Read Sangir KARARATUANG KARUANE 5 Bible Online

KARARATUANG KARUANE 5 - Sangir bible

KARARATUANG KARUANE 5

¹ Sarangke nasueng koạ e Wal᷊em MAWU ene, tangú Ratu i Salomo něndesọeng kěbị apal᷊iwụ nikoạ bọu sal᷊aka, wul᷊aeng, dingangu manga apal᷊iwụ bal᷊ine, kụ nạung nisěmbang Daud i amange su MAWU Ruata su ral᷊ungu manga ghodoěng su Wal᷊em ene.

² Bọu ene Ratu i Salomo nẹ̌parentạ e su patikụ těmbonangu wansa ringangu hiteng kawanuang Israelẹ̌ pinẹ̌komol᷊ẹ̌ su Yerusalem, tadeạu měngal᷊ingu Petim Pẹ̌dariandim MAWU wọu Sion, Soan Daud[5] sarang Bal᷊em MAWU.

³Tangú nahunděntạ e kěbị i sire su ěllon Sal᷊iwang u Selon Daukalu.

⁴Sarạeng manga těmbonange natampung, ghal᷊ipohon Lewi e němasaěngke Petim Pẹ̌dariandi ene,

⁵kụ nịbawawạ e sarang Bal᷊em MAWU. Tentam MAWU dingangkewen patikụ kakakoạ e nial᷊ingke lai sarang Bal᷊em MAWU, nakoạ munaram manga imang dingangu taumatan Lewi.

⁶Ratu i Salomo ringangu patikụ kawanuang Israel nẹ̌komol᷊ẹ̌ su těngom Petim Pẹ̌dariandi ene, mase naněmba su MAWU Ruata, domba, sapi hakịen ta nakarekeng kal᷊awọe.

⁷Bọu ene manga imang něnuẹ̌ e Petim Pẹ̌dariandi su ral᷊ungu Wal᷊em MAWU kụ nịpapěllọ e su al᷊ungu tul᷊adang kerub su ral᷊ungu Huang Kasusiange.

⁸Panidu tul᷊ada ene nawingkahẹ̌ hakịu nangěllungke Peti ene ringangu kaluʼm papasanengange.

⁹Kalum papasanengang manandụ kahěngang, hakịu pondol᷊e kinasilo wọu těngong Huang Kasusiange, kaiso ta ikasilo wọu likude. (Sarang orasẹ̌ ini manga kalu ene wědang ene paịse.)

¹⁰ Su ral᷊ungu Petim Pẹ̌dariandi ene tumbạben batu ruang kal᷊ěpa. Batu ene nạung nitahong Musa su Wul᷊udu Sinai, su tempong MAWU Ruata e němatom pẹ̌dariandi ringangu tau Israel, su tempong i sire suraral᷊engang bọu Misirẹ̌ sarang soang Kanaan.

¹¹ Patikụ manga imang kụ ene sene, bọu kěbị ghal᷊ipoho němpẹ̌sasadiạeng batangeng i sire timuhụ adatẹ̌ ene. Kěbị mẹ̌kakantarị dingangu měnanalang u musikẹ̌ su ghal᷊ipohong Lewi, kụ i Asaf, i Heman, i Yedutun dingangu patikụ kawanuan sire e něluhe en lakụ bọu hekạ leneng. Ghal᷊ipohon Lewi rụdarisị su sěmběkan dakị wọu pananěmbaěng kụ kapěngumpelẹ e simbal ringangu kěcapi. Dingang i sire piạ lai 120 su kataune manga imang kạpẹ̌nẹ̌niụ e slompretẹ̌. Tingihu kakantarị e nasěmbaụ dingangu tingihu slompretẹ̌, simbal dingangkeweng apal᷊iwụ u musikẹ̌ bal᷊inẹ. Tangú ini e kai waweran daralon sire su MAWU Ruata: ”Pẹ̌daloko MAWU Ruata, batụu i Sie kai mapia. Kakěndage tạ kahěpusange.” Su tempom manga imang siměbangke wọu ral᷊ungu Wal᷊em MAWU ene, sěngkianu Wal᷊e ene natualagen darěntam MAWU, hakịu i sire ta nakatěpasu raralon sire.