Read Sangir ESRA 3 Bible Online

ESRA 3 - Sangir bible

ESRA 3

¹Su wul᷊ang kapitune, tau Israel seng něnatapẹ̌ su soan sire sěmbaụ-sěmbaụ. Su tanggalẹ̌ humotong su wul᷊ang ene i sire nẹ̌tampung su Yerusalem,

² bọu e i Yesua anạ i Yozadak dingangu manga ringange manga imang dingang i Zerubabel anạ i Sealtiel ore lai manga anạ u sěngkataune, nemangung kapia pananěmbaěng u Ruatang Israel. Ual᷊ingu kerene tangu i sire nakakoạ něnutung sasěmba su wowone natuhụewe kere su manga tatualage mạbawohẹ su ral᷊ungu bukẹ̌ u Torati Musa ěllangu Mawu Ruata.

³ Manimbe[4] i sire mạtakụ u tumanạu wanua ene, kaiso i sire mang němangung lai pananěmbaěng ene su tampạ e kal᷊imona. Mase wọu ene i sire nanětạ e něnarakangu l᷊ai sasěmba tinongkạ, mal᷊ukadẹ̌ dingangu wawěllo.

⁴ I sire mal᷊aing němantugẹ̌ Ěllong Selon Daukalu e, timuhụewe tundune; ringangu apang kal᷊aěllo měgẹ̌gěllịu sasěmba kụ seng niatorẹ̌ baugu ěllo ěndaị ene.

⁵ Sul᷊iung ene tangʼu i sire ringangu maudupẹ̌ měmpẹ̌gěllịu sasěmba tinongkạ ore lai sasěmba Ěllom Bul᷊ang Buhu Masaria e ringangu su kěbịewe ěllo masaria wal᷊ine kụ kinoạ baugu maněmba MAWU. I sire lai měmpẹ̌gěllịu sasěmba ringangu naung mal᷊uasẹ̌ e su MAWU.

⁶Manimbe Wal᷊em MAWU e wědang tawe nanětạ niwangung kapia e, kaiso su tanggalẹ̌ humotong bul᷊ang kapitune kawanua e nanětạ e něnutung sasěmba waugu MAWU e.

⁷Kawanua e nanongkang doitẹ̌ baugu ipěmaehẹ̌ basẹ̌ u meselẹ̌ dingangu basẹ̌ u kalu. I sire mal᷊aing něndohong kaěng, inumang, dingangu lanang zaitun sarang soan Tirus dingangu Sidon mědeạu sal᷊iuangu kalun cěmarang Libanon bọu manga soa ene. Kalu ene niwawa sol᷊ong Yafo wọu sasị. Kěbị ene nihal᷊ẹ̌ u kawanua su kasingkạ i Kores, datum Persia.

⁸Tangʼu su wul᷊ang karuane, su ral᷊ungu taung karuane samurin tau Israel nẹ̌sul᷊e sol᷊ong Yerusalem, nanětạe i sire němangung kapia Wal᷊em MAWU. I Zerubabel, i Yesua ringangu manga hapị i sire wansa sěmbaụ e, manga imang, tau Lewi, ipěhanggosẹ̌ bera e, kal᷊awọewen taumata nạung bọu nawembang, mal᷊aing něhal᷊ẹ̌ dingang. Tau Lewi apang umbure su wowong 20 su taunge taraị tiněbọ baugu měnanahimata hal᷊ẹ̌ u pěmamětị Bal᷊em MAWU ene.

⁹Tangú i Yesua tau Lewi ene, ringangu manga anạ e ringangu tuhang arau tuarine ringangu l᷊ai i Kadmiel dingangu manga anạ e (ghal᷊ipohong Hodawya)[5] sěngkapěnahimata hal᷊ẹ̌ u pěmamětị Bal᷊em MAWU ene. I sire sẹ̌sumbalaěngu tau Lewi ghal᷊ipohong Henadad.

¹⁰ Piạ e nạung manga mělahal᷊ẹ̌ u bangunang nanětạ e něměllọu wawukuʼm Bal᷊em MAWU, manga imang němpěluhe lakụ manandụ dingangu kạpangumbelẹ e slompretẹ̌ něngal᷊ạ e tampạ u sěmbaụ-sěmbaụ. Tau Lewi wọu ghal᷊ipohong Asaf mal᷊aing dimarisị sene kạpangumbelẹ e tạgonggong dararodọ. I sire měmpẹ̌dẹ̌dalo MAWU timol᷊ẹewe tundune nipato nạung dem bọu tempon Datu i Daud.

¹¹ Kawanua e němpẹ̌kantarị u raralo waugu MAWU, apidu měkẹ̌kakuwal᷊ị e kakantarị pondol᷊e wawerane kere ini, ”MAWU e mapia, ringangu kakěndage su Israelẹ̌ e tawẹ kahěpusange.” Patikụ kawanua e mal᷊aing nẹ̌gio ringangu nẹ̌dalo MAWU batụu wawukuʼm Bal᷊em MAWU e seng nighuanting.

¹²Lawọ bọu tal᷊oarang manga imang, tau Lewi ringangu manga těmbonangu ghal᷊ipoho kụ seng natimu umbure nạung bọu nakasilo Wal᷊em MAWU kal᷊imona. Piạ i sire nạung nẹ̌sahiding pěmaměllọu wawukuʼm Bal᷊em MAWU ini e, i sire měngkate apa nahunsangị maihạ-ihạ. Arawe taumata wal᷊ine apang diměnta sene kawe němpahul᷊iagʼu ral᷊uasẹ̌,

¹³hakịu selain tawe kinakiral᷊a ral᷊uasẹ̌ dingangu sasangị. Tingihe kai apạ e maihạ, hakịu kinaringihẹ̌ sol᷊ong maraune.