Read Sangir ESRA 10 Bible Online

ESRA 10 - Sangir bible

ESRA 10

¹Těntal᷊ang i Esra mědẹ̌doa apidu kạkiạ e ringangu něngaku rosa su těngom Bal᷊em MAWU, mal᷊awọ kahěngang tau Israel riměnta nẹ̌tampung, baẹ manga esẹ, arau wawine ringangu manga rariọ. I sire němpělikụ apidu kạpahungkiạ e mal᷊aihạ.

²Bọu ene i Sekhanya anạ i Yehiel wọu ghal᷊ipohong Elam nẹ̌bera si Esra, ”I kami e nẹ̌dosa su MAWU ual᷊ingu seng nẹ̌kawingu wawine tau raghị. Maningbe kerene mang bědang piạ u pěharapeng baugu Israel.

³Mahịe i kitẹ mẹ̌salu su Ruata, u i kitẹ sarung měnokol᷊u kěbị manga wawine ene ringangu manga anạ i sire. I kami e sarung tumuhụ kal᷊awọu sasanu ringangu sasasan taumata wal᷊ine kụ mạngadatẹ̌ titam Mawu Ruata. I kami e sarung tumuhʼu Toratʼu Mawu Ruata.

⁴Seng i kau e harusẹ̌ mẹ̌sěmpị ene. I kami hědo měnongkạ si kau sěngapam botonge. Pẹ̌karạdiahangke pakasahẹ sarang maghanapẹ̌.”

⁵Tangu nanětạe i Esra nẹ̌kakanoạ. I sie rimolohu manga imang těmbonang e, tau Lewi ringangu taumatang Israel bal᷊ine nẹ̌salu u i sire sarung měndal᷊eng u těgung Sekhanya ene.

⁶Bọuteng i sire nẹ̌salu, rimal᷊engke i Esra wọu těngom Bal᷊em MAWU e ringangu simuẹ̌ su ral᷊ungu tampạ katatanakeng i Yohanan anạ i Elyasib kụ nẹ̌tikị sene.[16] I sie mạdiri kumaěng arau měnginung ual᷊ingu susa naung mẹ̌tẹ̌tiněnnang kakanoạu taumata nawembang ene.

⁷Bọu ene nipẹ̌dal᷊ahabare malumatě sěmbạu su kaguwạu Yerusalem dingangu Yehuda su kěbị taumata apang nẹ̌sul᷊e wọu pinamembangeng, tadeạu pẹ̌tampung su Yerusalem.

⁸I sai-sain tawe riměnta su ral᷊ungu 3 ěllo, sarung galedang kal᷊awọu arětạ e ringangu i sie sen tawe lai irekeng kawanua. Malumatẹ̌ ene nitekenang u těmbonang u kawanua.

⁹Ral᷊iu u těllu ěllo su tanggalẹ̌ 20 wul᷊ang kasione, kal᷊awọu manga esẹ kụ mạtanạ su wanuang Yehuda ringangu wanuam Benyamin diměnta sarang Yerusalem kụ nẹ̌tampung su rělahu Wal᷊em MAWU. Su tempo ene tahiti rimasehẹ̌ mal᷊awọ-l᷊awọ. Kal᷊awọu taumata němpẹ̌kěnde kahian těhoʼm banua ringangu lai ual᷊ingu pandungangu pẹ̌sasombang ene.

¹⁰Bọu ene i Esra rimarisị kụ nẹ̌bisaran sire. I sie nẹ̌bera, ”I kamene seng nẹ̌dosa ringangu něnamba pẹ̌sasal᷊ang Israel ual᷊ingu nẹ̌kawingu wawinen taumata raghị.

¹¹Ual᷊ingu ene, akụ e rosanu e su MAWU, Ruata kụ sẹ̌sěmbaěng u manga i upung i kitẹ, dingangu koạ e apang kụ makạl᷊uasẹ̌ naungʼE. Pẹ̌teghangkon taumata raghị kụ mạtanạ su wanuang kitẹ dingangu tokol᷊ẹ̌ko apang kawing i kamene wọu tau raghị ene.”

¹²I sire simimbahu tingihi sire maihạ, ”I kami e sarung tumuhụ sasasanu.”

¹³Mase angkuěng i sire kapia, ”Katewe apan nahunděnta sini e mal᷊awọ-l᷊awọ dingangu tahiti e enẹ e masuwenehẹ̌. I kami e tawe makararagẹ̌ dumarisị su l᷊ikude kirini. Kutẹu lai ini e wal᷊inewe hal᷊ẹ̌ masue su sěhěllo arau rua ěllo, u mal᷊awọ kahěngang bọi kami e nasangkong su ral᷊ungu rosa ini.

