Read Sangir KARARATUANG KARUANE 25 Bible Online

KARARATUANG KARUANE 25 - Sangir bible

KARARATUANG KARUANE 25

¹I Amazia nakoạ datu piạ i sie umbure karuam pul᷊o l᷊imane su taunge, kụ i sie nẹ̌parenta su Yerusalem 29 su taunge karěngụ e. I ninange ute kai i Yoadan bọu Yerusalem.

²I Amazia mẹ̌kẹ̌koạ apang makạl᷊uasẹ̌ naungu MAWU, kaiso kawe ringangu naung naběka rarua.

³Tawẹ kararěngụ e sarangke kal᷊aianenge natoghasẹ̌, i sie něhukungu papate su manga sawohị apang němpamate si amange.

⁴ Arawe manga anạu apan sawohị ene tawe nipatene ual᷊ingu i sie tụtuhụ titaʼm MAWU, su ral᷊ungu Bukẹ̌ i Musa kụ bawal᷊one, ”Kumbahang měhukungu papate su taumata maghurang ual᷊ingu karal᷊akisẹ̌ kẹ̌koatengu manga anạ i sire, dingangu kumbahang měhukungu papate su manga rariọ ual᷊ingu karal᷊akisẹ̌ nikoạ u ghaghurang i sire. Apan taumata kětạeng botonge ihukungu papate ual᷊ingu karal᷊akisẹ̌ kụ nikakoạ e hala.”

⁵Datu i Amazia něnampungu kěbị taumata hěnton Yehuda ringangu i Benyamin bọu e něngoro si sire pạdarisị tuhụ ghal᷊ipohon sěngkatau-sěngkatau lẹ̌ahakengu tuměllangu wuntuangu sěhiwu ringangu tuměllangu wuntuangu mahasụ. Bọu ene i sie němile taumata umbure su wowon 20 su taunge kụ makatohạ mẹ̌sekẹ dingangu pande mẹ̌pakẹ u wěngko ringangu kěllung. Kal᷊awọ i sire 300.000 su kataune.

⁶Su liung ene i sie něnewa 100.000 su kataune sordado wọu Israel niwaehangu sal᷊aka manga 3.400 su kilone.

⁷Arawe sěngkatau nabi e riměnta su anun datu ringangu nẹ̌bera, ”Abe pẹ̌pakẹ u manga sordadong Israel ene, watụ u MAWU e tawe nẹ̌tul᷊ungu umatu Israel kụ bọu Kararatuangu Sawěnahẹ̌ ene.

⁸Kaiso kamagengu Ratu e mal᷊aing mẹ̌pakẹ i sire, Ruata sarung mapakawalan Datu e pakawatạ e su sědụ manilaing sordadon Datu e makuatẹ̌ dingangu wahani. U kětạeng Duata sẹ̌sane kawasa mẹ̌gěllịu kal᷊auntu arau kawawatạ.”

⁹”Kaiso kere apa wue ringangu kal᷊awọu sal᷊aka kụ sen takụ nionggọ si sire tangú?” kakiwal᷊ong Amazia. Nabi ene simimbangu, ”MAWU wotonge wue měnul᷊e su Ratu e limembo wọu ene!”

¹⁰Ual᷊ingu ene i Amazia napakal᷊iwiru manga sordado sẹ̌sewaěng ene ringangu něngoro si sire pakạpul᷊ẹ sarang banuan sire. Nạdehọ i sire napul᷊ẹ e, kaiso měngkate apa nẹ̌pahuwungkadẹ̌.

¹¹I Amazia nẹ̌tumbahanim batangenge kụ nẹ̌bawa sordadone sarang Bal᷊ang Mapěhadẹ̌. Sene i sire nẹ̌sekẹ kụ nakapate 10.000 su kataune sordadong Edom.

¹²Mapul᷊o hiwu lai wal᷊ine nitaweng. I sire niwawa sarang bowom bul᷊udu watu su soan Sela wọu ene nirěmmẹ tanaẹ sarang nate.

¹³Těntal᷊ang ene manga sordadong Israel kụ seng pinakapul᷊ẹ i Amazia, ringangu tawe nipakawala nẹ̌sekẹ, ute seng něngalo manga soan Yehuda su wěllạ u Samaria ringangu Bet-Horon. I sire němate 3.000 su kataune ringangu němul᷊aho apal᷊iwụ mal᷊awọ.

¹⁴Sarangke nakawatạ sordadong Edom, i Amazia napul᷊ẹ nẹ̌bawa manga tul᷊adang mahang duatan tau Edom dingangu něměllọu ene su Yehuda. Bọu ene i sie něnutung buwụ baugu manga tul᷊ada ene mase nẹ̌subạ.

