Read Sangir KARARATUANG KARUANE 23 Bible Online

KARARATUANG KARUANE 23 - Sangir bible

KARARATUANG KARUANE 23

¹Su taung kapitune Imang Yoyada němutusu waugu kumanoạ. Iạ mẹ̌taingu kasasěmbaụ u tingirang dingangu manga pěrwira i sire lima, kụ i Azarya, anạ i Yeroham, Ismael anạ i Yohanan, Azarya anạ i Obed, i Maaseya anạ i Adaya, ringangu i Elisafat anạ i Zikhri.

²I sire nakoạ sarang kěbị soa su Yehuda, ringangu něnampungu tau Lewi ringangu kal᷊awọu těmbonangu ghal᷊ipoho, wọu ene nẹ̌bawa si sire sarang Yerusalem.

³ I sire nẹ̌tampung su Wal᷊em MAWU, ringangu nẹ̌taingu pẹ̌kakakědo ringang i Yoas, ahusu ratu ene. I Yoyada nẹ̌bera si sire, ”Seng ini e ahusu wahakạ u Ratu i Ahazia! I sie orasẹ̌ ini e harusẹ̌be mahengkẹ datu, u MAWU e seng nẹ̌diandi u hěnton Datu i Daud sarungbe těbe mẹ̌pẹ̌parenta.

⁴Seng ini e harusẹ̌ koateng i kitẹ: Kereu manga imang dingangu tau Lewi masueng munarane su ěllon Sabatẹ̌, i sire tawe wotonge mapul᷊ẹ. Sěngkatěllung kawahageanenge wọʼi sire harusẹ̌ tumol᷊e měndiagạ manga tukadu pasěllangeng u Wal᷊em MAWU,

⁵sěngkatěllung kawahageanenge lai su istanan datu ringangu lembone su Tukadu Pasěllangeng u Wal᷊ane. Kal᷊awọu kawanua e harusẹ̌ mẹ̌tampung su rěllahu Wal᷊em MAWU.

⁶Tawẹu sarang sěngkatau wotonge makakasuẹ̌ u ghodoěngu Wal᷊em MAWU tabeạu katewe manga imang dingangu tau Lewi kụ bědang kapěmẹ̌munarane. I sire wotonge makakasuẹ̌ batụu i sire nihae waugu MAWU. Taumata wal᷊ine harusẹ̌ matuhụ su manga pělatorangu MAWU ringangu katanạ su l᷊ikude.

⁷Tau Lewi harusẹ̌ pahundarisị pělikụ datu ringangu pedane wọu niasa, kụ pělukadẹ̌ si sie waẹbe sarang apa. I saing mẹ̌tawakal᷊i sumuẹ̌ su Wal᷊em MAWU, harusẹ̌ pateěng.”

⁸Parentan Yoyada ene nikoạ u tau Lewi ringangu kawanuang Yehuda. Taumata apang masueng hal᷊ẹ̌ e su ěllon Sabatẹ̌ tawe wotonge mapul᷊ẹ. Tangú apang pěrwira e wotonge mapẹ̌tampung u taumata waebe apang seng nasueng hal᷊ẹ̌ e arau lai apan taumata kụ buhụ e riměnta waugu ipěhal᷊ẹ̌.

⁹Baugu manga pěrwira ene i Yoyada němahiạu wěngko ringangu kěllung tataghuanengu Ratu i Daud kụ niresọ su Wal᷊em MAWU.

¹⁰I Yoyada mal᷊aing naměllọu taumata kụ pedane kạsasawụ bọu homane su těngom Bal᷊em MAWU waugu ipěndiagạ datu.

¹¹Bọu ene i Yoyada něněbang i Yoas, kụ nilěngkanengu sakapetine su těmbọe, ringangu něnarakangu bukẹ̌ u Titan Duata si sie. Kerene i Yoas nihengkẹ nakoạ datu. Bọu ene Imang i Yoyada ringangu manga anạ e něněbohu lanang pěndal᷊anisẹ̌ si Yoas, bọu ene kal᷊awọu taumata němpẹ̌gio, ”Biahẹ̌ datu!”

¹²I Atalya nakaringihẹ̌ kawanua němpẹ̌gio němpaněnsomahẹ̌ datu. Dingangu masahawụ i sie nakoạ sarang Bal᷊em MAWU suapan taumata mal᷊awọ němpẹ̌tampung.

¹³I sie nakasilo ratu wuhu ene rụdarisị su tukadẹ̌ sasuěkang sarang Bal᷊em MAWU, suapang i sie ilanisẹ̌, nilikutangu manga pěrwira ringangu měnaniụ slompretẹ̌. Kal᷊awọu kawanua nẹ̌gion dal᷊uasẹ̌ kapělẹ̌hětene slompretẹ̌ dingangu apạeweng měnanalangu musikẹ̌ su Wal᷊em MAWU e mapakạdamẹeweng pěmamantugẹ̌ e ringangu manga pakakasu musikẹ̌ i sire. I Atalya měngkate kal᷊inso kụ něnggehẹewe pakeange ringangu nẹ̌kiạu, ”Tahakontiang! Tahakontiang!”

¹⁴I Yoyada tawe napakawalang Atalya nipate susěnaung Bal᷊em MAWU nal᷊ikụ e, kụ i sie nẹ̌bera su manga pěrwira, ”Bawạ e i sie pasěbang bọu pẹ̌tatenteng měndal᷊ukadẹ̌ e, patẹ e i sai-saing kụ mẹ̌tawakal᷊i měngambang si sie.”

¹⁵I sire něnamẹ si sie mase niwawa sarang istana. Sene i sie nipate su Tukadu Pasěllangeng u Kawal᷊o.

¹⁶Imang Yoyada němaringang su Ratu i Yoas dingangu kawanua sěngkaral᷊eng dingange nẹ̌koạ pẹ̌dariandi u i sire sarung makoạ umatʼu MAWU.

¹⁷Bọu ene i sire kěbị něngalo ringangu něndomba pananěmbang su Baal. Tampạu pěmamělloěng sasěmba e ringangu manga tul᷊ada niromba, kụ i Matan, Imang u Baal nipate su těngom manga pananěmbaěng ene.

¹⁸Bọu ene i Yoyada něngoro manga imang dingangu tau Lewi pẹ̌tẹ̌tangkuang hal᷊ẹ̌ su Wal᷊em MAWU tuhụewe pẹ̌gaghaghelaru hal᷊ẹ̌ kụ seng bọu nitantun Datu i Daud. I sire harusẹ̌ pẹ̌gẹ̌gěllịu sasěmba tẹ̌tutungange su MAWU — tumuhụewe kere su toratʼi Musa — piạ sal᷊iwange ringangu manga kakantarị kere seng niatorʼi Daud.

¹⁹Su manga tukadʼu pasěllangengu Wal᷊em MAWU, i Yoyada naměllọu měndal᷊ukadẹ̌ pẹ̌děndiagạ tadeạu taumata kụ tawe měněmba MAWU e kumbahang sumuẹ̌.

²⁰Apang pěrwira, manga těmbonangu kawanua, apang pěměrenta ringangu kal᷊awọu kawanua tụtol᷊e si Yoyada mapasilon Datu i Yoas bọu Wal᷊em MAWU sarang istana. I sire simuẹ̌ bọu tukadu pasěllangeng sahị kụ datu e naiang su wowong kaderang kararatuang.

²¹Patikụ kawanua e nahul᷊uasẹ̌, kụ soa e nal᷊enehe ringangu i Atalya e seng nipate.