Read Sangir KARARATUANG KARUANE 33 Bible Online

KARARATUANG KARUANE 33 - Sangir bible

KARARATUANG KARUANE 33

¹I Manasye su tempon naratu su Yehuda umure mapul᷊o dua su taunge ringangu i sie nẹ̌parenta su Yerusalem karěngụ e limam pul᷊o l᷊ima su taunge.

² I sie nẹ̌dosa su MAWU, ual᷊ingu tụtol᷊e tundung karal᷊akisu manga wansa kụ nitokol᷊u MAWU wọu Kanaan su tempon tau Israel simuẹ̌ su wanua ene.

³Apan tampạ u pěnaněmbaěng mahan duata kụ seng niěnsueng Hizkia i amange, nipětị e kapia. I sie němětị manga pananěmbaěng baugu pẹ̌kakal᷊iomaneng su Baal, dingangu nẹ̌koạ manga tul᷊ada waugu mahan duata wawine i Asyera, ringangu mạněmba manga wituing.

⁴ MAWU e seng něhengetang, u sarang marěngụ-děngụ Yerusalem ute kai tampạu pẹ̌kakal᷊iomanengang si Sie, kaiso paịsene su Wal᷊em MAWU ene, i Manasye seng napararisị u manga pananěmbaěng baugu manga mahang duata.

⁵Su rělahu Wal᷊em MAWU rarua e i sie napararisị u manga pananěmbaěng baugu pananěmba su manga wituing.

⁶Manga anạ e nisěmbane kere sasěmba tẹ̌tutungang su Wal᷊ang Hinom. I sie mal᷊aing mẹ̌kẹ̌koạ manga kal᷊uandagu tahahopa, tahatariang, kasingkạ u kararěndung, dingangu mẹ̌dẹ̌dorong sasal᷊ěntihọ bọu manga himukudẹ̌. I sie tumanịu warạdosa su MAWU hakịu nakasongkahẹ̌ dal᷊angehu MAWU.

⁷ Tul᷊adaʼm mahan duata nipěllọe su ral᷊ungu Wal᷊em MAWU, sumbal᷊iau waugu tampạ ene Ruata e seng něhengetang si Daud dingangu i Salomo ahuse, ”Bal᷊e-Ku su Yerusalem ini, sen Takụ nipile wọu tal᷊oaram banuang ghal᷊ipohong Israel i sire mapul᷊o dua, ene kai tampạ Takụ tinantu waugu tampạ u pẹ̌kakal᷊iomanengang si Siạ baugu sarang marěngụ-děngụ.

⁸Kereu umatu Israelẹ̌ dumaringihẹ̌ kal᷊awọu tita-Ku dingangu tumuhụ kal᷊awọu toratẹ̌ kụ nionggọ i Musa ěllang-Ku e si sire, tangú Iạ e tawe sarung mapakawalan sire e itokol᷊ẹ̌ bọu wanua nạung sen Takụ nionggọ su manga i upung i sire.”

⁹I Manasye nakakariading kawanuang Yehuda e nẹ̌barạdosa limembong karal᷊akise wọu rosa kụ nịkakoạ u manga wansa apang nitokol᷊u MAWU wọu Kanaan su tempong umatu MAWU e nahunsuẹ̌ su wanua ene.

¹⁰MAWU e něněgu si Manasye ringangu kawanuane, kaiso i sire mạdiri rumaringihẹ̌.

¹¹Ual᷊ingu ene MAWU e naparěntang manga mol᷊ensekẹ u sordadong Asyur waugu ipěnekẹ Yehuda. I Manasye e nisamẹ u kakaị, bọu ene niwěntung mase niwawa sarang Babel.

¹²Su ral᷊ungu sigěsạ e ene i sie nẹ̌těngkasanạ u watangenge su těngom MAWU Ruatane, ringangu nẹ̌kal᷊iomaneng mẹ̌gẹ̌gausẹ̌ tul᷊umangʼE.

