Read Sangir KARARATUANG KARUANE 31 Bible Online

KARARATUANG KARUANE 31 - Sangir bible

KARARATUANG KARUANE 31

¹Sarětạeng pẹ̌sasal᷊iwang e nasuẹ e, patikụ kawanua e nakoạ sarang apan soa su Yehuda, bọu e něnggolang kal᷊awọu palẹ̌ u mahang duata, něleing kal᷊awọu tul᷊ada nạung nirarisị baugu mahang duata wawine i Asyera, ringangu něngupu kal᷊awọu pangkunang dingangu manga tampạu pěnaněmbaěng mahang duata. I sire mal᷊aing nẹ̌koạ kerene su manga tampạ bal᷊ine su Yehuda, ringangu su wanuang Benyamin, Efraim, dingangu Manasye. Bọu ene i sire kěbị napul᷊ẹ sarang tampạ i sire sěngkatau-sěngkatau.

²Datu i Hizkia kapia němutusu apang kamonaěng i sire manga imang dingangu tau Lewi tuhụ pẹ̌papahiạu hal᷊ẹ̌ i sire. Kěbị munara ene e mạanung manga hal᷊ẹ̌ u: manarakangu sasěmba tẹ̌tutungang dingangu sasěmbang pẹ̌darame, mẹ̌tangkiang hal᷊ẹ̌ u pẹ̌kakal᷊iomaneng su Wal᷊em MAWU, ringangu hal᷊ẹ̌ u pẹ̌daralo ore lai makitarimakasẹ su MAWU suapạewen tampạ su ral᷊ungu Wal᷊em MAWU.

³ Bọu manga binatange hala e ratu něngonggọu manga binatang kụ gẹ̌gausang baugu sasěmba tẹ̌tutungang apang kamal᷊ukadẹ̌ dingangu apang kawawěllo, ringangu waugu sasěmba kụ isẹ̌sěmba su ěllon Sabatẹ̌, su pěmamantugu Wul᷊ang Buhu, ringangu su manga pěmamantugu sal᷊iwang bal᷊ine kerẹewe seng niatorẹ̌ su ral᷊ungu manga titaʼm MAWU e.

⁴ Su l᷊iung ene datu e něngoro su měmamanuang Yerusalem pẹ̌bẹ̌bawa sasěmba kụ seng nitantu waugu manga imang dingangu tau Lewi, tadeạu i sire makasěmpịbe měnaung pẹ̌tatangkiang su Wal᷊em MAWU kerẹewe seng kạdal᷊urang su ral᷊ungu manga titaʼm MAWU.

⁵Sarangke parenta ene niwohang, tau Israelẹ̌ e němpẹ̌bawạ sol᷊ong Bal᷊en MAWU manga ghaghěllị[13] bọu ghěsing ěntanaʼn sire humotong, tuhigu, anggorẹ̌, lanan zaitun, madu ringangu ghěsing ěntana lai wal᷊ine. I sire němpẹ̌bawa lai sěngkapul᷊ong bahageange[14] wọu tataghuaneng i sire.

⁶Kěbị taumata kụ mạtanạ su apan soa su Yehuda němpẹ̌bawa sěngkapul᷊ong bahageange wọu sapi ringangu dombaʼn sire, dingangu l᷊ai manga ghaghěllị bal᷊ine, wọu e něnarakangu kěbị ene e su MAWU Ruataʼn sire.

⁷Manga ghaghěllị ene nanětạ e nahunděnta su wul᷊ang katěllune, ringangu tatapẹ̌ nelehẹ̌ sarang bul᷊ang kapitune.

⁸Nakasilo ghaghěllị kụ kereng kal᷊awọe ene, Ratu i Hizkia ringangu manga sawohị e napakawantugu MAWU ringangu nẹ̌dalo kawanuang Israel, taumata-Ne.

⁹Piạ e ratu kapẹ̌bẹ̌bisarane ringangu manga imang dingangu tau Lewi hal᷊ẹ̌ u manga ghaghěllị ene,

¹⁰Imang Mawantugẹ̌ i Azarya hiten Zadokẹ̌ e nẹ̌bera, ”Den dokeng kawanua e němpěnondang patikụ sasěmban sire e su Wal᷊em MAWU, i kami e tawe kakawusangu kaěng, katewe mundangu něngělembo, hakịu wědang mal᷊awọ sadiang kaěng i kami e. Kěbị ene tẹ̌tarimakeng i kami e ual᷊ingu MAWU e seng něngal᷊amatẹ̌ taumata-Ne.”

