Read Sangir ESRA 5 Bible Online

ESRA 5 - Sangir bible

ESRA 5

¹ Su tempo ene nabi ruang katau kụ i Hagai rěduang Zakharia anạ i Ido, nanětạe nẹ̌bisara su areng u Ruatang Israel waugu tau Yahudi kụ mạtanạ su Yehuda ringangu su Yerusalem.

² Nakaringihẹ̌ tatanatan nabi rarua ene, i Zerubabel anạ i Sealtiel dẹ̌duang Yesua anạ i Yozadak, apidu lighạ nanětạ němangung kapia Bal᷊em MAWU su Yerusalem, niontol᷊angu nabi rarua ene.

³Arawe i Tatnai guběrnurẹ̌ u propinsing Efrat sěmběkam Bahẹ, dingang i Syetar-Boznai dingangu sěndinganeng i sire lighạ nahunděnta sol᷊ong Yerusalem dingangu nakiwal᷊o su taumatang Yahudi, ”I sai něngoro si kamene piněmangung dingangu piněnukụ Bal᷊em Pẹ̌kakal᷊iomanengang ini?”

⁴I sire[10] mal᷊aing nakiwal᷊o areng u kěbị taumata apang něnongka němangung Bal᷊em MAWU e.

⁵Arawe Ruata e měnẹ̌nitị dingangu měngẹ̌ngěllung manga těmbonangu Yahudi ene, hakịu manga mapapangkatʼu Persia němutusu tawe měngal᷊ạ tindakang těntal᷊ang i sire tawe nẹ̌nuratẹ̌ si Darius dingangu něnarimạ sasimbange.

⁶Seng ini e laporang niringọ i sire su Ratu,

⁷”Su těngon Datu i Darius. Mal᷊owọko i Tuang mẹ̌parenta ringangu tawẹ konsange!

⁸Mal᷊awọko i Tuang deng makaěnna u i kami e seng nakoạ sol᷊ong propinsing Yehuda ringangu makasilo u Wal᷊em MAWU, Ruata Kasěllahenge, seng niwangung kapia ringangu manga watu ghaghaghuwạ dingangu manga meselẹ̌ niěmboěngu kalu. Hal᷊ẹ̌ ene nikoạ pinakaudupẹ̌ dingangu tatondone mapia.

⁹Bọu ene i kami nakiwal᷊o su manga těmbonangu wansa ene, i sai něngonggọ u loahe nipakawalan sire pěmangung Bal᷊em MAWU ene kapia ringangu niapakasukụ.

¹⁰Mal᷊aing nikiwal᷊oěng i kami lai areng i sire tadeạu ikapaul᷊ị si Tuang měnsang i sai-sai tuměllang u hal᷊ẹ̌ ene.

¹¹I sire simimbang, ’I kami ini e ěllangu Ruata měngẹ̌ngawasa runia patikụ. I kami e kạpěmangunge kapia Bal᷊em MAWU kụ nirarisị dingangu pinakasukụ pul᷊one su taunge nal᷊iu kahian sěngkatau ratung Israelẹ̌ masěllahẹ̌ e.

¹² Kai ual᷊ingu manga i upung i kami e seng nakawodaị dal᷊angehu Ruata měngangawasa su sorga, tangʼu i Sie něnarakang i sire su kawasang Nebukadnesar, datum Babel bọu hiteng Kasdim. I sie něnggolang Bal᷊e ene kụ něhuwo wansang kami sol᷊ong Babel.

¹³ Bọu ene i Kores nakoạ datum Babel dingangu su taung humotong i sie nẹ̌parenta, i sie napasěbangu parenta waugu měmangung kapia Bal᷊em MAWU ene.

¹⁴Hakịu l᷊ai nisul᷊ene kapia manga apal᷊iwụ bul᷊aeng dingangu sal᷊aka ipẹ̌pakẹ su ral᷊ungu Wal᷊em MAWU ringangu apang nial᷊ạ bọu Yerusalem kahiang Nebukadnesar bọu e nisuẹ̌ e su ral᷊ungu pananěmbaěng mahang duata su Babel. Manga apal᷊iwụ ene e nisarakang u Ratu i Kores su tau isẹ̌sẹ̌bạ si Sesbazar, kụ seng nịlahengkẹ e nakoạ guběrnurẹ̌ u Yehuda.

¹⁵Datu e něngoro si sie piněngal᷊ạ manga apal᷊iwụ ene ringangu niapěnul᷊e sol᷊ong Bal᷊em MAWU su Yerusalem, dingangu pěmangung kapia Wal᷊e ene.

¹⁶Bọu ene riměntạ e i Sesbazar sol᷊ong Yerusalem dingangu naměllọu wawukuʼm Bal᷊em MAWU ene. Nanětạ bọu tempo ene sarang orasẹ̌ ini apaniwangung ene rimal᷊eng turusẹ̌, kaiso wědang l᷊ai tawe nạsueng koạ e.’

¹⁷Kereu i Tuang mapakawala, i kami e reng měněgu tadeạu reng koateng sasẹ̌suine pakaunsui su ral᷊ungu tatěntangu kararatuang u Babel. Kụ ual᷊ingu kerene tangu, kasingkateng bue měnsang kahěngang piạ parentan Datu i Kores baugu ipěmangung kapia Bal᷊em MAWU su Yerusalem ini e. Bọu ene i kami měkẹ̌karalọu reng makaěbạ habarʼu putusang i Tuang su hal᷊ẹ̌ ene.”