¹³Duata e rimaringihẹ̌ kakal᷊iomaneng i Manasye ringangu němal᷊ị i sie sarang Yerusalem baugu pẹ̌parenta kạpia. Ual᷊ingu karariadi ene tangú i Manasye naiakingu MAWU e kai Ruata.

¹⁴Bọu ene i Manasye napakarangẹ u meselẹ̌ su l᷊ikude su wahageang su sěmběkan dakị wọu Soan Daud. I sie něnětạ bọu tampạ sěmbaụ maranin simbul᷊u akẹ u Gihon mase natěpasẹ̌ sarang sawěnahẹ̌ sarang Tukadu Pasěllangengu Kinạ dingangu su wahageangu soa kụ isẹ̌sẹ̌bạ Ofel. Su apan soa kụ piạ těndạ e su Yehuda, i sie něměllọu l᷊ai sěngkatau mol᷊onsekẹ.

¹⁵I sie napakaraung manga tul᷊adang mahan duatang kawanua wal᷊ine ringangu kal᷊awọu manga awẹ kụ seng nipěllọ e su Wal᷊em MAWU. I sie něnal᷊iongkahẹ̌ kal᷊awọu pananěmbaěng manga awẹ apang ene su wukidu Wal᷊em MAWU, ringangu su apan tampạ bal᷊ine su Yerusalem. Kěbị ene e niwawane nipasěbang bọu soa wọu e nirěmmẹ.

¹⁶Bọu ene i sie něngul᷊ị pananěmbaěng tampạu pẹ̌kakal᷊iomanengang su MAWU, wọu e něnarakangu sasěmba sene gaghěllị u pẹ̌darame ringangu gaghěllị tatarimakasẹ. Kěbị tau Yehuda e niorone pẹ̌kal᷊iomaneng su MAWU Ruatang Israel.

¹⁷Kawanua e wědang měnẹ̌narakangu sasěmba su apan tampạ u pěnaněmbaěng bal᷊ine, kaiso sasěmba ene e kai waugu MAWU.

¹⁸Běke wal᷊ine mạanung Manasye, ringangu mạanung kakal᷊iomanenge su Ruata, ore lai manga tatanatan Duata kụ pakịhumpạ si sie kahiang nabi su arengu MAWU, Ruatang Israel, kěbị e seng niwohẹ su ral᷊ungu bukẹ̌ u Wěkem Mararatung Israel.

¹⁹Su ral᷊ungu bukẹ̌ u Wěkeng Manga Nabi seng bọu lai niwohẹ kakal᷊iomaneng i Manasye ringangu sasimbangu Ruata su kakal᷊iomaneng ene, ore lai mạanung kal᷊awọu rosane těntal᷊ang i sie tawe nẹ̌tẹ̌tobatẹ̌, kal᷊awọu tampạ u pěnaněmbaěng awẹ dingangu manga tul᷊adan mahang duata wawine i Asyera kụ nịkakoạ, dingangu manga awẹ kụ sẹ̌sěmbaěnge.

²⁰I Manasye e nate mase nilěbing su istana. I Amon ahuse nakoạ datu piněngaweng si sie.

²¹I Amon, umbure duam pul᷊o dua su taunge piạ i sie nakoạ datu su Yehuda, ringangu i sie nẹ̌parenta su Yerusalem karěngụ e rua taung.

²²Kerẹewe i amange i sie mal᷊ain nẹ̌dosa su MAWU. I sie mạněmba manga awẹ nạung sẹ̌sěmbaěng i amange ringangu měnẹ̌narakangu sasěmba su manga awẹ ene.

²³Katewe nẹ̌darol᷊eng amange, i Amon tawe mẹ̌tatěngkasanạ u watangenge ringangu tawe mẹ̌bal᷊i su anung MAWU; mal᷊ạbe i sie něngalembong karosane wọʼi amange.

²⁴Kal᷊awọu sawohị u Ratung Amon němpẹ̌tatamba rimokạ si sie ringangu němpěmate si sie su istana.

²⁵Arawe kawanuang Yehuda e němate apan němpěmate Ratung Amon ene, wọu ene něhengkẹ i Yosia anạ e naratu.