Read Sangir KARARATUANG KARUANE 24 Bible Online

KARARATUANG KARUANE 24 - Sangir bible

KARARATUANG KARUANE 24

¹I Yoas umbure pitu taung su tempong i sie naratu su Yehuda, dingangu i sie nẹ̌parenta su Yerusalem 40 su taunge karěngụ e. I ninange isẹ̌sẹ̌bạ si Zibya wọu soang Bersyeba.

²Karěngụu Imang Yoyada reng biahẹ̌, i Yoas nẹ̌koạ kal᷊awọu haghing hal᷊ẹ̌ makạl᷊uasẹ̌ naungu MAWU.

³I Yoyada němile wawine ruang katau baugu kawing i Yoas, dingangu wọʼi sire i Yoas nakaěbạ anạ e manga esẹ dingangu wawine.

⁴Bọuten nẹ̌parenta riọ nararěnnạ, i Yoas němutusẹ̌ u měngul᷊ị Bal᷊em MAWU.

⁵Manga imang dingangu tau Lewi niorone apạkakoạ sarang kal᷊awọu kawanua su apan soa su Yehuda ringangu apěnẹ̌nampungu roitẹ̌ bọu patikụ kawanua baugu ipangul᷊ị Bal᷊em MAWU apan taung. I sie něngoro si sire pakasahawụ mẹ̌koạ munara ene, arawe tau Lewi e měngkate mẹ̌tẹ̌těngkal᷊ongge.

⁶ Ual᷊ingu ene tangú i sie nẹ̌kui su Imang Yoyada, pangahạ i sire, wọu e nẹ̌bera, ”Bal᷊inewe i Musa ěllangu MAWU e seng něngoro kawanua pěmẹ̌maehẹ̌ pajakẹ̌ baugu pěngongkosẹ̌ Tentam MAWU e? Arawe ini e, unụ e wue i Amang tawe něngansang tau Lewi e baugu pěnampung manga pajakẹ̌ bọu apang kawanua su Yehuda ringangu Yerusalem?” (

⁷Apan tumatol᷊e si Atalya, bawine ral᷊akisẹ̌ ene, seng něnggolang Bal᷊em MAWU, kụ mal᷊awọ lai wọu manga apal᷊iwụ nitani waugu Ruata kụ seng nipakẹ i sire waugu niapěněmba Baal.)

⁸Tangú ratu nẹ̌parenta tadeạu tau Lewi pẹ̌kẹ̌koạ kasẹ̌ u roitẹ̌ sěmbaụ kụ pakịpěllọ su těngon tukadu pasěllangeng u Wal᷊em MAWU.

⁹Su kasěllahu Yerusalem dingangu Yehuda niwohang u kěbị taumata harusẹ̌ pẹ̌bawa pajakẹ̌ baugu MAWU, kerẹewe nạung niorong Musa.

¹⁰Bohang ene nakal᷊uasẹ̌ naungu kawanua ringangu manga těmbonang i sire. I sire sěngkapẹ̌gihingang němpẹ̌tahong pajakʼi sire su ral᷊ungu kasẹ̌ ene.

¹¹Ěllo-ěllo kasẹ̌ ene wẹ̌bawaěngu tau Lewi su anung sawohị u ratu mědeạu parikěsaěng. Kamagengu kasẹ̌ ene seng napenẹ i tulị u něgara ringangu tumatimbang u Imang Mawantugẹ̌ naněbangu roitẹ̌ mase kasẹ̌ ene niwal᷊ị e su tampạ e kal᷊imona. Kerene kẹ̌koateng i sire ěllo-ěllo, ringangu mal᷊awọ kahěngang doitẹ̌ natampung.

¹²Bọu ene ratu ringangu i Yoyada něnarakangu roitẹ̌ ene suapan taumata kụ měnẹ̌něllang pěngangul᷊ị Bal᷊em MAWU ene. Bọu ene i sire něnewa mělahal᷊ẹ̌ u watu, mělahal᷊ẹ̌ u kalu, ringangu kipung baugu pẹ̌koạ munara ene.

¹³Tangú nanětạ e manga mělahal᷊ẹ̌ ene němpěngul᷊ị Bal᷊em MAWU e. I sire kěbị něhal᷊ẹ̌ kerene hakịu pěngěnsueěnge Wal᷊e ene nakoạ matoghasẹ̌ dingangu mal᷊ěnggihẹ̌ kere kal᷊imona.

