Read Sangir KARARATUANG KARUANE 32 Bible Online

KARARATUANG KARUANE 32 - Sangir bible

KARARATUANG KARUANE 32

¹Sarangke Ratu i Hizkia nẹ̌koạ patikụ apang mělẹ̌lahẹ u satiane su MAWU e, i Sanherib datung Asyur něnekẹ Yehuda. I sie něliwung kal᷊awọu soa piạ těndạ e ringangu něngoro wuntuange apẹ̌mul᷊aho.

²Piạ i Hizkia nakakasingkạ u i Sanherib piạ ol᷊ange měngalo Yerusalem,

³i sie ringangu manga sawohị dingangu manga pěrwirane němutusu waugu měnakạ manga tampạu akẹ su l᷊ikudu soa ringangu ol᷊ange tadeạu tau Asyur tawe makaěbạ akẹ kereu i sire mahumpạ su rěduhu Yerusalem. Mal᷊awọ kahěngang taumata kụ niapasěbang baugu pěhěping kal᷊awọu simbul᷊u akẹ kụ melehẹ̌ sarang likudu soa.

⁵Mase ratu e napakatoghasu soa kụ něngul᷊ị meselẹ̌, něndarisị manga měnara su wowone ringangu němětị manga meselẹ̌ lai wal᷊ine su l᷊ikude. Su l᷊iung ene tangú i sie něngul᷊ị těndạ kụ nipětị su wowong ěntana těbe niambung su sěmběkan dakị wọu soang Yerusalem. I sie mal᷊aing něngoro pẹ̌kẹ̌koạ běngko pakal᷊awọ-l᷊awọ dingangu kěllung.

⁶I sie něhengkẹ manga pěrwira waugu apạněmbonang kěbị manga esẹ su ral᷊ungu soa, ringangu něngoro si sire apẹ̌tẹ̌tampung su ěntana mal᷊oahẹ̌ su těngon tukadu pasěllangengu soa. Mase i sie nẹ̌bera si sire,

⁷”Pakararagẹ̌ bue ringangu pangiakingke; kụ kumbahang matakụ u ratung Asyurẹ̌ arau wuntuange. Katoghasẹ̌ su sěmběkang kitẹ e kai limembong kasariane wọu sěmběkan sie.

⁸I sie piạ katoghasu taumata, arawe i kitẹ e mạnaghuang MAWU Ruatang kitẹ e waugu montol᷊ẹ̌ dingangu mẹ̌sekẹ baugʼi kitẹ.” Nakaringihẹ̌ kal᷊awọu waweran datun sire e, kawanua e nawahani.

⁹Pira tempo samurine piạ i Sanherib dingangu wuntuange wědang su Lakhis, i sie něndingọu rarolohange su anung Hizkia dingangu kawanuang Yehuda su Yerusalem baugu měhabaru tatanata ini,

¹⁰”Iạ e Sanherib datung Asyur, mapulu makiwal᷊o kawe unụe i kamene kereng kawahanine matanạ tatapẹ̌ su Yerusalem kụ těntal᷊ang tẹ̌tal᷊iwungang ene.

¹¹Měnsang i Hizkia e nẹ̌bera u MAWU Ruatanu e sarung měměllọ i kamene wọu kawasang kami? Kumbahang mangimang, batụu i sie kětạeng měngakal᷊ẹ̌ si kamene. I sie sarung mapakawalang kamene mateng kal᷊unusang dingangu marou.

¹²Seng i sie e napakagholangu manga tampạ u pẹ̌kakal᷊iomanengang dingangu apang pananěmbaěng baugu MAWU, bọu e něngoro tau Yehuda ringangu Yerusalem pẹ̌kal᷊iomaneng dingangu pěnutung buwụ su pananěmbaěng sěmbaụ tudẹ.

¹³Měnsang i kamene wěga wue apan sen takụ nikoạ dingang i upungku waugu manga wansa wal᷊ine? Tawẹ běke manga mahang duatam bansa wal᷊ine e měměllọu wansane bọu kawasan datung Asyur!

¹⁴I sai wọʼi sire e kụ bọu nẹ̌koạ hal᷊ẹ̌ ene? Tawe mariadi mahang duatanu e makasal᷊amatẹ̌ si kamene!

¹⁵Abe wala ratunu e měngakal᷊ẹ̌ dingangu měmodokẹ̌ si kamene! Abe pěngimang si sie! U tawẹ běke mahang duatam bansa sude e mal᷊aing makaumal᷊ẹ̌ měměllọu kawanuane wọu kawasan datung i Asyur. Nal᷊ahẹ u mahang duatanu e mal᷊aing tawe makapěllọ i kamene!”

¹⁶Bědang mal᷊awọ bawera wal᷊ine kụ niwerang manga rarolohangu Asyurẹ̌ ene waugu pěhinakang MAWU Ruata ringang i Hizkia, ěllangu MAWU ene.

¹⁷Datung Asyurẹ̌ mal᷊aing němohẹu suratẹ̌ baugu ipěndokạ MAWU, Ruata kụ sẹ̌sěmbaěng u tau Israel. Kirini waweran suratẹ̌ ene, ”Manga mahang duatang kal᷊awọu wansa wal᷊ine e tawe makapěllọu wansane wọu kawasaku, kerene lai mahang duatang Hizkia e tawe makapěllọ u wansane wọu kawasaku.”

