Read Sangir KARARATUANG KARUANE 28 Bible Online

KARARATUANG KARUANE 28 - Sangir bible

KARARATUANG KARUANE 28

¹I Ahas naratu umbure duam pul᷊o su taunge, kụ i sie mẹ̌pẹ̌parenta su Yerusalem mapul᷊o ěnnung su taunge karěngụ e. I sie tawe timol᷊e sansahẹ̌ mapia wọu Ratu i Daud, i upunge, kaiso kawe mẹ̌kẹ̌koạ apan tawe makal᷊uasẹ̌ naungu MAWU.

²I sie mẹ̌bẹ̌biahẹ̌ kere manga ratung Israelẹ̌ dingangu něngoro taumata pẹ̌kẹ̌koạ manga tul᷊adang Baal wọu logam,

³ore měnutung buwụ su Wal᷊ang Hinom. Sarangkewe ahuse sẹ̌sane isěmba kere sasěmba su mahang duata, tụtuhụ tundune ral᷊akisẹ̌ e wọu taumata kụ apan seng nitokol᷊u MAWU wọu wanuang Kanaan piạ nạung tau Israel simuẹ̌ su wanua ene.

⁴I Ahas něgěllịu sasěmba ringangu něnutung buwụ suapan tampạ u pěnaněmbaěng su mahang duata su wawul᷊udange ringangu su al᷊ungu manga kakaluang mal᷊ahěbung.

⁵ Ual᷊ingu Ratu i Ahas nẹ̌dosa, MAWU Ruatane napakawalan sie pinakawatạ su ratun Siria kụ mal᷊aing něhengkẹ tau Yehuda mal᷊awọ-l᷊awọ tabidạu nitaweng sarang Damsyik. MAWU lai napakawalan sie pinakawatạ su Ratu i Pekah ahusʼi Remalya wọu Israel, kụ su ral᷊ungu sěhěllo němate 120.000 su kataune sordadong Yehuda kụ bawahani. MAWU, Ruatang upung i sire e napakawalang kěbị ene e nariadi, ual᷊ingu kawanuang Yehuda e seng tawe lai mẹ̌papandung MAWU.

⁷Ahusʼi Ahas, kụ arenge i Maaseya nipateng Zikhri sěngkatau pěrwiran tau Israel. I Zikhri mal᷊aing němate si Azrikam mẹ̌tatangkuang istanan datu, ringangi Elkana, tumatimbang datu.

⁸Manilaing tau Yehuda e kai sěndinganengu tau Israel, kaiso sordadong Israelẹ̌ e něnaweng manga wawine ringangu manga rariọ i sire 200.000 su kataune, bọu e nẹ̌bawa si sire sol᷊ong Samaria sěngkahengkẹ dingangu apal᷊iwụ pul᷊aho mal᷊awọ-l᷊awọ.

⁹Sěngkatau nabing MAWU arenge i Oded mạtanạ su soang Samaria. Su tempong sordadong Israelẹ̌ e nẹ̌sul᷊e nẹ̌bawa taumata nitaweng bọu Yehuda, i Oded nẹ̌sombang i sire piạ i sire sarung sumuẹ̌ su soa. I sie nẹ̌bera, ”I kamene seng němatạ tau Yehuda ual᷊ingu MAWU Ruatang upung i kamene e limangehẹ̌ si sire. Arawe MAWU nakaringihẹ̌ u kereapa katingkaị e i kamene měmate sordadong Yehuda ene.

¹⁰Kụ orasẹ̌ ini tau Yerusalem dingangu Yehuda sarung koateng i kamene manga ěllang i kamene. I kamene kai wěga u i kamene mal᷊aing nẹ̌dosa su MAWU Ruatanu?

¹¹Pẹ̌daringihẹ̌ko! Apang tinaweng ini e ute kawe manga anạ u sěngkataunu. Kụ dolohẹ̌ko i sire pakapul᷊ẹ. Mageng tala, ute MAWU e lumangehẹ̌ kụ měhukung i kamene.”

¹²Těmbonange wọu Israelẹ̌ ěpạ u katau e, i Azarya anạ i Yohanam, i Berekhya anạ i Mesilemot, i Yehizkia anạ i Salum, dingangi Amasa anạ i Hadlai, mal᷊aing dimokạ tindakangu sordado kụ napul᷊ẹ ene.

