Read Sangir KARARATUANG KARUANE 36 Bible Online

KARARATUANG KARUANE 36 - Sangir bible

KARARATUANG KARUANE 36

¹Kawanuang Yehuda e němile ringangu něhengkẹ i Yoahas nakoạ datu su Yerusalem něngaweng si Yosias, i amange.

²I Yoahas umure 23 su taunge piạ i sie nakoạ datung Yehuda, ringangu i sie nẹ̌parenta su Yerusalem těllu wul᷊ang karěngụe.

³ I Nekho ratuʼm Misirẹ̌ něnaweng dingangu něhengkẹ i Yoahas sarang Misirẹ̌, bọu e i sie něngoro si Yehuda pěmẹ̌maehẹ̌ gaghěllị sal᷊aka kạguwạu 3.400 su kilone ringangu wul᷊aeng 34 su kilone. Bọu ene i sie něhengkẹ i Elyakim anạ u sěngkataung Yoahas nakoạ datu, ringangu němal᷊ui areng i Elyakim nakoạ Yoyakim. Bọu ene i Yoahas nihengkẹ e sarang Misirẹ̌.

⁵ I Yoyakim umure 25 su taunge piạ i sie naratu su Yehuda, kụ i sie nẹ̌parenta su Yerusalem 11 su taunge karěngụ e. I sie nẹ̌dosa su MAWU Ruatane.

⁶ Piạ i Nebukadnesar datum Babel němul᷊aho Yehuda, i sie něnamẹ si Yoyakim, dingangu niwawane kạbawěntung sarang Babel.

⁷Sěmbahageang bọu apal᷊iwụ mal᷊aarěga su Wal᷊em MAWU e nihengkẹ i Nebukadnesar dingangu nisuẹ̌ su ral᷊ungu istanane su Babel.

⁸Běkene wal᷊ine mạanung Yoyakim, nasowa lai manga kakanoạ e kụ marangěngisẹ̌ dingangu kal᷊awọu karal᷊akise, seng niwohẹ su ral᷊ungu bukẹ̌ u Wěkem Mararatung Israel dingangu Yehuda. I Yoyakhin ahuse naratu něngaweng si sie.

⁹I Yoyakhin umure 18 su taunge piạ i sie naratu su Yehuda, kụ i sie nẹ̌parenta su Yerusalem těllu wul᷊ang mapul᷊o ěllo karěngụe. I sie lai nẹ̌dosa su MAWU.

¹⁰ Su pẹ̌bawěllasu taung, Datu i Nebukadnesar něhengkẹ i Yoyakhin sarang Babel nakoạ tinaweng, dingangu apal᷊iwụ maral᷊ěgadẹ̌ e su Wal᷊em MAWU niwawane lai. Wọu ene i Nebukadnesar něhengkẹ i Zedekia, i empong[19] i Yoyakhin, nakoạ datu su Yehuda ringangu Yerusalem.

¹¹ I Zedekia piạ naratu su Yehuda e umure 21 su taunge. I sie nẹ̌parenta su Yerusalem 11 su taunge karěngụe e.

¹²I sie mal᷊aing nẹ̌dosa su MAWU Ruatane. I sie mạdiri mẹ̌těngkasanạ u watangeng dingangu tawe tumuhụ su Nabi Yeremia kụ měhabaru tatanataʼm MAWU e si sie.

¹³ Datu i Nebukadnesar seng něnihasa i Zedekia apẹ̌sẹ̌salu su arengu Ruata u i sie sarung mẹ̌těngkasatia si Nebukadnesar. Arawe wọu ene i Zedekia něnggohaeng su těngon Nebukadnesar. I Zedekia mẹ̌tẹ̌tungkětịu těmbọ e su MAWU, Ruatang Israel. I sie mạdiri měněntangu manga rosane ringangu mạdiri mẹ̌sul᷊e su anung MAWU.

¹⁴Su l᷊iung ene, Wal᷊em MAWU e kụ seng nihaeng MAWU hala waugu watangengʼE, nilamuhukangu manga těmbonangu Yehuda, manga imang, dingangu kawanua, ual᷊ingu i sire mal᷊aing němpẹ̌suba awẹ dingangu tụtol᷊e kakakoạ u pẹ̌bawiahu taumata warạdosa e wọu apaʼm bansa su rěduhʼi sire e.

¹⁵MAWU Ruata i upung i sire e, seng masau-sau měndolohu manga rarolohangʼE mapẹ̌tahěndung u manga umatʼE, ual᷊ingu i Sie e makěndagẹ̌ si sire e ringangu su wal᷊e-Ne.

¹⁶Arawe i sire e měmpẹ̌tẹ̌taghunalangu manga rarolohangu Mawu ene, ringangu měmpạhul᷊ěgeng manga nabi-Ne ringangu tawe mẹ̌papandung kal᷊awọu wawera-Ne. Pěngěnsueěnge MAWU e apạ e limangehẹ̌ si sire hakịu semben tawẹ apa lai sasẹ̌bangeng i sire e mědeạu mal᷊iwirẹ̌ bọu hukumangʼE.

¹⁷ MAWU e něnganoạ naungu ratuʼm Babel tadeạu měnekẹ si sire. Datu ene němate tau Yehuda apang kawuhuang, nasowa l᷊ai si sire apan su ral᷊ungu Wal᷊eʼm MAWU. I sie tawe kumakěndagu sarang sěngkatau, maghurang arau mangangudạ, manga esẹ arau manga wawine, masakị arau mahuweka. I sire kěbị e nisarakangu Ruata e su ratuʼm Babel.

¹⁸Manga apal᷊iwụ u Wal᷊eʼm MAWU e, ringangu manga apal᷊iwụ e kụ mal᷊aarěga e, kerene lai manga arětạ u ratu ringangu apan sawohị e, kěbị e nipul᷊ahon datuʼm Babel ene wọu e niwawa sarang Babel.

¹⁹ I sie něněnehẹ̌ meselu soang Yerusalem dingangu něnutung soa ene, nasowa lai Wal᷊em MAWU ringangu patikụ istana ringangu manga apal᷊iwụ maarěga kụ bědang ene su ral᷊ungu istana ene.

²⁰Kawanua apan nal᷊iwirẹ̌ e nihengkẹ e sarang Babel. Paị sene i sire nakoạ ěllange ringangu ěllangu manga hitene sarang tempong kararatuangu Persia e nẹ̌kawasa.

²¹ Kerene nariadi apang kụ niweraʼm MAWU wọʼi Yeremia u wanua ene sarung tawẹ sasuange, karěngụ u 70 su taunge kere laaweng taung u manga Sabatẹ̌[20] kụ sen tawe laarěgaěng.

²²Su taung humotong pẹ̌paparentang Kores, datuʼm Persia e,[21] MAWU nẹ̌koạ apang kụ seng nipẹ̌hengetangʼE wọu Nabi i Yeremia. MAWU něnganoạ naung i Kores baugu apěněbangu parenta sěmbaụ kụ iwasa su kạguwạu kararatuange. Bawerane kirini:

²³ ”Seng ini e parentang Kores, datuʼm Persia. MAWU, Ruata měngangawasa su sorga e seng napakariading iạ e ratu su kasěllahu dunia, ringangu něngoro si siạ pěmẹ̌mětị bal᷊e waugʼi Sie su Yerusalem su wanuang Yehuda. Kụ i kamene kěbị e apan nakoạ umatu Ruata e harusẹ̌ pẹ̌sul᷊e sarang paị ene! Karimạko MAWU Ruatanu e maněntanudẹ̌ si kamene.”