Read Sangir KARARATUANG KARUANE 35 Bible Online

KARARATUANG KARUANE 35 - Sangir bible

KARARATUANG KARUANE 35

¹Bọu e i Yosia němantugẹ̌ Paskah su Yerusalem baugu měngadatẹ̌ MAWU. Domba waugu pěmamantugẹ̌ e nipotọ su tanggalẹ̌ mapul᷊o ěpạ bul᷊ang humotong.

²I Yosia němahiạu hal᷊ẹ̌ su manga imang kụ harusẹ̌ pakihal᷊ẹ̌ i sire su Wal᷊em MAWU, ringangu i sie měngẹ̌ngansangu tadeạu i sire e měhal᷊ẹ̌ ene pakapia.

³Tau Lewi kụ seng nihae waugu MAWU e, dingangu makoạ manga mananěntiro tau Israel nakahombang parenta ini wọʼi Yosia, ”Pěllọko Petim Pẹ̌dariandiʼm MAWU kụ susi ene su ral᷊ungu Wal᷊eʼm MAWU kụ nirarisị u Ratu i Salomo ahusʼi Daud. Tawahal᷊uasu i kamene mapẹ̌papural᷊ingu ene lai. Tangkianẹ e MAWU Ruatang kamene ringangu tau Israel umatʼE.

⁴ Pẹ̌dariahị e su Wal᷊em MAWU e tuhụ komol᷊angu, natuhụewe kere su pẹ̌papahiạu munara kụ seng nitilakehẹ̌ si kau kahian Datu i Daud dingangu Ratu i Salomo e ahuse.

⁵Hundugẹ̌ko apang kamonaěngu ene pakapia hakịu sěntiniạ mang piạ bọʼi kamene kụ botonge makatul᷊ung apang kamonaěngu tau Israel su Wal᷊eʼm MAWU.

⁶I kamene harusẹ̌be pěmpěmotọ domba waugu sal᷊iwangu měmantugẹ̌ Paskah. Ual᷊ingu ene tangú riahiko watangengu tadeạu hinone maněmba MAWU, ringangu pěndiahiko l᷊ai manga sasěmba kụ hinong isěmba su MAWU, tadeạu ual᷊ingu kerene tangú apan tau Israel bal᷊inẹ e botonge měndal᷊engu apang niparentam MAWU wọʼi Musa e.”

⁷Tadeạu apan taumata kụ narěnta su sal᷊iwangu Paskah ene makapẹ̌gěllịu sasěmbaʼm Paskah, tangú Ratu i Yosia e něnongkang binatange sẹ̌sane domba 30.000 su waụ e, anạ u domba, ringangu kambing kawuhuang, ore lai sapi esẹ 3.000 su waụ e.

⁸Manga sawohị i Yosia e mal᷊aing něngonggọu tatongka waugu manga imang, dingangu tau Lewi wọu kal᷊awọu kawanua. Manga sawohị kụ nipělěngkanengu wawawaěng baugu Wal᷊eʼm MAWU, kụ kai Imang Mawantugẹ̌ i Hilkia, ringangu i Zakharia, ore lai i Yehiel, i sire těllu e něngonggọu anạ u domba 2.600 su waụ e ringangu kambing kawuhuang ore lai sapi esẹ 300 su waụ e waugu sasěmba su sal᷊iwang ene.

⁹Apam pangahạ u tau Lewi kụ: i Konanya, i Semaya ringangu i Netaneel anạu sěmbaụ e, i Hasabya, i Yeiel, dingangu i Yozabad něngonggọu su tau Lewi anạu domba 5.000 su waụ e ringangu kambing kawuhuang ore lai sapi esẹ 500 su waụ e waugu sasěmba su ral᷊ungu sal᷊iwang ene e.

¹⁰Sarětạeng kěbị e seng sadia waugu sal᷊iwangu Paskah, manga imang dingangu manga kamonaěngu tau Lewi e něngal᷊ạ tampạu sěngkatau-sěngkatau kerẹewe seng nioron datu e.

¹¹Bọu ene i sire e němotọ binatang baugu sal᷊iwangu Paskah; kụ tau Lewi e měmaměnị e ringangu manga imang e měnanambusu rahang binatang ene su wowom pananěmbaěng.

¹²Apang kamonaěng u walagẹ̌ kụ narěnta sene e nakaěbạ sěmbaụ bọu kal᷊awọu binatang kụ isěmba kere sasěmba tẹ̌tutungang. Ual᷊ingu kawe kerene tangú i sire nakapẹ̌gěllịu sasěmba tuhụ atorange kụ kaěbakeng su ral᷊ungu bukẹ̌ u Titaʼm Musa.

¹³ Bọu ene kal᷊awọu tau Lewi e němpẹ̌tongkạ sasěmban Paskah ene su wowoʼm putung, natuhụewe su pělatorang, dingangu mẹ̌tuěng manga sasěmba těntani e su ral᷊ungu kawali, kuring dingangu kaha, wọu ene ghẹ̌sine masahawụ-sahawụ ipahiạ su apan taumata e.