¹⁵Kakanoạ e ene nakal᷊angehẹ̌ MAWU. I sie něndolohu sěngkatau nabi nakoạ sol᷊ong anung Amazia. Nabi ene nẹ̌bera, ”Unụe i Tuan Datu naněmba mahang duataʼm bansa wal᷊ine kụ tawe makaambang bansane hala wọu kawasan Tuan Datu?”

¹⁶”Karěmasẹ̌ko,” ungkuěng i Amazia, ”Mạengu tala, ute i kau pateěng i kami! I kami tawe nẹ̌lěhengkẹ i kau e apạkakoạ měnanasa ratu!” Tangu narěmase nabi ene, kaiso kal᷊imonang ene i sie reng nakapẹ̌bera u, ”Ini e iạ nasingkạ e u Ruata e kai seng němutusu mědeạu mapakasilakạ u Ratu kahiang kakanoạ u Ratu ene, ringangu ual᷊ingu Ratu e tawe nẹ̌pandung sasasaku e hala.”

¹⁷I Amazia datung Yehuda ringangu manga měnanasane němpẹ̌gihingang dimokạ Israel. I sie něndolohu rarolohang sarang anung Yoas datung Israel, anạ i Yoahas, pulung i Yehu, mědeạu rumokạ si sie mẹ̌sekẹ.

¹⁸Arawe Ratu i Yoas něndingọ u sasimbange ini, ”Sěnsul᷊e tempo gahundunge masumpinị su wawul᷊udang u Libanon něndingọ u ghaghausẹ̌ ini waugu kalun cěmara, ’Ei kalun cěmara, gěllịko sangiang u e su ahusẹ̌ku pakakoạ kawinge.’ Kaiso wọu ene piạko binatang u kěhu sěmbaụ simahe sene kụ taghal᷊ẹ̌ něnahida rěmpugẹ̌ piạ hanggange sene.

¹⁹I kau e Amazia, měngkawe lụlansị u i kau nakawatạ tau Edom, kaiso mạpiangbe i kau katanạ su wal᷊e. Baugu apa i kau mẹ̌deạ aị u i kau tumbạeng makasilakạ batangengu ringangu kawanuanu?”

²⁰Arawe i Amazia, ratun Yehuda tawe mal᷊ahimang kal᷊awọu waweran Yoas datung Israel. Dingangu Ruata e mambeng mapulu tadeạu i Amazia e ikawatạ ual᷊ingu i sie seng naněmba pakal᷊uang u tau Edom.

²¹Ual᷊ingu ene i Yoas nẹ̌buạ dingangu taumatane sarang Bet-Semes kụ nẹ̌sekẹ dingang i Amazia paị sene.

²²Sordadong Yehuda kinawatạ dingangu kěbị bawahanine nahuntal᷊ang sol᷊ong bal᷊en sire sěngkatau-sěngkatau.

²³I Yoas něnamẹ si Amazia ringangu nẹ̌bawa si sie sol᷊ong Yerusalem, bọu e něněnehẹ̌ meselu soa ene kanandung manga 200 su metere, nanětạ bọu Tukadu Pasěllangeng i Efraim sarang Tukadu Pasěllangengu Wukune.

²⁴Patikụ bul᷊aeng dingangu sal᷊aka ore lai patikụ apal᷊iwụ kụ kinaěbakenge su Wal᷊em MAWU ringangu apang su kasingkạ i Obed-Edom, dingangkeweng kal᷊awọu arětạ su istana, ringangu i sire nitaweng pirang katau kụ nihengkẹ i Yoas sol᷊ong Samaria.

²⁵Sarangke i Yoas datung Israel naněntangu dunia, i Amazia ratung Yehuda reng nẹ̌biahẹ̌ 15 su taunge lai.

²⁶Kal᷊imonang i Amazia naněntangu MAWU, taumata e nẹ̌paparingang dimokạ si sie su Yerusalem. Ual᷊ingu ene i sie timal᷊ang sarang soang Lakhis, arawe manga sědụ e němpanahusu si sie sarang pai ene kụ němpamate. Maiete nilurang su kawal᷊o sarang Yerusalem, bọu e nilěbing su pěndal᷊ěbingangu mararatu su Soan Daud. Běkene wal᷊ine mạanun Datu i Amazia wọu tětạ e sarang pěngěnsueěngu kawasane niwohẹ su ral᷊ungu bukẹ̌ u Wěkem Mararatun Yehuda ringangu Israel.