Read Sangir KARARATUANG KARUANE 30 Bible Online

KARARATUANG KARUANE 30 - Sangir bible

KARARATUANG KARUANE 30

¹ Pěmamantugẹ̌ Paskah e ren tawe nikẹ̌koạu kawanua su tempone su wul᷊ang humotong, ual᷊ingu manga imang kụ deng napakasusing batangenge tumanịu mahal᷊i rekenange ringangu wědang tawe nạtimu taumata kụ nẹ̌tampung su Yerusalem. Ual᷊ingu ene Ratu i Hizkia ringangu manga sawohị e ore lai tumanạ u Yerusalem sěngkanaung baugu měmantugẹ̌ Paskah ene su wul᷊ang karuane, dingangu i sire kěbị e mal᷊uasẹ̌ su karaki ene. Mase ratu e něndingọ u suratẹ̌ su kěbị taumata su kasěllahu Israel dingangu Yehuda. Kerene lai su Efraim dingangu Manasye. Kasěllahu tau Israel wọu wanuang ghal᷊ipohong Dan su sěmběkan sawěnahẹ̌ sarang Bersyeba su sěmběkan timuhẹ̌, nihaěngang sarang Bal᷊em MAWU su Yerusalem baugu měmantugẹ̌ Paskah ringangu měngadatẹ̌ MAWU Ruatang Israel kere nạung tinantu su ral᷊ungu manga toratʼi Musa. Kal᷊imona e nạung den tawẹ němẹ̌mantugẹ̌ Paskah e kerene kasěllahe.

⁶Ual᷊ingu parentan datu ringangu manga sawohị e niringọ e manga rarolohang sarang kasěllahu Yehuda ringangu Israel ipẹ̌bawa manga suratẹ̌ ene kụ bawerane kere ini, ”Kawanuang Israelẹ̌! I kamene seng nal᷊iwirẹ̌ bọu kawasan tau Asyur. Ini e saụko i kamene pẹ̌bal᷊ị pẹ̌karadiahang baugu MAWU, Ruata kụ isẹ̌sěmbang Abraham, Ishak dingangu i Yakub, tadeạu i Sie mal᷊aing mẹ̌bal᷊ị mẹ̌tul᷊ung i kamene.

⁷Kumbahangbe kere manga i upung i kamene ringangu tau Israel bal᷊ine kụ tawẹ satiane su MAWU Ruatan sire. I kamene seng nakasilo hala kereapa kawěhạ e i Sie něhukung i kamene.

⁸Abe pẹ̌tungkětịu těmbọ kere i sire kaiso tuhuke wue MAWU e. Děntạ e sarang Yerusalem, su Wal᷊eng MAWU kụ seng nitani kahiang MAWU Ruatanu waugu watangengʼE sarang marěngụ-děngụ. Mahịe pẹ̌kal᷊iomaneng si Sie tadeạu mal᷊ěda ral᷊angehʼE si kamene.

⁹Kereu i kamene mẹ̌sul᷊e měmunara waugu MAWU, tangú apang kụ němpěhengkẹ manga anạu sěngkataung kamene kere nitaweng ute sarung piạ kakěndage ringangu mapakawalang kamene e mẹ̌sul᷊e kapia. MAWU Ruatang kamene e kai Ruata kụ mapia ringangu makěndagẹ̌; i Sie sarung měnarimạ i kamene, kereu i kamene sarung mẹ̌bal᷊ị su anun Sie.”

¹⁰Piạ e manga rarolohang ene e němpẹ̌dal᷊eng bọu soa sarang soa su wanuang ghal᷊ipohong Efraim dẹ̌duaʼm Manasye sarang sěmběkan sawěnahẹ̌ karaung banuang ghal᷊ipohong Zebulon, i sire tẹ̌tahul᷊ẹ̌geěng dingangu lẹ̌hinakaneng.

¹¹Kaiso piạ lai taumata wọu ghal᷊ipohong Asyer, Manasye ringangi Zebulon kụ mapulu ruměnta sarang Yerusalem.

¹²Su Yehuda e Ruata mal᷊aing mẹ̌kẹ̌karạdiahang dingangu mapakasěmbaụ u naungu kawanua e mẹ̌deạu mamben těngadẹ̌ matuhụ su kapulung Duata kụ tumuhụ parentan datu ringangu manga sawohị e.

¹³Su wul᷊ang karuane sěngopehangu kawanua e nẹ̌tampung su Yerusalem baugu měmantugẹ̌ Ěllong Pẹ̌tatahěndungangu Borotẹ̌ Tawẹ Kabọ e.

¹⁴Baugu pananěmbaěng su Yerusalem kụ seng nipakẹ baugu pělěngkanengu sasěmba ringangu měnutung buwụ baugu manga mahang duata, kěbị e nial᷊ạ dingangu nirěmmẹ sarang dal᷊ungu Wal᷊ang Kidron.