¹⁴Bọu ene wuhụewe tau Lewi e něndiahing bahageang e waugʼi sire hala ringangu waugu manga imang hěntong Harun. U sarang hěbi manga imang ene e mělẹ̌hal᷊ẹ̌ turusẹ̌ měmpạněmba manga binatang e kere sasěmba tẹ̌tutungang, dingangu měnẹ̌namehẹ̌ tawang manga sasěmba ene.

¹⁵ Apang masasingkạ u musikẹ̌ bọu ghal᷊ipohong Asaf su ral᷊ungu hěnton Lewi ene su pělahal᷊ěkang kụ seng nitantung Datu i Daud baugʼi sire. Seng ini e manga areng i sire e: I Asaf, i Heman, dingangi Yedutun, sěngkatau nabi kụ mělẹ̌hal᷊ẹ̌ baugu ratu. Apang měndal᷊ukadẹ̌ manga tukadu pasěllangeng tawahal᷊uasu měněntangu tampạ i sire, watụ u i sire e wotongewe makapẹ̌sal᷊iwangu Paskah e su pělahal᷊ěkang i sire e ual᷊ingu tatongkan tau Lewi e wal᷊ine.

¹⁶Su ěllo ene i sire nẹ̌koạ patikụ sạbarang kụ niparentan Datu i Yosia e waugu sal᷊iwangu Paskah, nasowa l᷊ai manga sasěmba su pananěmbaěng.

¹⁷ Pitu ěllo karěngụ e patikụ kawanuang Israelẹ̌ e kụ diměnta sene e nẹ̌sal᷊iwangu Paskah e ringangu nẹ̌sal᷊iwangu Borotẹ̌ Tawẹ Kabọ e.

¹⁸Paskah kerene tangu tawẹ banạ u wọu niwantugang kapia nanětạ bọu tempon Nabi i Samuel. Tawẹ u sarang sěngkatau wọu apan datu kal᷊imonang ene e nẹ̌sẹ̌sal᷊iwangu Paskah e kerẹewe nạung bẹ̌bantugang,

¹⁹su ral᷊ungu taung kapul᷊o ual᷊une su parentan Yosia ene, kahian datu e sẹ̌sane ringangu manga imang, tau Lewi, tau Yehuda, tau Israel ore lai tumanạ u Yerusalem.

²⁰Bọuten Datu i Yosia nẹ̌koạ kěbị ene e waugu Wal᷊em MAWU; i Nekho ratuʼm Misirẹ̌ e něngahạ buntuange mědeạu mẹ̌sekẹ su Karkemis maranin Sal᷊ụ u Efrat. I Yosia e mẹ̌dẹ̌deạ dal᷊engu mẹ̌sěding i sie,

²¹kaiso i Nekho e něndingọ u habarẹ̌ ini e si Yosia, ”Pẹ̌sasekẹ ini e wal᷊inewe piạ kaitang e ringangu e, ratung Yehuda! Iạ e riměnta wal᷊inewe waugu rumokạ si kau kaiso kawe waugu měndokạ manga sědụku, ringangu Ruata e něngoro si siạ pẹ̌kẹ̌kakanoạ lighạ. Duata e kai su sěmběkaku, ual᷊ingu ene kumbahangbe měnahaghe si Sie, kụ i kau e sarung gagholokangʼE.”

²²Arawe i Yosia e mẹ̌tẹ̌tungkětịu rumokạ, dingangu madiri tumuhụ apang kụ iweran Duata e wọu Ratu i Nekho. I Yosia e nẹ̌kuhita kụ bọu e simowa su pẹ̌seketang su wimbaengu Megido masanạ e.

²³Su ral᷊ungu pẹ̌seketang ene e, Datu i Yosia e kinahinoěngu papitị. Bọu e i sie nẹ̌parenta manga ěllange tadeạu pěngẹ̌ngahạ i sie apasěbang bọu pẹ̌seketang ual᷊ingu i sie nal᷊esẹ gẹ̌guwạ.

²⁴I sire němpěngal᷊ạ si sie wọu karetane ringangu napěngal᷊ing i sie sarang kareta wal᷊ine kụ ene sene e, bọu ene niahạ sarang Yerusalem. Sene i sie nate ringangu nilěbing su pěndal᷊ěbingang manga ratu. Kal᷊awọu kawanuang Yehuda ringangu Yerusalem němpělutung kapapohonge.

²⁵Nabi i Yeremia e nělanging kantarị sěmbua rụdal᷊umpasiangu Ratu i Yosia. Sarang orasẹ̌ ini e kakantarị ene nipakẹ u Israelẹ̌ kahiang apang mẹ̌kakantarị, baẹ esẹ arau waẹbe lai wawine, su ral᷊ungu tatahěndungu pělahampugu Ratu i Yosia. Kakantarị ene seng nisuẹ̌ su ral᷊ungu komol᷊angu manga kakantarị dal᷊umpasiang.

²⁶Běke wal᷊ine mạanung Yosia, su hal᷊ẹ̌ u tatal᷊ěntụ e su MAWU, ringangu tatuhụ e su manga titaʼm MAWU,

²⁷nimbụ e, mạanung kal᷊awọu wiong pẹ̌bawiahe wọu tětạ e sarang pěngěnsueěnge, seng niwohẹ su ral᷊ungu bukẹ̌ u Wěkem Mararatung Israel dingangu Yehuda e.