¹⁸Manga rarolohangu Asyurẹ̌ ene měmẹ̌mansagu kěbị ene su werang Ibrani waugu pẹ̌mal᷊ěndihẹ̌ dingangu pěmẹ̌mědi giangu tau Yerusalem kụ dasị su wowong meselu soa, tadeạu i sire makapul᷊aho soa ene ringangu tạ sungkal᷊ene.

¹⁹I sire mạhumbisaran Duata kụ sẹ̌sěmbaěng su Yerusalem mẹ̌sul᷊ungu mạhumbisarang hal᷊ẹ̌ u manga mahang duataʼm bansa wal᷊ine, kụ kai manga tul᷊ada koạ u taumata.

²⁰Tangú nẹ̌kal᷊iomanengke Ratu i Hizkia ringangu Nabi i Yesaya anạ i Amos. I sire mẹ̌kẹ̌kiaratagu makịtul᷊ung su Mawu Ruata.

²¹Bọu ene MAWU e něndolohu malạekatẹ̌ sěngkatau kụ pěmate manga sordado ringangu manga pěrwirang Asyurẹ̌ ene. Datung Asyurẹ̌ nẹ̌sul᷊ẹ e ringangu meane tạ sihinge nakoạ sol᷊ong banuane. Piạ sěhěllo i sie nạung su ral᷊ungu wal᷊eng mahang duatane, pirang katau wọu manga anạ e hala riměnta němate si sie ringangu peda.

²²Kerene kakakoạ u MAWU e něměllọ u Ratu i Hizkia ringangu tumanạ u Yerusalem bọu kawasang Sanherib datung Asyurẹ̌, dingangu wọu manga sědụ i sire lai wal᷊ine. MAWU e něngonggọu pẹ̌bawiahẹ̌ mal᷊enehẹ̌ si sire tawẹ sungkal᷊ange wọu manga něgara lampung i sire e.

²³Mal᷊awọ taumata riměnta sarang Yerusalem němpẹ̌bawa sasěmba waugu MAWU ringangu manga poroseěng baugʼi Hizkia, hakịu nanětạ bọu ene i sie lẹ̌adateng u patikụ bansa.

²⁴Su sěnaung tempo ene Ratu i Hizkia e nasakị. Sakị e ene kereng katědụ e hakịu i sie maraning mate. I sie nẹ̌kal᷊iomaneng, bọu e MAWU něngonggọu tanda si sie u i sie sarung mapia.

²⁵Katewe ual᷊ingu i sie kawe maobotẹ̌ e tangú, i sie tawe nakitarimakasẹ su karaul᷊e nionggọu MAWU e si sie. Ual᷊ingu ene MAWU e limangehẹ̌ su Yehuda ringangu Yerusalem.

²⁶Kaiso pěngěnsueěnge i Hizkia ringangu kal᷊awọu tau Yerusalem nẹ̌těngkasanạ u watangeng, kụ karěngụu i Hizkia e reng biahẹ̌ e hukumang ene e tawe niral᷊eng.

²⁷Datu i Hizkia e nakalạ kalạ, mase lẹ̌adatengu taumata l᷊awọ. I sie nẹ̌koạ kamarẹ̌ mal᷊awọ baugu pěndesokangu arětạ e: wul᷊aeng, sal᷊aka, manga watuʼm paramata, manga rampa, kěllung dingangu apal᷊iwụ mal᷊aarěga lai wal᷊ine.

²⁸I sie piạ manga gudange waugu manga ghẹ̌sing ěntana kere manga: gandung, anggorẹ̌ dingangu lanan zaitun; kerene lai manga těndạ u sapi ringangu manga dombane měngkate apa mal᷊awọ-l᷊awọ.

²⁹Su l᷊iung ene i sie lai něndarisị u lai manga soa mal᷊awọ. Kakakalạ kụ nionggọ u Ruata si sie ene e nẹ̌dal᷊embo.

³⁰Datu i Hizkia ene e něhěping dal᷊engu simbul᷊u akẹ u Gihon, dingangu napaelehu akẹ e wọu sal᷊uhe su al᷊ungu ěntana sarang dal᷊ungu soang Yerusalem. Patikụ apang kẹ̌koateng i Hizkia e piạ ual᷊ine.

³¹Dingangu su tempong manga rarolohang bọu Babel diměnta waugu makiwal᷊o si sie mạanung hal᷊ẹ̌ u kal᷊aul᷊e makạdal᷊inaụ e, MAWU napakawalang Hizkia pinẹ̌koạ kapulune hala, tadeạu ikatikạ dal᷊ungu naunge.

³²Běkene wal᷊ine mạanung Datu i Hizkia, ringangu mạanun tatal᷊ěntụ e su MAWU niwohẹ su bukẹ̌ u Pělal᷊ahẹ bọu anun Duata su Nabi Yesaya anạ i Amos, dingangu su ral᷊ungu bukẹ̌ u Wěkem Mararatun Yehuda ringangu Israel.

³³I Hizkia e napohong, kụ nilěbing su sasakaěng u ěntanang pěndal᷊ẹ̌bingang u manga ratu. Kal᷊awọu manga kawanuang Yehuda ringangu Yerusalem nẹ̌gěllịu adatẹ̌ mạngělembo si sie su tempong kapapohonge. I Manasye ahuse nakoạ datu něngaweng si sie.