Read Sangir KARARATUANG KARUANE 7 Bible Online

KARARATUANG KARUANE 7 - Sangir bible

KARARATUANG KARUANE 7

¹ Sarạen Datu i Salomo nasuen doane, putunge nanawo wọu l᷊angị kụ něhěngisẹ̌ manga sasěmba su MAWU Ruata. Mase tualagu rarěntan MAWU nal᷊iwung su ral᷊ungu Wal᷊em MAWU ene,

²hakịu manga imang ta nakasuẹ̌ su ral᷊unge.

³ Suapạeweng kawanuang Israelẹ̌ e nakasilo putung nanawo wọu l᷊angị dingangu tualagu rarěntan MAWU němenẹ e Wal᷊em MAWU, i sire měngkate němpěmul᷊angeng mase němpẹ̌suba kapẹ̌pudine Mawu Ruata, ual᷊ingu kai mapia ringangu makěndagẹ̌ sarang kakalẹ̌.

⁴Bọu ene Ratu i Salomo ringangkeweng kal᷊awọu taumata kạtatampung sene něngonggọen sasěmba su MAWU Ruata.

⁵Baugu sasěmbam pẹ̌darame i Salomo naněmbạen sapi 22.000 su waụ e, dingangu domba 120.000 su waụ e. Kerene ratu ringangkeweng anạ u kawanua nẹ̌koạ sal᷊iwang u pěnanarakang u wal᷊em pẹ̌kakal᷊iomanengang e su MAWU Ruata.

⁶Manga imang dụdarisị su tampạewe seng nịsadia waugʼi sire; mẹ̌tẹ̌těngọewen tau Lewi kapẹ̌dědalone su MAWU ringangkewen pakakasʼu musikẹ̌ nipakikoạ u Ratu Daud apidẹ̌ měkẹ̌kantarị u kakantarị, ”KakěndagʼE Tạkahěpusange,” kerẹewe parentan Daud. Manga imang mẹ̌tẹ̌tiụ napiri arawe kawanua mạhundarisị.

⁷Mase tal᷊oaran dumaẹ těngon bal᷊en pẹ̌kakal᷊iomanengang ene nighěllị i Salomo su MAWU. Bọu ene i sie něměllọen sasěmba tẹ̌tutungang, sasěmba wọu gandung dingangu tawang binatang nakoạ sasěmbam pẹ̌darame. Kěbị tamai ene nikoạ e sene watụ u rapuhang tambaga kinoạ e tumanịu kadodọ pěměloěng u sasěmba tamai ene.

⁸I Salomo ringangu patikụ kawanuang Israelẹ̌ nẹ̌koạ e sal᷊imbangu Selon Daukalu su ral᷊ungu pitu ěllo. Apạewe lawọ taumata nakomol᷊ẹ̌ su sal᷊imbang ěndaị e. I sire nahunděnta wọu wanua marau karauang u Hamat su sěmběkan sawěnahẹ̌ sarạeweng pẹ̌saraěng u Misirẹ̌ su sěmběkan timuhẹ̌.

⁹Pitu ěllo karěngụ e i sire mẹ̌tẹ̌tampung su sal᷊imbangu rumangeng su wal᷊em pěnaněmbaěng su MAWU, mase pitu ěllo lai mẹ̌sal᷊imbangu Selon Daukalu. Su ěllo pangěnsuenge nẹ̌koạ e sal᷊imbangu pěngangunsị,

¹⁰su sěngkarịěllone su tanggalẹ̌ duam pul᷊o těllu bul᷊ang kapitune, i Salomo e něndoloheng kawanuane nipakapul᷊ẹ. I sire nahul᷊uasẹ̌ su kěbịewe apang mapia kụ seng kinoạ u MAWU su kawanuang Israel umatʼE, si Daud ringangkewen si Salomo.

¹¹Sarětạeng i Salomo nakasuẹ e pěmamangung Bal᷊em MAWU dingangkewen bal᷊eng kararatuang tuhụewe ol᷊ange,

¹²MAWU Ruata e nẹ̌těngkatodẹu watangengʼE si Salomo su tempong hěbi. MAWU Ruata něhengetang, ”Kakahiorọ u Takụ niraringihang, Iạ e měnarimạ u wal᷊e ini makoạ tampạ u pěnaněmbaěng si Siạ.

¹³Kereu Iạ ta maparěntan tahiti arau kal᷊imbotong ipěnahangesẹ̌ gěsin sasuang arau sahindạ masaria su patikụ kawanua-Ku,

¹⁴mase i sire apang masingkạ u areng-Ku ene, mẹ̌těngkasanạ u watangeng kụkahiorọ su těngo-Ku dingangu měněntangbeng kakakoạ i sire ral᷊aị, ute wọu sorga Iạ e rumaringihẹ̌ kakahiorọ i sire. Iạ e měngampung patikụ dosan sire, kụ mapakakoạ e wanuan sire mahughẹ̌si saụ.

¹⁵Iạ e tinalung mẹ̌kakělla Wal᷊e-Ku ini dingangu tinalung dumaringihẹ̌ apang kụkahiorọ kụ ilẹ̌humpạ bọu tampạ ini.

¹⁶Kěbị tamai ene mang Takụ sěmpikang batụu tampạ ini e sen Takụ pinile ringangu Takụ nihae makoạ tampạ u pẹ̌kakal᷊iomanengang Siạ su kanandun tempo. Iạ e mamben tatapẹ̌ kụkakělla ore lai měndiagạ su kanandun tempo.

¹⁷U kamagengu i kau kerẹewe i amangu i Daud mẹ̌bẹ̌biahẹ̌be tụtuhụ kapulu-Ku, dingangu mẹ̌sẹ̌sěmpịbe manga toratẹ̌-Ku, mase mẹ̌kẹ̌koạ bue parenta-Ku,

¹⁸ ute Iạ e sarung měngganapẹ̌ diandi-Ku si amangu i Daud, mangal᷊ene u mang piạ sěngkatau wọu pal᷊ahitene mariadi ratung Israelẹ̌.

¹⁹Kaiso, kamagengu i kau ringangu kawanuanu lumampa haghin toratẹ̌ dingangu parenta-Ku, dingangu l᷊ai maněmba mahan duata,

²⁰ute Iạ e měněbang i kamene wọu wanua Takụ nighěllị si kamene. Iạ e mal᷊ain měněntang u wal᷊e ini, manimben seng Takụ nitantu makoạ tampạ u pěnaněmbaěng si Siạ. Suapan tampạ bal᷊e ini sarung heghesang dingangu ipahul᷊ěge.

²¹Bal᷊em pẹ̌kakal᷊iomanengang měngkate bẹ̌bantughang, kai su tempo ene, taumata kụ apan sụsahe sene měngkai dụdal᷊inaụ makasilo. I sire měngkate měbẹ̌bera u, ’Kawe unụ e MAWU někoạ kerene su soa ene ringangu wal᷊e ěndai e?’

²²Mase taumata simimbangke, ’Batụu i sire kawe naněntang u MAWU, Ruatan sire, nạung něnondam manga i upung i sire siměbang bọu Misirẹ̌. I sire kai naněmba ringangu nẹ̌diandi mẹ̌těngkasatia su mahang duata wal᷊ine. Hakịu ene MAWU Ruata naparěntan silakạ ini si sire.’ ”