Read Sangir KARARATUANG KARUANE 26 Bible Online

KARARATUANG KARUANE 26 - Sangir bible

KARARATUANG KARUANE 26

¹Sarangke i Amazia naněntangu dunia, patikụ kawanuang Yehuda němile si Uzia ahuse nakoạ datu. Su tempo ene umbure 16 su taunge. I ninange isẹ̌sẹ̌bạ si Yekholya, bawinen Yerusalem. I Uzia nẹ̌parenta su Yerusalem 52 su taunge karěngụe. Seng i sie nạung němul᷊aho ringangu němangung kapia soang Elot.

⁴Mẹ̌sul᷊ung i amange, i Uzia mal᷊aing mẹ̌kẹ̌koạ apang kụ makal᷊uasẹ̌ naung u MAWU.

⁵I Zakharia ute kai měnanasa pẹ̌bawiahu marohkẹ̌ si sie. Karěngụu i Zakharia reng biahẹ̌ tangú, i Uzia e masatia mẹ̌kal᷊iomaneng su MAWU hakịu MAWU e měngal᷊amatẹ̌ si sie.

⁶I Uzia e nẹ̌sekẹ dimokạ tau Pilistin. I sie napakahěbang manga meselẹ̌ su soang Gat, Yabne ringangu Asdod, bọu ene něndarisị manga soa piạ těndạ e maraning Asdod ringangu wanua wal᷊ine su Pilistin.

⁷Duata e nẹ̌tul᷊ung i sie němatạ tau Pilistin, dingangu tau Arabẹ̌ kụ mạtanạ su soang Gur-Baal ringangu tau Meunim.

⁸Tau Amon němaehẹ̌ gaghěllị su Ratu i Uzia. I sie mangkeng kạkawasane hakịu arenge timeleng sarang Misirẹ̌.

⁹Mědeạu mapakatoghasu soan Yerusalem, i Uzia něndarisị u měnara su Wukuʼn Tukadu Pasěllangeng, su Tukadu Pasěllangengu Wal᷊ane ringangu su pěmikuangu meselẹ̌.

¹⁰I sie mal᷊aing něndarisị u manga měnara piạ těndạ e su wanua matene, ringangu němangka sumu mal᷊awọ batụu binatang lẹ̌hikinange kai mal᷊awọ kahěngang, baewe su tenene marangẹ arau lai su tenene wawa masanạ su sěmběkam bahẹ. Batụu i sie měnẹ̌naungbe pělahěnsinuang, tangú i sie mapělẹ̌hal᷊ẹ̌ u taumata l᷊awọ mědeạu měmuka manga pẹ̌sasuangeng anggorẹ̌ su wawul᷊urange, ringangu waugu mahěnsinuang su apang ěntana matatawa.

¹¹I Uzia piạ sordadone mal᷊awọ-l᷊awọ kụ sěntiniạ měngkai sadia waugu mẹ̌sekẹ. I sire e nariadi wọu apang komol᷊ang kụ kakěpal᷊e niwohẹ u ruang katau mamamohẹ u ratu kụ kai i Yeiel dingangu Maaseya su al᷊ungu ahạ i Hananya, sěngkatau wọu ral᷊ohong ghal᷊ipohon datu.

¹²Kasěllahu ghal᷊ipohong sordado ene ute wọu i sire 307.500 su kataune lẹ̌ahakengu pěrwira 2.600 su kataune. I sire kěbị piạ kal᷊okone masaria mẹ̌sekẹ dingangu montol᷊ẹ̌ datu měmatạ sědụ.

¹⁴I Uzia napakasukụ u sordadone ene ringangu kěllung běngko, sapeọ e uada, pakeang uase, naěnakeng dingangu papitị ore lai watu pěmahung.

¹⁵Su Yerusalem manga masasingkạ u aghide seng nakakoạ naěnakeng kụ makapintị u horoʼm papitị dingangu manga watu ghaghuwạ bọu ral᷊ungu měnara ringangu manga wukung meselu soa. I Uzia timeleng suapan tampạ, dingangu i sie nakoạ mahěmpal᷊iung kawasane ual᷊ingu Ruata e tawẹ tiạ e mẹ̌tul᷊ung i sie.

¹⁶Sarangke Ratu i Uzia e natoghasẹ̌, i sie kai naobotẹ̌, kụ kai ene nakakanawo si sie. I sie limampa titaʼm MAWU Ruatane ual᷊ingu simuẹ̌ su Wal᷊eʼm MAWU mědeạu měnutung buwụ su wowong pananěmbaěng u wuwụ.

¹⁷Arawe Imang i Azarya ringangu imang bal᷊ine i sire 80 matatoghasẹ̌ e dingangu wahani tumol᷊e si sie,

¹⁸ mědeạu lumawang kakanoạ e ene. I sire nẹ̌bera, ”I Tuang Kụ Lẹ̌adateng! I Tuang tawe wotonge měnutung buwụ baugu MAWU. Ene e kai hal᷊ẹ̌ u manga imang pal᷊ahiteng Harun, batụu kai i sire nitilakehẹ̌ baugu ene. Karimạko i Tuang deng maněntangu tampạ susi ini! I Tuang seng dimokạ MAWU Ruata, dingangu seng tawe lai makahombang al᷊amatʼE.”

¹⁹Su tempo ene i Uzia rụdarisị su rěduhu pananěmbaěngu wuwụ su Wal᷊em MAWU ringangu apal᷊iwụ u pěnutungang buwụ su l᷊imane. I sie limangehẹ̌ su manga imang ene, dingangu sěngkělěndịu siměpụ sakị u pisị makạtatakụ su rěhụ e.

²⁰I Azarya ringangu manga imang bal᷊ine nakasilo si sie kụ měngkai apạ e himěkosẹ̌, kụ bọu ene měnẹ̌nahěsẹ tadeạu i sie měněntangu Wal᷊em MAWU. Masahawụ-sahawụ i sie siměbang ual᷊ingu MAWU e kai seng něhukung.

²¹Sarangke Ratu i Uzia naněntangu dunia, ute sakị ene tawẹ banạ u mapia. I sie nilingkạ su wal᷊e sěmbaụ kụ tawe pinakawala kapia sumuẹ̌ su Wal᷊em MAWU. I sie nipakal᷊iwirẹ̌ bọu kal᷊awọu hal᷊ẹ̌ e, ringangu i Yotam ahuse mẹ̌pẹ̌parenta kawanua kere tumatimbange.

²²Běke wal᷊ine mạanung pẹ̌paparentan Datu i Uzia, seng niwohẹ u Nabi i Yesaya ahusʼi i Amosẹ̌.

²³ Su tempong naminsul᷊ẹ̌ singongone, i Uzia nilěbing su ěntana maraning pěndal᷊ẹ̌bingang u mararatu, kaiso tawe su pěndal᷊ẹ̌bingang ene hala, batụu i sie kai piạ sakị e su pisị makạtatakụ. I Yotam ahuse nakoạ datu něngaweng si sie.