¹¹Ual᷊ingu parentan datu, i sire něndiahing manga gudang su sěndihangu Wal᷊em MAWU e,

¹²mase něndesọ u kěbị gaghěllị dingangu ghaghěllị pẹ̌tahạ sěngkapul᷊one ene su ral᷊ungu manga gudang ene. Tau Lewi sěngkatau arenge i Konanya, piněhal᷊ẹ̌ nakoạ měnanitị e, ringangu i Simei tuarine nikoạ tumatimbange.

¹³Su al᷊ungu pěngangahạ i sire e piạ mapul᷊ongkatau tau Lewi wal᷊ine e nioro piněhal᷊ẹ̌, kụ kai: i Yehiel, Azazya, Nahat, Asael, Yerimot, Yozabad, Eliel, Yismakhya, Mahat, dingangi Benanya. Patikụ ene tinantu e ual᷊ingu ahạ u Ratu i Hizkia ringangu Imang Mawantugẹ̌ i Azarya.

¹⁴I Kore anạ i Yimna sěngkatau tau Lewi kụ nakoạ těmbonangu lukadẹ̌ su Tukadu Pasěllangeng sěmběkan Dakị su Wal᷊em MAWU, nighěllirangu wawawaěng baugu měnarimạ manga gaghěllị kụ isěmba su MAWU, wọu ene ipẹ̌papahiạ e.

¹⁵Suapan soa wal᷊ine tampạ kẹ̌katanakeng u manga imang, i Kore lẹ̌ontol᷊angu tau Lewi wal᷊ine: i Eden, i Minyamin, i Yesua, i Semaya, i Amarya, ringangu i Sekhanya. Manga wiahẹ̌ ene piněpapahiạ mẹ̌sul᷊ung su tal᷊oarang kal᷊awọu ghal᷊ipohong Lewi kụ baewe maghurang arau lai mangudạ tuhụewe hal᷊ẹ̌ i sire.

¹⁶Kěbị apang esẹ umure su wowon tělluʼm pul᷊o[15] su taunge, kụ makaěbạ bihingu hal᷊ẹ̌ měllo-měllo su Wal᷊em MAWU, kerene lai onggotangu wahageange sěngkatau-sěngkatau tuhụ hal᷊ẹ̌ e ringangu tumuhụ kamonaěnge.

¹⁷Manga imang nirol᷊ẹ̌ tuhụ balage, ringangu tau Lewi kụ umure su wowong duam pul᷊o su taunge irol᷊ẹ̌ tuhụ hal᷊ẹ̌ e ringangu kamonaěnge.

¹⁸I sire kěbị irol᷊ẹ̌ sěngkarol᷊ẹ̌ dingangu anạ kawing, dingangu manga taumataʼm bal᷊e lai wal᷊ine su ral᷊ungu wal᷊ene, u i sire harusẹ̌ pakarariahi apan tempo waugu mẹ̌koạ manga hal᷊ẹ̌ i sire tani waugu MAWU.

¹⁹Sutal᷊oarang manga imang kụ mạtanạ su apan soa kụ tinantu waugu hiteng Harun, arau su manga wimbaenge mạngělikụ manga soa ene, nitěbọ manga mělahal᷊ẹ̌ e waugu pěmahiạ manga wiahẹ̌ su patikụ taumata apang esẹ su ral᷊ungu walagu imang, dingangu waugu apan taumata kụ narol᷊ẹ̌ su ral᷊ungu ghal᷊ipohon tau Lewi.

²⁰Su kaguwạu Yehuda, Datu i Hizkia mẹ̌děndal᷊engu kạadilẹ̌, matul᷊idẹ̌, dingangu makạl᷊uasẹ̌ naungu MAWU Ruatane.

²¹I sie piạ ual᷊ine, ual᷊ingu patikụ apang nikoạ e waugu Wal᷊em MAWU arau waugu tumuhụ kal᷊awọu titaʼm MAWU e, kẹ̌koatenge ringangu kạguwạu naung dingangu kakěndagẹ̌ su MAWU Ruatane.