¹³I sire nẹ̌bera, ”Abe wawa ramahi apang nitaweng ene! I kitẹ e kai seng nẹ̌dosa su těngom MAWU, ringangu kal᷊awọu rosang kitẹ e kai seng enẹ e kasariane mědeạu ihukung. Ini e tangu i kamene mapulu měkoạ apa-apa kụ kětạembeng makatamba pẹ̌sasal᷊ang kitẹ e sarung.”

¹⁴Tangu manga sordado ene něnarakangu apan nitaweng dingangu apal᷊iwụ pul᷊aho ene su kawanua ringangu manga pangahạ i sire.

¹⁵Bọu e i sire ěpạ apang patebone ene němpěngurusẹ̌ apan tinaweng ene. I sire němpěmahiạ pakeang bọu apal᷊iwụ pul᷊aho ene su apan tinaweng kụ mẹ̌gausẹ̌ ene. I sire mal᷊aing němpěmahiạ sepatu, kaěng dingangu inumang. Apang tinaweng naral᷊esẹ e niundangeng u lanan zaitun. Apan tumanịu lome rumal᷊eng, niapasake kalide, bọu e kěbị tinawenge niwawa sarang Yerikho, soang manga kalung korma, tadeạu makakapul᷊ẹ sarang kampong i sire su Yehuda. Bọu ene tau Israel napul᷊ẹ sarang Samaria.

¹⁶Tau Edom saụewe něnětạ něnekẹ Yehuda ringangu něnaweng taumata l᷊awọ. Ual᷊ingu ene Ratu i Ahas nẹ̌dorong su ratung Asyur i Tiglat-Pileser, tadeạu apẹ̌děndingọu ontol᷊ẹ̌.

¹⁸Su tempo ene lai tau Pilistin kạpěnẹ̌nekẹ e manga soa su manga pentọ u wul᷊ude su sěmběkaʼm bahẹ, dingangu su wanua su sěmběkan timuhẹ̌ bọu Yehuda. I sire němul᷊aho soang Bet-Semes, Ayalon, dingangu Gederot, ore lai soang Sokho, Timna, ringangu Gomzo ore lai manga weọ nangělikụ soa tatěllu ene kụ bọu ene nẹ̌tanạ sene.

¹⁹Ual᷊ingu i Ahas datung Yehuda naněntangu MAWU ringangu tawe nẹ̌parenta kawanuane tuhụ hinone, tangú MAWU e napakahombangu sigěsạ su Yehuda.

²⁰Datung Asyur ene riměnta wal᷊inewe waugu měnongkạ si Ahas kaiso kawe mapakasigěsạ i sie.

²¹Ringangu nasihasa i Ahas něngal᷊ạ bul᷊aeng bọu Wal᷊em MAWU, wọu istana, ringangu wọu apam bal᷊em manga těmbonangu kawanua, bọu ene něnarakangu ene su ratung Asyur. Kaiso ene e mal᷊aing tawẹ kěhase si sie.

²²Su ral᷊ungu kasasesẹ ene, i Ahas katewe pundangu mangkeng kạpahuntinambang baradosane su těngom MAWU.

²³I sie něnilakạ batangenge ringangu kawanuane ual᷊ingu něngonggọ u sasěmba su manga mahang duataʼn tau Siria kụ seng němatạ si sie. I sie mẹ̌tẹ̌tiněnna, ”Manga mahang duatan Siria seng nẹ̌sumbala manga ratun Siria, kụ kamagengu iạ maněmbang gaghěllị si sire, aramanung iạ e sarung i tul᷊unge lai.”

²⁴Bọu ene i sie něngal᷊ạ kěbị apal᷊iwụ u Wal᷊em MAWU ringangu nipakagholọ e. Mase Wal᷊em MAWU e nihěpinge kụ i sie němětị pananěmbaěng mal᷊awọ su kasěllahu Yerusalem.

²⁵Suapan soa ringangu weọ e su Yehuda i sie němětị manga tampạu pananěmbaěng pakal᷊uang baugu měnutung buwụ su manga mahang duatam bansa wal᷊ine. Ual᷊ingu kawe kerene tangú i sie nakariadi MAWU, Ruatang upunge limangehẹ̌ si sie.

²⁶Běke wal᷊ine mạanung pẹ̌paparentane ringangu patikụ kakanoạ e wọu tětạ e sarang pěngěnsueěnge niwohẹ su ral᷊ungu bukẹ̌ u Wěkem Mararatun Yehuda ringangu Israel.

²⁷ I Ahas napohong, kụ nilěbing su Yerusalem kaiso wal᷊inewe su pěndal᷊ěbingangu manga ratu. I Hizkia ahuse nakoạ datu něngaweng si sie.