Read Sangir KARARATUANG KARUANE 34 Bible Online

KARARATUANG KARUANE 34 - Sangir bible

KARARATUANG KARUANE 34

¹ I Yosia umure ual᷊u taung su tempong i sie naratu su Yehuda, ringangu i sie nẹ̌parenta su Yerusalem těllum pul᷊o ěsa su taunge karěngụ e.

²I sie nẹ̌koạ apang makạl᷊uasẹ̌ naungu MAWU, i sie timol᷊e sansahu Ratu i Daud i upunge, ringangu tụtuhụ kal᷊awọu titaʼn Duata ringangu kạguwạu ral᷊ungu naung.

³Samuring ual᷊u taung nakoạ datu, su tempong umure wědang tumanịu mangudạ, i Yosia nanětạ nẹ̌kal᷊iomaneng su Mawu Ruata kụ sẹ̌sěmbaěng u Ratu i Daud i upunge. Ěpạ u taung samuring ene e i sie nanětạe něnggagholang apan tampạ u pěnaněmbaěng awẹ, manga tul᷊adang mahang duata wawine i Asyera ringangu manga awẹ lai wal᷊ine.

⁴ Apan tul᷊ada ringangu manga awẹ ene e měngkate apa nipẹ̌kakakusun taumatan Yosia mase manga awul᷊ẹ̌ nipẹ̌kakaesʼi sire su wowong lěbing u taumata apang měmpạnarakangu sasěmba su manga awẹ ene. Kal᷊awọu pananěmbaěng su Baal dingangu pananěmbaěngu wuwụ apan sene e nịdal᷊enggen sire.

⁵ Wọu ene i Yosia něnutung duhing manga imang apang mẹ̌tatangkiang manga awẹ ene su wowong pananěmbaěng ene. Ual᷊ingu kawe kerene tangú i sie napakariadin Yehuda ringangu Yerusalem botonge mẹ̌kal᷊iomaneng kapia su MAWU.

⁶Hal᷊ẹ̌ mẹ̌sul᷊ung kinoạ e lai su manga soa ringangu su manga wanua kụ seng naghagholang su ěntanang Manasye, Efraim dingangu Simeon, sarang ěntanang Naftali su sěmběkan sawěnahẹ̌.

⁷Manga pananěmbaěng dingangu manga tul᷊adang Asyera su kasěllahu Kararatuang batuhu Sawěnahẹ̌ e nịdal᷊enggeng Yosia, mase manga tul᷊adane ringangu patikụ pěnanutungang buwụ e nasue nigagholọ e. Bọu ene napul᷊ẹ e i Yosia sarang Yerusalem.

⁸Su taung kapul᷊o ual᷊une su parentan Yosia, sarangke i sie wọuten něnapu pakawurěsi pěnaněmba manga awẹ bọu Wal᷊em MAWU ringangu kasěllahu dunia e, i sie něndingọ u těllung katau pěngẹ̌ngul᷊ị Bal᷊eʼm MAWU Ruata. I sire těllu ene ute kai i Safan anạ i Azalya, i Maaseya guběrnurẹ̌ u Yerusalem, dingangu i Yoah anạ i Yoahas, sěngkatau sawohị marangẹ.

⁹Apan tau Lewi kụ mẹ̌děndiagạ Tukadu Wal᷊eʼm MAWU e, něnarakang su Imang Mawantugẹ̌ i Hilkia, doitẹ̌ nạung seng nitampung i sire. Doitẹ̌ ene wọu tau Efraim dingangi Manasye, ringangu wọu kawanua wal᷊ine wọu Kararatuang u Sawěnahẹ̌, ore lai wọu manga kawanuang Yehuda, Benyamin dingangu Yerusalem.

