Read Sangir KARARATUANG KARUANE 9 Bible Online

KARARATUANG KARUANE 9 - Sangir bible

KARARATUANG KARUANE 9

¹ Ratun soan Syeba wawine e nakaringihẹ̌ kereapa kapelesan Salomo. Tangú i sie riměntạ e su Yerusalem, mẹ̌manikạ si Salomo ringangu kakiwal᷊o makakětị. I sie riměnta ringangu ghapaěngu tumatol᷊e mal᷊awọ dingangu onta natihuben lurang dampa, batung paramata dingangu wul᷊aeng apa mal᷊awọ. Su tempong nẹ̌sombangken Salomo, ratu wawine ene něgěllịeng haghing kakiwal᷊o hinong katiněnnaěnge.

²Kěbịewe kakiwal᷊o ene kinasimbaheng i Salomo, tawẹ u sarang sěmbaụ kakiwal᷊o ene kụ makětị si sie.

³Datu wawine ene nakasahidi hala, apạ e kapelesane i Salomo. I sie nakasilo istana kụ nipětị i Salomo,

⁴atoru hal᷊ẹ̌ u tumatimbange su wal᷊en datu, pakeange ghahị e sěmbaụ dingangkewem bal᷊e katatanakengi sire. I sie nakasilo simokol᷊ẹ̌ kạpapěllọ dingangu lakụ u manga mẹ̌sasiliwirẹ̌, su tempon měsẹ̌siliwirẹ̌ su sal᷊imbang, i sie mal᷊aing nakasilo sasěmban Salomo su Wal᷊em MAWU. Kěbị ene tangú nakananiang dingangu nakawirahi ratun soan Syeba wawine.

⁵Tangú nẹ̌berạ e i sie su Ratu i Salomo, ”Patikụ apang kụ nikaringihẹ̌ku su wanuaku mạanuen Tuang, dingangu kapelesan Tuang, mambeng kahěngang!

⁶Bědang kangerẹ iạ e tawe pangimangeng, kaiso sarětạeng iạ diměnta sini, kụ nakasilọ e kěbị ene dingangkewem mataku hala, buhụ e iạ nangimang. Kahěnga-hěngang, patikụ apang kụ ikẹ̌karingihẹ̌ ene tawe nakareạ sitenga wọu seng takụ kinasilo orasẹ̌ ini. Nal᷊ahẹ e u kapelesa ringangu kakakalạ i Tuang e něngalembong kasariane wọu teweng apang kụ ipẹ̌paul᷊ị si siạ e.

⁷Ene e pal᷊ede kapiange manga wobato mẹ̌tatangkiang si Tuang kụ tinalung mẹ̌munara waugʼi Tuang hakịu makạdingihẹ̌ bọʼi Tuang sẹ̌sane patikụ těntirong kapelesa!

⁸Dalo su MAWU, Ruata sẹ̌sěmbaěng i Tuang! Kai sen něhengkẹ nakoạ datu tadeạu mẹ̌parenta su arengʼE, i Sie nělahẹeng kakěndage si Tuang. Ual᷊ingkeng i Sie kụkěndagʼu wansang Israel dingangu i Sie mapulu, tadeạu i sire mang tatapẹ̌ ene, ute i Sie něhengkẹ i Tuang kinoạ datun sire, tadeạu i Tuang mapạkatein toratẹ̌ dingangu kaadilẹ̌.”

⁹Bọu e ratun soan Syeba wawine e něnarakangke si Salomo haghin siděka nạung sen nịbawawane, kerẹ e wul᷊aeng kadiọ 4.000 su kilone, batum paramata mal᷊awọ lai, dingangu manga rampa. Bědang ta nakaěbạ i Salomo dampa kụ kereneng kapiane, mẹ̌sul᷊ungkeng gaghěllị u ratun soan Syeba wawine si sie. (

¹⁰Manga taumatan Datu i Hiram dingangu manga taumatan Datu i Salomo němpẹ̌bawa wul᷊aeng bọu Ofir baugʼi Salomo, mal᷊aing nẹ̌bawa paramata dingangkeweng kalun cěndana.

¹¹Kalu ene nipakẹ i Salomo e waugu pẹ̌koạ tumbal᷊atung su Wal᷊em MAWU ringangu su wal᷊en datu, dingangkewen nikoạ kěcapi, ringangu gambus baugu mẹ̌kakantarị. Hal᷊ẹ̌ tamai ene e wědang tawẹ apa su soan Yehuda.)

¹²Su l᷊ikudeweng bawal᷊isẹ̌ poroseěng i Salomo, tangú i Salomo e mal᷊aing mẹ̌gěllịu apạewen dẹ̌dorongang u Ratun soan Syeba wawine e. Bọu ene napul᷊ẹ e ratu wawine ene sol᷊ong soane ringang patikụ tumatakinge.

¹³Apan taung Datu i Salomo makạtarimạ maraning 23.000 su kilone wul᷊aeng,

¹⁴bědang tanạdekeng manga balasteng bọu manga tahawạdola ringangu taharagang. Manga ratung Arabẹ̌ dingangu manga těmbonangu Israelẹ̌ mal᷊aing něgěllịu wul᷊aeng dingangu sal᷊aka si sie.

