Read Sangir KARARATUANG KARUANE 8 Bible Online

KARARATUANG KARUANE 8 - Sangir bible

KARARATUANG KARUANE 8

¹I Salomo namětị e Wal᷊em MAWU ringangu wal᷊em mararatu ghěnnangu 20 su taunge.

²Mangạ e soa nighěllị u Ratu i Hiram si sie měngkai nikoạ e lai, mase nẹ̌parenta kawanuang Israelẹ̌ pinẹ̌tanạ sene.

³I sie něhampasẹ̌ beọ u Hamat dingangu Zoba,

⁴bọu ene napakatoghasu soan Tadmor su wanua l᷊inggi, mase namětị kapia kěbịewe wanggilu pěndaresoěng kaěng su Hamat.

⁵Soam Bet-Horon-Marangẹ dingangu Bet-Horon-Masanạ nikoạ e kapia, nakoạ soa ghagherẹ piạ darěndunge kụ nikoatengke tukade piạ kakunsị e.

⁶Nịkakoạ e lai saụ soang Baalat, dingangkeweng patikụ soa pěndaresoěng u kaěng, ore lai kal᷊awọu soa kụ nakoạ tampạ u karetam pẹ̌seketang dingangkeweng kawal᷊one. Kěbị apang ol᷊ange nipakasěhụ su Yerusalem, Libanon dingangu su patikụ beọ e kụ kẹ̌kawasaěnge seng nikoạ.

⁷Kěbị pal᷊ahiteng kawanuang Kanaan tawe nasueng patene kahian tau Israel, su tempong i sire němul᷊aho soa ene, kụ nasuen sihasane piněhal᷊ẹ̌ kahian Salomo. I sire kai taumatan Het, Amori, Feris, Hewi ringangu Yebus. Sarang tempo ini pal᷊ahiten sire mang těbe nakoạ ěllang.

⁹Tau Israelẹ̌ tawe piněhal᷊ẹ̌ su lahěgisẹ̌. I sire nakoạ prajuritẹ̌, pěrwira, komandaěngu kareta mẹ̌sasekẹ dingangu wuntuangu sordado piạ kawal᷊one.

¹⁰Dua hasụ l᷊imam pul᷊o su kataune mělahal᷊ẹ̌ nighěllirang u munara ipẹ̌děndiagạ, mělahal᷊ẹ̌ su kěbịewe apang kẹ̌koateng.

¹¹I Salomo něngal᷊ingkeng kawinge, anạ u ratung Misirẹ̌ bọu Soan Daud sarạeweng bal᷊e nikoạ e waugʼi sie. I Salomo nẹ̌tiněnna, ”Kawingku tawẹ hinone mẹ̌tanạ su wal᷊en datu nikoạ i Daud, datun Israelẹ̌, batụu kěbị tampạ suapang Petim Pẹ̌dariandi nạung nịpapěllọ ene kai tampạ susi.”

¹²I Salomo nẹ̌bawạ e sasěmba tẹ̌tutungang su MAWU Ruata su wowom pananěmbaěng nạung nirarisị i sie su těngom Bal᷊em MAWU.

¹³ Manga sasěmba ene nituhụ e kere su atorangu Toratʼi Musa waugu apang ěllo masaria: ěllon Sabatẹ̌, ěllon Bul᷊ang Buhu masaria, ringangu ěllon taung masaria tatěllu, kụ kai ěllom Borotẹ̌ Tawẹ Kabọ e, ěllon Pěmaměnsạ masaria, ringangu ěllon Selon Daukalu masaria.

¹⁴Kerẹewe manga atorʼi Daud i amange, tangú i Salomo naměhịeng manga hal᷊ẹ̌ ěllo-ěllo waugu manga imang dingangu waugu taumatan Lewi kụ hinong mẹ̌kantarị u raralo su MAWU dingangkewe mẹ̌sasumbala manga imang kamagengu měndal᷊engu atorangu pẹ̌kakal᷊iomaneng. Kerene lai manga měndariagạ Bal᷊em MAWU nịpapahiạ e pirang kamonaěng su kal᷊awọu tukadẹ̌ sasuěkang mẹ̌sul᷊ungkewen niwěhị i Daud ěllangu Ruata.

¹⁵Kěbịewe apan niwěhị i Daud su manga imang dingangu taumatan Lewi, mạanuẹng manga gudang dingangkewen manga hal᷊ẹ̌ bal᷊inẹ, nịtatol᷊eěnge maunsui.

¹⁶Tangú nasuẹ e munara pěmamětị bal᷊e ilẹ̌ol᷊ang i Salomo. Kěbị karadiahang, nanětạ bọuteng pěmaměllọ u watu wawuku, sarang nasue Wal᷊em MAWU, měngkai nihal᷊ẹ̌ maudupẹ̌.

¹⁷Bọu ene i Salomo nakoạ sol᷊ong Ezion-Geber dingangu Elot, manga soan pěmamal᷊angoěng su Wěngạ u Akaba su soang Edom.

¹⁸Ratu i Hiram něndingọeng kapal᷊ẹ̌ pirang gẹ̌sa, kapiteěnge wobaton Hiram, dingangkeweng sasakene mal᷊ahumpia si sie. I sire něbuạ sol᷊ong soang Ofir dingangu wobaton Salomo, kụ nělurangkem bul᷊aeng 15.000 su kilo harange, mase nịbawawa su anun Salomo.