¹⁰Doitẹ̌ ene wọu ene nisarakangu Imang Mawantugẹ̌ i Hilkia su těllung katau kụ piněhal᷊ẹ̌ baugu pěnẹ̌nitị pěngangul᷊ị Bal᷊em MAWU ene. Tuhụ e i sire nẹ̌gěllịu roitẹ̌ ene

¹¹su manga basẹ̌ u kalu ringangu basẹ u koạ u wal᷊e kụ hinong měmělli watu ringangu kalu waugu ipěngul᷊ị manga ghodoěng kụ seng niwala gholang kahiang manga ratung Yehuda.

¹²I sire kụ apang měmpěngẹ̌ngul᷊ị ene e mamben těngadẹ̌ matul᷊idẹ̌. I sire e nitěllangeng u tau Lewi ěpạ u katau: i Yahat dingang i Obaja wọu ghal᷊ipohong Merari, ringangu i Zakharia rẹ̌duang Mesulam bọu ghal᷊ipohong Kehat. Tau Lewi patikụ e tahamusikẹ̌,

¹³nionggol᷊angu karạdiahang měnitị pělahuwo manga apal᷊iwụ, měnaněllang manga mantorosẹ̌ su kal᷊awọu haghing hal᷊ẹ̌, mẹ̌karadiahang hal᷊ẹ̌ u pěmamohekang, dingangu měndiaga tukadẹ̌.

¹⁴Su tempon doitẹ̌ tatongkạ ene isěbang bọu tampạ u pěndaresoěnge, i Hilkia nakaěbạ bukẹ̌ u Titaʼm MAWU, kụ kai nạung mangạ e tita nionggọ u Mawu si Musa.

¹⁵Něberạ e i Hilkia si Safan, ”Iạ nakaěbạ bukẹ̌ u Titaʼm MAWU e su Wal᷊em MAWU,” bọu e nionggọ e bukẹ̌ ene si Safan.

¹⁶I Safan něnarimạ bukẹ̌ ene, bọu e nakoạ sol᷊ong anun datu, kụ nẹ̌bera, ”U kěbị apang nioron Tuang e seng kinoạ i kami.

¹⁷I kami e seng něngal᷊ạ doitẹ̌ kụ niresọ su Wal᷊em MAWU, ringangu něnarakangu ene su apang mělahal᷊ẹ̌ dingangu manga měnanahimatane.”

¹⁸Bọu ene nitambaěnge, ”I Hilkia něngonggọu bukẹ̌ ene si siạ.” Mase i Safan nẹ̌basang bukẹ̌ ene su ratu.

¹⁹Nakaringihẹ̌ lohong bukẹ̌ ene, datu e něnggaghehẹ pakeange ual᷊ingu susa naung.

²⁰Mase ratu e něngorong ini e si Hilkia, i Ahikam anạ i Safan, i Abdon[16] anạ i Mikha, i Safan tulị u něgara, ringangi Asaya pakiring datu,

²¹”Dakọko pakiwal᷊o su MAWU waugu iạ dingangu waugu apan taumata kụ bědang ene su Israel dingangu Yehuda mạanung lohong bukẹ̌ ini. MAWU e limangehẹ̌ si kitẹ ual᷊ingu i upung i kitẹ e tawe měndaral᷊eng u manga parenta kụ mạbawohẹ su ral᷊unge.”

²²Tangú rimal᷊engke i Hilkia, i Ahikam, i Abdon, i Safan dingangu i Asaya nẹ̌dorong sasal᷊ěntihọ su sěngkatau wawine arenge i Hulda. I sie sěngkatau nabi kụ mạtanạ su manga soa wuhu su Yerusalem. Esẹ e isẹ̌sěbạ si Salum anạ i Tikwa, pulung i Harhas.[17] I sie mẹ̌tẹ̌tangkuang pakeangu pẹ̌kakal᷊iomaneng e su Wal᷊eʼm MAWU. Sarětạeng i Hulda e nakaringihẹ̌ tatualagʼi sire e,

²³i sie něngoro si sire pẹ̌sẹ̌sul᷊e su anun datu kụ pělẹ̌habaru tatanata ini, ”MAWU, Ruata kụ sẹ̌sěmbaěngu tau Israelẹ̌ e nẹ̌bera,

²⁴’Iạ e sarung měhukungu Yerusalem dingangu kal᷊awọu tumanạ e ringangu manga laane kạbawohẹ su ral᷊ungu bukẹ̌ ene kụ iwasa waugu ratu.

