Read Sangir KARARATUANG KARUANE 3 Bible Online

KARARATUANG KARUANE 3 - Sangir bible

KARARATUANG KARUANE 3

¹ Ratu i Daud seng němato u Wal᷊em MAWU e harusẹ̌ ipararisị su Yerusalem su Wul᷊udu Moria su tampạ u pěndal᷊indaěng gandung tataghuanengu Arauna tau Yebus. Pěmamětị Bal᷊em MAWU ene e nitětạ u Ratu i Salomo

²su wul᷊ang karuane, taung kaěpạ e su pẹ̌paparentane.

³Nandụ u Wal᷊e ene 27 su metere, wěnahe 9 meterẹ̌.

⁴Nandụ u huange su těngone mẹ̌sul᷊ungu wěnahu Wal᷊e ene 9 meterẹ̌. Dangẹ e 54 su metere. Watuhụ ral᷊ungu huange ene niěmboěngu wul᷊aeng sahị.

⁵Huange kapiange nirěndungangu pěpal᷊u kalun cěmara kal᷊ěnggihange ringangu niěmboěngu wul᷊aeng maghurang. Su wowom bul᷊aeng ene piạ ketạ u gambaru kalung palěm dingangu gambaru hante.

⁶Datu e nělěgahu Wal᷊e ene ringangu watum paramata maral᷊ěnggihẹ̌ e ringangkewelaim bul᷊aeng bọu wanuang Parwaim.

⁷I sie nẹ̌pakẹ u wul᷊aeng ene mal᷊aing niěmboěngu manga meselu Wal᷊em MAWU ene, manga balakẹ̌, manga koseng u tukadẹ̌ dingangu su manga tukade. Apang meselẹ̌ niketakengu gambarangu kerub.[1]

⁸ Huange su ral᷊unge nisěbạ Huang Kasusiange, nandune 9 meterẹ̌ dingangu wěnahe 9 meterẹ̌, mẹ̌sul᷊ungu wěnahu Wal᷊em MAWU ene. Bul᷊aeng 20 su toěnge nipakẹ piněhaweng meselu Huang Kasusiange ene

⁹dingangu wul᷊aeng 570 su harange nikoạ paku. Meselẹ̌ su wowone rasị mal᷊aing nihawengangu wul᷊aeng.

¹⁰ Datu mal᷊aing něngoro apang mělahal᷊ẹ̌ e ene pinẹ̌koạ tul᷊adang kerub darua wọu uada. Manga tul᷊ada ene nihawengangu wul᷊aeng mase nipakipěllọ e mẹ̌dẹ̌děduhẹ̌ su Huang Kasusiange, nipẹ̌tẹ̌ngom tukadẹ̌. Apang kerub ene piạ papanide rarua, sěmbaụ-sěmbaụ nandune 2,2 su metere. Panide ene nawingkahẹ̌ sěngapam botonge hakịu pondol᷊e nẹ̌sonsol᷊ẹ̌ su tal᷊oarang huange ringangu pondol᷊e lai wal᷊ine e nịdatingu meselẹ̌ su koaneng dingangu su kaihi. Tangú papanidẹ̌ ene nawatedẹ̌ kanandung 9 meterẹ̌ kawěnahewen dal᷊unge ene.

¹⁴ Baugu Huang Kasusiange ene mal᷊aing nikoateng dal᷊ansene e wọu hekạ leneng dingangu hekạ bal᷊inẹ kụ awạ e wirụ, kamumụ dingangu mahamụ. Dal᷊anse ene lai tangú nilẹ̌gahengu manga gambaru kerub.

¹⁵Datu nẹ̌koạ dihi ruam bua kụ dangẹ e sěmbaụ-sěmbaụ e tahạ 15,5 su metere wọu ene nịpararisị su těngong Bal᷊em MAWU. Apan dihi ene nịkakoateng těmbọe karangẹ e 2,2 su meterẹ̌.

¹⁶Dihi ene wowone rasị nịdal᷊ẹ̌gahengu tambaga laụ u timběha, wọu nianang pinẹ̌dal᷊ahante kere awẹ u delima 100 su waụ e.

¹⁷Manga rihi ene nipararisị su sěmběkane kaihi ringangu koaneng bọu tukadẹ̌ sasuěkang sarang Bal᷊em MAWU; batuhu sěmběkan timuhẹ̌ nisěbạ Yakhin,[2] dingangu watuhu sěmběkan sawěnahẹ̌ siněbạ e Boas.[3]