Read Sangir ESRA 4 Bible Online

ESRA 4 - Sangir bible

ESRA 4

¹Habaru měbẹ̌běken taumata nạung bọu niwembang e seng kạbangunge Wal᷊em MAWU, Duatang Israel, kinaringihʼu sědụ u tau Yehuda ringang i Benyamin.

² Ual᷊ingu ene i sire nẹ̌sombang i Zerubabel ringangu manga těmbonang u ghal᷊ipoho, kụ mědẹ̌dorong, ”Pakawalako i kami měmangung dingang Bal᷊em MAWU ene, watụ u i kami e mal᷊aing mẹ̌kal᷊iomaneng su Mawung kamene, kerẹewe lai i kamene kěbị e. I kami měngkate hanesẹ̌ měnarakangu sasěmba si sie ren dokeng bọu Esar-Hadon, datung Asyur nẹ̌bawa si kami ramahi.”

³Arawe i Zerubabel, i Yesua ringangu manga těmbonang u ghal᷊ipoho e simimbang, ”I kami e tawe mẹ̌gaghausẹ̌ si kamene mẹ̌sumbala si kami měmangung Bal᷊em MAWU waugu Ruatang kami. I kami e sarung měmangung i kami hala kerẹewe parentang Kores, datung Persia e, si kami.”

⁴Bọu ene pamanuane kụ seng marěngụ mạtanạ su wanua ene nanětạ e napakal᷊ongkọ u karakin tau Yahudi apidu mạpakatakụ i sire tadeạu pěmamangung ene iědo.

⁵I sire něnorokẹ̌ manga těmbonang u kawanuang Persia tadeạu mapakagholọ u karakin tau Yahudi ene. Hal᷊ẹ̌ ene měngkate mạdiadi karěngụeweng pẹ̌paparentang Datu i Kores sarangkewe pẹ̌paparentan Datu i Darius.[6]

⁶ Su panẹ̌takengu pẹ̌paparentan Datu i Ahasyweros, manga rumarokạ u tumanạu Yerusalem dingangu Yehuda němohẹ suratʼu kabaratang.

⁷Kerene lai su parentan Datu i Artahsasta, kaisarʼu Persia, hal᷊ẹ̌ ene nahěsang: i Bislam, i Mitredat, i Tabeel dingangu manga ringang i sire němohẹ u suratẹ̌ su ratu. Suratẹ̌ ene niwohẹ su werang Aram,[7] dingangu harusẹ̌ itungkang su tempong iwasa.[8]

⁸I Artahsasta mal᷊aing něnarimạ u suratʼu kakakoạ u Yerusalem. Suratẹ̌ ene niringọ u Guběrnurẹ̌ u Rehum dingangu Simsai i tulị u propinsi ringangu tẹ̌tuilang u manga ringang i sire, kụ kai manga mělahukung ringangu patikụewe mapapangkatʼu Persia lai wal᷊ine wọu Erekh, Babel dingangu Susan su wanuang Elam,

¹⁰kerene kai kahiang manga wansa wal᷊ine kụ seng niwawa i Asnapar Mawantugẹ̌ e ringangu nioro piněnatapẹ̌ su soan Samaria, ringangu manga soa wal᷊ine su ral᷊ungu propinsing Efrat bahageang Bahẹ.

¹¹Kerene ini wawerang suratẹ̌ ene, ”Su těngon Datu i Artahsasta wọu manga ěllang i Tuang kụ mạtanạ su Efrat bageang Bahẹ. Adatẹ̌.

¹²Mal᷊owọko i Tuang makaěnna, u tau Yahudi kụ seng naněntang u manga wanua wal᷊ine, su ral᷊ungu kararatuang i Tuang ini e seng nangindunụ su Yerusalem dingangu němangung kạpia soa ral᷊akisẹ̌ dingangu puluang měnggohaeng ene. I sire seng nanětạ němangung kapia manga meselẹ̌ dingangu seng tạ kararěngụe lai sarung mangěnsue hal᷊ẹ̌ ene.

¹³Kereu soa ene masueng koạ e kapia ringangu manga mesele masuen darisị e, pamanuane semben tawe mapulu měmaehẹ̌ pajakẹ̌ tangu ěbạ u kararatuange kakạkohone.

¹⁴I kami e seng nakauntung budi si Tuang dingangu tawe mapulu makasilo si Tuang kaakal᷊eng. Ual᷊ingu ene i kami e nẹ̌kabaratang u,

¹⁵tadeạu i Tuang deng maněsui pakaunsui arsipẹ̌ u manga i upung i Tuang. Bọu lohone, i Tuang sarung masingkạ u soang Yerusalem mambeng mapulu měnggohaeng dingangu reng dokeng kal᷊imona měngkate sěntiniạ měngẹ̌ngakal᷊ẹ̌ mararatu ringangu měngẹ̌ngawasa propinsi. Pěmanuane měngkate matědụ pěngahakeng. Ual᷊ingu ene soa ene seng nighoghahẹ̌.

¹⁶Kụ i kami maiaking u kereu soa ene pětikang kapia ringangu manga mesele ipararisị, i Tuang sen tawe lai makakawasa propinsing Efrat sěmběkam Bahẹ ini e.”

¹⁷Datu e něndingọ u sasimbahe ini, ”Su Guběrnurẹ̌ i Rehum dingangu i Simsai tulị u propinsi, ringangu manga ringang i sire apang mạtanạ su Samaria ringangu manga soa wal᷊ine su propinsing Efrat sěmběkang Bahẹ.[9] Adatẹ̌.

¹⁸Suratẹ̌ kụ niringọ i kamene seng nitungkang dingangu pinakiwasa si siạ e.

¹⁹Mase su parentaku ute seng nisěsuiang pinakaunsui dingangu mambeng nal᷊ahẹ u nạung deng kal᷊imona Yerusalem měngkate hanesẹ̌ dụdokạ kawasang mararatu ringangu mal᷊awọ bọu tal᷊oarang pamanuane e kai měndarongka dingangu měnggaghohaeng.

²⁰Bọu nạung manga ratu mal᷊ahasa e nẹ̌parenta paị sene ringangu něngawasa kasěllahu propinsing Efrat sěmběkam Bahẹ dingangu mẹ̌děndal᷊engu pajakẹ̌ dingangu ghaghěllị su mararatu.

²¹Ual᷊ingu ene sěbangke parenta waugu ipangědong hal᷊ẹ̌ u apan taumata ene, tadeạu soa e abe saụ iwangung kapia sarang iạ měgěllịu parenta wal᷊ine.

²²Koako parentaku ini e ringangu pakal᷊ighạ tadeạu kumbahangbe limembong kasariane rugiku!”

²³Pakarol᷊ạko sarangke suratʼi Artahsasta ene niwasa pararingihẹ̌ si Rehum, si Simsai ringangu l᷊ai sěndinganeng i sire, nẹ̌buạ e i sire sol᷊ong Yerusalem dingangu něnihasa tau Yahudi napěngědong hal᷊ẹ̌ u pěmamangung soa ene kapia.

²⁴ Hal᷊ẹ̌ u Wal᷊em MAWU e seng niědo ringangu tawe nitěpasẹ̌ sarang taung karuane su parentan Darius datum Persia.