¹⁴Apakawalako apan těmbonang i kami e pakatanạ su Yerusalem kụ pěngurusẹ̌ hal᷊ẹ̌ ene. Bọu e apan taumata su manga soang kami, kụ piạ kawinge wọu taumata raghị e, harusẹ̌ songo su tempo kụ seng nitantu e, sěngkahindọ u manga těmbonange ringangu apang mělahukungu soane sěmbaụ-sěmbaụ. Ual᷊ingu kawe kerene tangʼu Duata e sen tawe lumangehẹ̌ kapia si kitẹ ual᷊ingu hal᷊ẹ̌ ene.”

¹⁵Tawẹ u sarang sěngkatau kụ deng mẹ̌kabaratang u karaki ene, sul᷊ikudi i Yonatan anạ i Asael dingang i Yahzeya anạ i Tikwa, tẹ̌tongkaěngu tau Lewi ruang katau, i Mesulam dingangi Sabetai.

¹⁶Taumatam pinamembangeng kụ seng nẹ̌sul᷊e ene tatapẹ̌be měndal᷊engu karaki ene, ual᷊ingu ene, Imang i Esra němile[17] pirang katau wọu tal᷊oarang manga těmbonangu ghal᷊ipoho, bọu ene měmohẹ u areng i sire. Su tanggal᷊ẹ̌ humotong bul᷊ang kapul᷊one, i sire nanětạ e nẹ̌komol᷊ẹ̌ mahumbisara waugu měmarikěsa hal᷊ẹ̌ ene.

¹⁷Su ral᷊ungu 3 wul᷊ang tuhụ e nakakoạ e i sire něngěnsue pěmamarikěsa kal᷊awọu manga esẹ kụ seng nẹ̌kawingu wawine wọu taumata raghị e.

¹⁸Seng ini e rol᷊ẹ̌ u taumata kụ nẹ̌kawingu tau raghị: Manga Imang, narol᷊ẹ̌ dingangu ghal᷊ipohone: Ghal᷊ipohong Yesua ringangu manga anạ u sěmbaụ e, manga anạ i Yozadak: Maaseya, Eliezer, Yarib dingangi Gedalya.

¹⁹I sire nẹ̌diandi sarung mẹ̌sindong kawing i sire, bọu ene i sire měmpěněmbang domba esẹ, al᷊ingkai sasěmba ampungu rosan sire.

²⁰Ghal᷊ipohong Imer: Hanani ringangi Zebaja.

²¹Ghal᷊ipohong Harim: Maaseya, Elia, Semaya, Yehiel dingangi Uzia.

²²Ghal᷊ipohong Pasyhur: Elyoënai, Maaseya, Ismael, Netaneel, Yozabad, dingangi Elasa.

²³Taumatan Lewi: I Yozabad, Simei, Kelaya (mal᷊ain nisěbạ lai Kelita), Petahya, Yuda ringangu i Eliezer.

²⁴Manga mẹ̌kakantarị: Elyasib. Manga měndariagạ tukadu pasěllangeng u Wal᷊em MAWU: Salum, Telem dingangi Uri.

²⁵Taumatang Israel bal᷊ine: Ghal᷊ipohong Paros: Ramya, Yezia, Malkia, Miyamin, Eleazar, Malkia ringangi Benaya.

²⁶Ghal᷊ipohong Elam: Matanya, Zakharia, Yehiel, Abdi, Yeremot dingangi Elia.

²⁷Ghal᷊ipohong Zatu: Elyoënai, Elyasib, Matanya, Yeremot, Zabad dingangi Aziza.

²⁸Ghal᷊ipohong Bebai: Yohanan, Hananya, Zabai ringangi Atlai.

²⁹Ghal᷊ipohong Bani: Mesulam, Malukh, Adaya, Yasub, Seal dingangi Yeramot.

³⁰Ghal᷊ipohong Pahat-Moab: Adna, Kelal, Benaya, Maaseya, Matanya, Bezaleel, Binui ringangi Manasye.

³¹Ghal᷊ipohong Harim: Eliezer, Yisia, Malkia, Semaya, Simeon, Benyamin, Malukh dingangi Semarya.

³³Ghal᷊ipohong Hasum: Matnai, Matata, Zabad, Elifelet, Yeremai, Manasye ringangi Simei.

³⁴Ghal᷊ipohong Bani: Maadai, Amram, Uel, Benaya, Bedeya, Keluhu, Wanya, Meremot, Elyasib, Matanya, Matnai, Yaasai.

³⁸Ghal᷊ipohong Binui: Simei, Selemya, Natan, Adaya, Makhnadbai, Sasai, Sarai, Azareel, Selemya, Semarya, Salum, Amarya ringangi Yusup.

⁴³Ghal᷊ipohong Nebo: Yeiel, Matica, Zabad, Zebina, Yadai, Yoël dingangi Benaya.

⁴⁴I sire ene kěbị seng nẹ̌kawingu wawineʼn tau raghị. Tangu apang manga wawine ene e nisindoěng dingangu nitokol᷊ẹ̌ sěngkatokol᷊ẹ̌ dingangu manga anạ i sire.