¹⁵I Salomo nẹ̌koạ e 200 su wuane kěllung masasaria wọu wul᷊aeng sinopu, kěllung sěmbaụ nịkakoạ bọu wul᷊aeng mangạe pitung kilo.

¹⁶I sie nakisěsal᷊ẹ̌ lai kěllung bul᷊aeng daridị 300 su waụ e. Bul᷊aeng nisěsal᷊ẹ̌ baugu apang kěllung sěmbua aramanung mangawe 3 kilo, kěbị e wọu wul᷊aeng sinopu. Kěllung ěndaị e nipěllọe su ral᷊ungu wanala arenge ”Wanalang Undangeng u Libanon”.[6]

¹⁷Datu e mal᷊ain někoạ kaderan kararatuang sěmbaụ masaria, wọu ual᷊a kụ nilěnggihangkem bul᷊aeng tuhasẹ̌.

¹⁸Kadera ene piạ e takiahe, kụ su ruam běka e piạ e tul᷊adan singa. Kadera ene nikoatengke tumbal᷊atunge ěnnungu waụ dingangkewen pěmamělloěngu laedẹ̌ nihawengang u wul᷊aeng. Tatadaěng ěndaị e nikoạ sěmbaụ dingangu kadera ene.

¹⁹Su pondol᷊e kaihi ringangu koaneng suapan tumbal᷊atungu kadera ene piạ e tul᷊adan singa — kěbị e mapul᷊o dua su waụ e. Tawẹ apa sul᷊unge kadera ene su kararatuang bal᷊ine.

²⁰Kěbị apal᷊iwụ u pěnganginumang i Salomo nikoạ bọu wul᷊aeng, kěbị apal᷊iwụ su ral᷊ungu Wanalang Undangengu u Libanon mal᷊ain nikoạ bọu wul᷊aeng tuhasẹ̌. Su tempon Datu i Salomo, sal᷊aka e nakoạ tạ arěgane.

²¹I Salomo e měnẹ̌naghuang kapal᷊ẹ̌ gagherẹ lawọ iapạtondo su l᷊audẹ̌ mal᷊oang dingangkeweng manga kapal᷊u Ratu i Hiram. Těllu taung sěnsul᷊e manga kapal᷊ẹ̌ ene mẹ̌sul᷊e mělurangkem bul᷊aeng, sal᷊aka, ual᷊a, baha, ringangu manụ murai.

²²Datu i Salomo limembong kakalạ e ringangu kapelesane wọu ratu wal᷊ine su dunia.

²³Patikụ datu mapulu mẹ̌sombang i Salomo, dumaringihẹ̌ těntirong kapelesa nionggọ u Mawu Ruata si sie.

²⁴I sire mang nahunděnta apidẹ̌ nẹ̌bawa ghaghěllị si Salomo. I sire e němpěgěllịen sal᷊aka, wul᷊aeng, pakeang, pakakasu pẹ̌seketang, manga rampa, kawal᷊o, bagal᷊ẹ̌. Kerene kẹ̌koateng i sire apan taung.

²⁵ Datu i Salomo mal᷊aing mẹ̌naghuang ěpạ u hiwu su waụ e těndạ pělahikinang kawal᷊o dingangkeweng karetane. Kawal᷊o pẹ̌seketang mapul᷊o dua su hiwune. Sěnggạ e nipěllọ e su Yerusalem, arawe wal᷊ine ute nipẹ̌papahiạ su kal᷊awọu soa katatampungang apang karetaʼm pẹ̌seketang.

²⁶ Kawasane masěllahẹ̌ su patikụ datu su weọ e wọu Sal᷊ụ u Efrat sarangkewen soan Pilistin dingangu pẹ̌saraěng u Misirẹ̌.

²⁷ Su tempon Salomo mẹ̌pẹ̌parenta, sal᷊aka e nakoạ apal᷊iwụ tạ arěgane su Yerusalem, mẹ̌sul᷊ungkewen batu, ringangu kalun cěmaran Libanon kai lawọ kahěngang mẹ̌sul᷊ungu kalung ara.

²⁸ I Salomo nakiringọeng kawal᷊o wọu Misirẹ̌ dingangu wọu soa wal᷊ine.

²⁹Běke wal᷊ine mạanun Salomo wọu tětạ e sarang pěhěpusange seng kạbawohẹ su ral᷊ungu bukẹ̌ u Wěken Nabi Natan dingangu su ral᷊ungu bukẹ̌ u Nubuetʼi Ahia tau Silo ringangu su ral᷊ungu bukẹ̌ u Papasilon Nabi Ido, kụ mal᷊aing němohẹ u wěkem pẹ̌paparentan Yerobeam datung Israelẹ̌.

³⁰Ěpạ u pul᷊o su taunge karěngụ e i Salomo mẹ̌pẹ̌parenta su Yerusalem su kaguwạu Israelẹ̌.

³¹Mase i sie nate e kụ nilěbing su Soan Daud. Bọu ene i Rehabeam anạ e esẹ nakoạ datu něngaweng si sie.