Read Sangir KARARATUANG KARUANE 29 Bible Online

KARARATUANG KARUANE 29 - Sangir bible

KARARATUANG KARUANE 29

¹I Hizkia naratu su Yehuda umbure 25 su taunge, ringangu i sie nẹ̌parenta su Yerusalem 29 su taunge karěngụ e. I ninange isẹ̌sẹ̌bạ si Abia anạ i Zakharia.

²I Hizkia měkẹ̌koạ apang kụ makạl᷊uasẹ̌ naungu MAWU mẹ̌sul᷊ungʼi upunge Ratu i Daud.

³Su wul᷊ang kakěsạ e su taung kahumotongange i sie nẹ̌parenta, i Hizkia něnope kal᷊awọu tukadu Wal᷊em MAWU ringangu něngoro taumata piněngul᷊ị.

⁴Manga imang dingangu tau Lewi niorone pinẹ̌tampung su rěllahu Wal᷊em MAWU watuhu sěmběkan dakị,

⁵kụ i sie nẹ̌bisara ringang i sire paị sene. I sie nẹ̌bera, ”I kamene tau Lewi, harusẹ̌ pẹ̌něntani watangeng baugu MAWU, ringangu panusi Wanal᷊am MAWU, Ruatang upung i kamene. Patikụ apang nakal᷊amuhụ banala ene, harusẹ̌ ipakatadise.

⁶I upung i kitẹ e tawẹ satiane su MAWU Ruatang kitẹ dingangu i sire mẹ̌kẹ̌koạ apan tawe mẹ̌tatal᷊ahino su naungʼE. I sire tawe mẹ̌papandung si Sie ringangu tawe mẹ̌papadul᷊i tampạ kẹ̌katanakengʼE.

⁷I sire mělẹ̌hěping kal᷊awọu tukadu Wal᷊em MAWU ringangu měmpạmate manga sol᷊one. I sire tawe měnanutung buwụ su Wal᷊em MAWU, ringangu tawe měnaněmbang sasěmba tẹ̌tutungang su Ruata sẹ̌sěmbaěngu tau Israel.

⁸Bọu e MAWU su ral᷊ungu ral᷊angehʼE něhukungu tau Yehuda ringangu Yerusalem. Dingangu i kamene kěbị masingkạ u kereapa kakanoạ u MAWU e seng nakahěkosẹ̌ dingangu nakatakụ patikụ taumata.

⁹Manga gaghurang i kitẹ apang manga esẹ e něngkairị su pẹ̌seketang mase anạ dingangu kawingʼi kitẹ e hengketang kere taumata nitaweng.

¹⁰Ini e iạ mapulu mẹ̌taingu pẹ̌dariandi ringangu MAWU, Ruatang Israel, tadeạu i Sie tawe lai lumangehẹ̌ si kitẹ.

¹¹Manga anạku, kumbahang delaing měngkai měnohọ, u kai seng i kamene e nipilen MAWU waugu mẹ̌kal᷊iomaneng dingangu mẹ̌tangkiang si Sie ringangu měnutung buwụ dingangu měngahạ kawanua waugu mẹ̌kal᷊iomaneng.”

¹²Taumatang Lewi kụ diměnta su tempo ene ute kai: Wọu ghal᷊ipohong Kehat: i Mahat anạ i Amasai, ringangu i Yoël anạ i Azarya Bọu ghal᷊ipohong Merari: i Kish anạ i Abdi, ringangu Azarya anạ i Yehaleleel Bọu ghal᷊ipohong Gerson: i Yoah anạ i Zimna, ringangu i Eden anạ i Yoah Wọu ghal᷊ipohong Elisafan: i Simri ringangu i Yeiel Bọu ghal᷊ipohong i Asaf: i Zakharia ringangu i Matanya Bọu ghal᷊ipohong Heman: i Yehiel dingangu i Simei Wọu ghal᷊ipohong Yedutun: i Semaya ringangu i Uziel.

¹⁵Bọu e i sire něnampungu tau Lewi lai wal᷊ine, dingangu i sire kěbị e nanusim batangenge. Bọu ene, natuhụ e kere su parentan datu, manga imang e nasowa su ral᷊ungu Wal᷊em MAWU kụ nanětạ e nipakasusine timuhụewe su manga titaʼm MAWU e. Patikụ apang mal᷊amuhụ e niwawa sarang likude sarang dělahu Wal᷊em MAWU. Bọu ene tau Lewi e něngahạ sarang Bal᷊ang Kidron su l᷊ikudu soa.

¹⁷Hal᷊ẹ̌ ene nitětạ su tanggalẹ̌ humotong bul᷊ang humotong. Su tanggalẹ̌ ual᷊u i sire nasueng pěnanusing kal᷊awọu rěllahu Wal᷊em MAWU sarang tatumbal᷊ene su těngone. Bọu ene karěngụ u ual᷊u ěllo e lai i sire něnusi ghodoěng ene kěbị sarang nasue su tanggalẹ̌ mapul᷊o ěnnung bul᷊ang ene.

¹⁸Bọu e tau Lewi ene naul᷊ị su Ratu i Hizkia, ”I kami e seng nasue wọu něnusi Wal᷊em MAWU patikụ e narekeng lai pananěmbaěng baugu sasěmba tẹ̌tutungang, meda ringangu borotẹ̌ sẹ̌sadiang, dingangu kal᷊awọeweng apal᷊iwụ e.

¹⁹I kami mal᷊aing seng něngahạ kapia kal᷊awọu apal᷊iwụ kụ nihaeng Datu i Ahas su tempong i sie tawe nẹ̌pandung MAWU e su tempong pẹ̌paparentane. Kal᷊awọu apal᷊iwụ ene e seng nihaeng kami e saụ baugu MAWU, kụ ini e seng ene su těngoʼm pananěmbaěng.”