¹⁵Su tanggalẹ̌ mapul᷊o ěpạ bul᷊ang ene i sire němotọ manga domba waugu isěmba kere sasěmbang Paskah. Manga imang dingangu taumatan Lewi kụ bědang mal᷊amuhụ e, něngkamea marihutu. I sire něnusing batangeng i sire hakịu nakapěněmbang sasěmba tẹ̌tutungang su Wal᷊em MAWU.

¹⁶I sire sěngkatau-sěngkatau e nẹ̌deạ tampạ su Wal᷊em MAWU e timuhụewe kal᷊awọu atorange kụ kaěbakeng su ral᷊ungu bukẹ̌ u Toratʼi Musa e. Kal᷊awọu rahang manga sasěmba ene e nisarakang u tau Lewi su manga imang, bọu ene nisěbohʼi sire e su pananěmbaěng.

¹⁷Lawọ bọu tal᷊oaran taumata kụ nahunděnta sene e ren tawe nạnusin batangeng, tangú i sire tawe wotonge měmotọ domba waugu sasěmbaʼm Paskah e. Ual᷊ingu ene seng tau Lewi e hinong mẹ̌koạ hal᷊ẹ̌ ene waugʼi sire ringangu maněmbang ene e su MAWU.

¹⁸Su l᷊iung ene e, wọu tal᷊oarang tau Efraim, Manasye, Isakar, dingangu i Zebulon, mal᷊awọ kụ apang diměnta tawe manusing batangeng i sire e kal᷊imona. Tangú, i sire e němpěmantugẹ̌ Paskah ene e tawe nakahino atorange. Ual᷊ingu ene Ratu i Hizkia nẹ̌kal᷊iomaneng baugʼi sire e, angkuěnge,

¹⁹”MAWU, Ruata, rẹ̌daloěngu manga i upung i kami e, mal᷊owọko wọu kapian naungʼU e i Kau mẹ̌gěllịu ampung si sire e kụ apang kạpẹ̌kẹ̌kal᷊iomanenge si Kau, ringangu kasěllahu ral᷊ungu naung, maningbe i sire ren tawe nạnusiʼm batangeng i sire e.”

²⁰MAWU e rimaringihẹ̌ kakal᷊iomaneng i Hizkia. I Sie něngampung si sire ene, ringangu tawe něhukung si sire.

²¹Pitu ěllo karěngụ e, kụ dingangu mal᷊uasẹ̌ tạ sihinge, apang kụ němpẹ̌tampung su Yerusalem ene e nẹ̌koạ sal᷊imbangu Borotẹ̌ Tawẹ Kabọ e. Apang kal᷊aěllo e tau Lewi ringangu manga imang e měmpẹ̌dẹ̌dalo MAWU ringangu kạguwạu naung.

²²Tau Lewi e enẹ e kapandene měngahạ pẹ̌kakal᷊iomaneng su MAWU e, hakịu i Hizkia e, nẹ̌dalo wue si sire. Pitu ěllo karěngụ e i sire e němpẹ̌teěng kaěng bọu sal᷊imbang ene e ringangu něnarakangu sasěmba waugu makitarimakasẹ su MAWU, Ruatang i upung i sire e,

²³i sire kěbị e němutusu waugu měněpasu sal᷊imbang ene e pitu ěllo kạpia. Mase saụewue i sire namantugu ene kạpia ringangu ral᷊uasẹ̌.

²⁴Datu i Hizkia nẹ̌gěllịu sapi esẹ sěhiwu, ringangu domba pitu hiwu. Kal᷊awọu sawohị i Hizkia e něngonggọu sapi esẹ sěhiwu ringangu domba mapul᷊o hiwu. Kal᷊awọu binatang ene e nionggọ su kawanua mědeạu potokang dingangu kinaseng. Mal᷊awọ kahěngang imange napakasusim batangenge.

²⁵Kawanuang Yehuda e, manga imang, tau Lewi, ringangu taumata kụ apang nahunděnta wọu sěmběkan sawěnahẹ̌ e ringangu kal᷊awọu taumata raghị kụ seng něngindunụ su Israel dingangu Yehuda e kěbị e mang makạpěndang mal᷊unsemahẹ̌.

²⁶Soang Yerusalem marame tạ sihinge ual᷊ingu nạung dokeng su tempong Salomo e ahusʼi Daud, deng bědang tawe nạdiadi kakakoạ kerene e.

²⁷Manga imang dingangu tau Lewi e měgẹ̌gausẹ̌ al᷊amatʼu MAWU e waugu kawanua, ringangu wọu tampạ katatanakengʼE su sorga Ruata e nakaringihẹ̌ kakal᷊iomaneng i sire ore něnarimạ dorong i sire e.