²⁵I sire e seng naněntangu Iạ dingangu něnarakangu sasěmba su manga ruata wal᷊ine. Kěbị apang kinoạ i sire e makapětị bawal᷊uang-Ku. Iạ e nẹ̌pědụ su Yerusalem, kụ bawal᷊uang-Ku e tawe ikaputị.

²⁶Arawe mạanun Datu i Yosia e, tatanata-Ku e kai ini, MAWU Ruatang Israel: Sarangke i kau nakaringihẹ̌ apang kạbawohẹ su ral᷊ungu bukẹ̌ ini e,

²⁷i kau nẹ̌sasěsilẹ̌ dingangu nẹ̌těngkasanạ u watangeng su těngo-Ku. Iạ e seng němatakụ baugu měhukung Yerusalem dingangu manga tumanạ e, kaiso piạ e i kau nakaringihẹ̌ papatakụ-Ku ene tangú i kau e kimiạ kụ něnggaghehẹ pakeangu tatialang naung masusa. Iạ e sen dimaringihẹ̌ daroanu,

²⁸ual᷊ingu ene hukumang baugu Yerusalem tawe Takụ ipakanawo karěngụeweng i kau e wědang biahẹ̌. I kau e Takụ ipakawala mairị su pědarame.’ ” Tangú němpẹ̌sul᷊ẹ e manga rarolohang ene su anun datu ringangu něhabaru tatanata ene.

²⁹Datu i Yosia e nẹ̌kui kěbị pangahạ u Yehuda ringangu Yerusalem,

³⁰bọu e tamai ringang i sire sarang Bal᷊eʼm MAWU. Nẹ̌dingang i sire e timol᷊e lai manga imang, tau Lewi ringangu kakěpal᷊u kawanua, bae kasiang arau kalạ. Su těngon sire kěbị e, su rěduhu pilarẹ̌ e tani waugu ratu,[18] datu e rimarisị kụ nẹ̌basa tingihe maihạ kal᷊awọeweʼm bukẹ̌ u pẹ̌dariandi kụ seng nikaěbakeng su ral᷊ungu Wal᷊eʼm MAWU. Wọu ene ratu e nẹ̌koạ pẹ̌dariandi ringangu MAWU waugu rumaringihẹ̌ si Sie ringangu měndal᷊eng dingangu kạguwạu ral᷊ungu naung ore ringangu kasěllahu diwa patikụ tita ringangu manga toratʼE, ore lai měnukụ tiahan diandi su tal᷊oarang MAWU ringangu taumata-Ne kụ kạbawohẹ su ral᷊ungu bukẹ̌ ene.

³²Kěbị tau Benyamin dingangu kěbịewe taumata wal᷊ine e kụ ene su Yerusalem niorone pinẹ̌diandi waugu apatuhụ pẹ̌dariandi ene. Tangu apan tau Yerusalem dimaringihẹ̌ kal᷊awọu atorange su ral᷊ungu pẹ̌dariandi ene, kụ kai pẹ̌dariandi su tal᷊oaran sire ringangu Ruatang i upung i sire.

³³Kal᷊awọu awẹ kụ makatahamuta e, kẹ̌kaěbakeng su apan tampạ nasowa su ral᷊ungu wanuan tau Israel, kěbị e nikakakěngkol᷊u Ratu i Yosia. Bọu e i sie něngansang kawanuane harusẹ̌ pẹ̌kal᷊iomaneng su MAWU, Ruatang i upung i sire. Tangú karěngụeweng i Yosia e wiahẹ̌, kawanua e tatapẹ̌be satia su MAWU.