiwo ene i Ahazia ringangu i Yoram nakahombang sasukung bọu sěngkatau esẹ arenge i Yehu anạ i Nimsi, kụ seng nipilen MAWU waugu mapakawinasang balagu Ratu i Ahab.

⁸Těntal᷊ang i Yehu mẹ̌děndal᷊engu hukumang u MAWU waugu walagẹ̌ ene, i sie nẹ̌sombang u manga těmbonangu Yehuda sěnggapaeng dingangu manga ral᷊engu manga anạ si Ahazia kụ němpahuntol᷊e su ral᷊ungu pẹ̌tatiwo ene. Tangú i Yehu němate si sire kěbị.

⁹Bọu ene i sie něndolohu taumata pẹ̌deạ si Ahazia kụ tempo ene kapẹ̌kẹ̌kěmbunine su Samaria. Sarangke i Ahazia kinaěbakeng, i sie niwawa su anun Yehu kụ nipate. Maningbe kerene i sie mal᷊aing nilěbing i sire ual᷊ingu i sire mạngadatẹ̌ Datu i Yosafat, i tetẹ e kụ měmẹ̌munara waugu MAWU ringangu kạguwạu ral᷊ungu naung. Bọu walagʼi Ahazia tawẹ apa kụ deng makaumal᷊ẹ̌ měngal᷊uang paparentaěng.

¹⁰Piạ i Atalya masingkạ u Ratu i Ahazia ahuse nạung seng napohong, i sie něngoro tadeạu patikụ apam balagu ratu su Yehuda e pakipate.

¹¹I Ahazia piạ bawinene sěngkatau arenge i Yoseba nẹ̌kawingu sěngkatau imang arenge i Yoyada. Dingangu marěmasẹ̌ i Yoseba něngal᷊ạ ahusʼi Ahazia sěngkatau arenge i Yoas bọu tal᷊oarang manga anạ u ratu kụ sarung pateěng i Atalya. Anạ ene ringangu mẹ̌tatahanạ e niwunine su ral᷊ungu kamarẹ̌ sěmbaụ su Wal᷊em MAWU. Kerene i Yoseba něngambang dariọ ene hakịu tawe nipateng Atalia.

¹²Ěnnungu taung karěngụ e i Yoas niwuni su Wal᷊em MAWU těntal᷊ang i Atalya nakoạ datu wawine.