¹⁴Sarangke hal᷊ẹ̌ ene nauadipẹ̌, bul᷊aeng dingangu sal᷊aka lembone nisarakang su ratu ringangu Yoyada. Mase wul᷊aeng dingangu sal᷊aka ene nipakẹ baugu ipẹ̌koạ manga apal᷊iwụ u Wal᷊em MAWU, kere manga apal᷊iwụ baugu komol᷊angu pẹ̌kakal᷊iomaneng, baugu sasěmba tẹ̌tongkateng, dingangu manga lamạ u wuwụ, dingangu manga lainumang. Karěngụu Imang Yoyada rem biahẹ̌, sasěmba tẹ̌tutungang e těbe ipakisěmba su Wal᷊em MAWU.

¹⁵I Yoyada nidatingu umbure natimu ringangu naminsul᷊u singongone umbure 130 su taunge.

¹⁶I sie nilěbing su pěndal᷊ěbingangu manga ratu su Soan Daud baugu měngarěgang kapiane su Ruata, su Wal᷊em MAWU ringangu su manga umatʼu Israel.

¹⁷Sarangke i Yoyada naněntang, i Yoas niologang dingangu niwitaugangu manga těmbonang u Yehuda hakịu i sie sen tawe něngarěgan těntirong Yoyada.

¹⁸Tangu kawanua e sen tawe lai němpẹ̌kal᷊iomaneng su Wal᷊em MAWU, Ruatang upung i sire, kaiso kawe něněmba mahang duata ringangu manga tul᷊adan duata wawine i Asyera. Dosan sire ene ute nakakal᷊angehẹ̌ MAWU si Yehuda ringangu Yerusalem.

¹⁹MAWU něndolohu manga nabi ipěněngkul᷊ẹ̌ si sire tadeạu saụ pẹ̌bal᷊ị pẹ̌tangkiang MAWU, kaiso kawanua e madiri rumaringihẹ̌.

²⁰ Mase Rohkẹ̌ u Ruata e nẹ̌kawasa si Zakharia anạ u Imang Yoyada. I Zakharia siměpụ su těngong kawanua, mase nẹ̌kiạu, ”MAWU Ruata e něhengetang, ’Unụe i kamene tawe tumuhụ kal᷊awọu tita-Ku ringangu něnilakạ batangeng i kamene hala. I kamene tawe mẹ̌pandung si Siạ, kụ Iạ mal᷊ain tawe mẹ̌pandung si kamene!’ ”

²¹Arawe kawanua e sěngkanaung dumokạ si Zakharia, kụ Datu i Yoas nataho su komol᷊ang ene. I sie tawe nẹ̌tahěndung u kal᷊awọu kapia ringangu satiang Yoyada i amang i Zakharia. Kahiang parentan datu, i Zakharia niwahungangu watu sarang nate su rělahu Wal᷊em MAWU. Piạ e i Zakharia naminsul᷊ẹ̌ singongone, i sie kimahiorọ u, ”Karimạko MAWU e makasilo kakanoạ u ini ringangu měmal᷊isẹ̌ ene!”

²³Taung ene lai, su pẹ̌darol᷊osu musung u sordadon Siria něhěbagu Yehuda ringangu Yerusalem. I sire němate kěbị těmbonange ringangu něhengkẹ apal᷊iwụ pul᷊aho mal᷊awọ sarang Damsyik.

²⁴Sordadon Siria mahal᷊i wue, kaiso MAWU e napakawalan sire piněmatạ sordadon Yehuda kụ něngalembong kasěllahe marau, batụu tau Yehuda e tawe mẹ̌papandung MAWU Ruata e i upung i sire. Ual᷊ingu kakoạ e kerene tangú MAWU něhukungu Ratu i Yoas.

²⁵I Yoas nal᷊esẹ gẹ̌guwạ. Sarangke sordadon sekẹ e seng tawẹ dise, sawohị e ruang katau němpẹ̌paparingang. I rẹ̌dua němate si sie su tampạ u pẹ̌tatikilange nakoạ kere luhudu wawal᷊isẹ̌ pěmamate ahusu Imang Yoyada. Datu i Yoas nilěbing su Soan Daud, kaiso wal᷊inewe su pěndal᷊ěbingangu manga ratu. (

²⁶I sire apang nẹ̌mpẹ̌sasumbinaẹ dumokạ si sie ute kai i Zabad anạ i Simeat bawineng Amon, dingangu i Yozabad anạ i Simrit bawineng Moab.)

²⁷Běkeng manga anạ i Yoas, mạanung manga pěnaněbal᷊ẹ̌ dal᷊akisẹ̌ baugʼi sie, dingangu hal᷊ẹ̌ u pěngangul᷊ị Bal᷊em MAWU, kěbị e mạtataho su ral᷊ungu bukẹ̌ u Pananualagu Bukẹ̌ u Manga Ratu. I Amazia ahusʼi Yoas, nakoạ datu něngaweng si amange.