²⁰Tawẹ kararěnane ipěngampal᷊ẹ̌ e Ratu i Hizkia něnampungu apan těmbonangu kawanua, wọu ene tamai ringangi sire sarang Bal᷊em MAWU.

²¹Baugu sasěmbang ampungu rosa waugu walagu ratu ringangu kawanuang Yehuda, dingangu waugu mapakasusing Bal᷊em MAWU e, i sire nẹ̌bawa sapi esẹ pitum baụ dingangu domba esẹ pitum baụ, anạ u domba pitum baụ dingangu kambing esẹ pitum baụ. Datu e něngoro manga imang hiteng Harun naněmbang manga binatang ene su wowong pananěmbaěng kere sasěmba tẹ̌tutungang.

²²Manga sapi ene nipotọ bọu ene manga imang něněbohu rahane su pananěmbaěng. Bọu ene i sire nẹ̌koạ kerene lai su domba pitu ene ringangu su anạ u domba pitu ene.

²³Pěngěnsueěnge i sire něngal᷊ạ manga kambing ene kụ niwawa su anun datu ringangu kawanua kụ kapẹ̌kẹ̌kal᷊iomanenge sene, wọu ene i sire kěbị e něměllọu l᷊iman sire e su wowong manga kambing ene.

²⁴Bọu ene manga kambing ene nipotọu manga imang dingangu rahane nisěbohẹ̌ su pananěmbaěng kere sasěmbang ampungu rosa patikụ kawanua. Hal᷊ẹ̌ ene kinoạ i sire ual᷊ingu ratu e seng nẹ̌parenta tadeạu pẹ̌kẹ̌koạ sasěmba tẹ̌tutungang dingangu sasěmbang kal᷊aampungu rosa waugu patikụ kawanuang Israel.

²⁵Natuhụ kere su kal᷊awọu tatualagẹ̌ nionggọu MAWU e si Daud bọu Nabi i Gad kụ něhal᷊ẹ̌ baugu ratu ringangu wọu Nabi Natan, datu e naměllọu tau Lewi e su Wal᷊em MAWU baugu pěnalangu kěcapi ringangu gambus,

²⁶kere ipẹ̌pakẹ i Daud. Kerene lai manga imang e nipěllọe sene piạ slompretẹ̌.

²⁷I Hizkia nẹ̌gěllịu tatiala tadeạu koạ u pananarakangu sasěmba e itětạ. Těntal᷊ang sasěmba e nisarakang, taumata e nanětạ e nẹ̌kantarị u raralo su MAWU e, ringangu apang měnanalangu musikẹ̌ e napahěteng slompretẹ̌ dingangu manga pakakase lai wal᷊ine.

²⁸Datu i Hizkia ringangu kal᷊awọu taumata kụ ene sene e nẹ̌tumpěkuhẹ̌ naněmba MAWU e těntal᷊ang manga mẹ̌kakantarị e tatapẹ̌ měmpẹ̌kẹ̌kantarị dingangu manga měnanalangu musikẹ̌ e sarang patikụ sasěmba ene e nasue natal᷊ung.

³⁰Datu ringangu manga mapapiang kawanua e něngoro tau Lewi pẹ̌kẹ̌kantarị baugu MAWU manga raralo kụ nikarang i Daud dingangu Nabi i Asaf. Patikụ taumata e mẹ̌kẹ̌kantarị dingangu ral᷊uasẹ̌ masaria, kapẹ̌tẹ̌tumpěkuhe ringangu maněmba Ruata.

³¹Bọu ene i Hizkia nẹ̌bera, ”Ual᷊ingu i kamene ini e seng nihae waugu MAWU, tangú nakoạ kere sasěmban tatarimakasẹ u e, i kamene harusẹ̌ pẹ̌bawa sasěmba sarang Bal᷊em MAWU.” Bọu ene kěbị taumata kụ narěnta sene e němpẹ̌bawa manga sasěmba ene, sarang lai piạu ringangu karal᷊uasu naung i sire e němpẹ̌bawa manga binatang baugu isěmba kere sasěmba tẹ̌tutungang.

³²I sire němpẹ̌bawa sapi esẹ 70, domba 100, dingangu anạ u domba 200, ore lai měnarakangu sasěmba makoạ sasěmba tẹ̌tutungang su MAWU.

³³I sire mal᷊aing nẹ̌bawa sapi esẹ 600, dingangu domba těllu hiwu e baugu isěmba ringangu kinaseng sěngkakinạ kahiang kěbị apang narěnta.

³⁴Manga imang kụ seng napakasusing batangenge apạ e mahal᷊i rekenange waugu ipěměnị pising kěbị binatang ene. Ual᷊ingu ene i sire e sẹ̌sumbalaěngu tau Lewi e, watụ u tau Lewi e limembong satia su atorangu pananusi. I sire e tẹ̌bewe mẹ̌sẹ̌sumbala sarang masukụ manga imang kụ seng napakasusin batangenge.

³⁵Su l᷊iung sasěmba tẹ̌tutungang manga imang mal᷊aing měnẹ̌němban tawang binatang sasěmba tatarimakasẹ kụ nikinạ u kawanua. I sire mal᷊aing mạněmbang anggorẹ̌ kụ niwěmbing sěngkawěmbing dingangu sasěmba tẹ̌tutungang ene. Kerene kakakoạ u pẹ̌kakal᷊iomaneng su Wal᷊em MAWU kapia saụ kinoạ kapia.

³⁶Tangú limuase naungu Ratu i Hizkia ringangu kawanuane ual᷊ingu su ral᷊ungu tempo kadodọ Duata e sarung měnongkạ si sire e mẹ̌koạ patikụ ene.