Read Sangir ESRA 6 Bible Online

ESRA 6 - Sangir bible

ESRA 6

¹Bọu ene ual᷊ingu parentan Datu i Darius něněsuị e su ral᷊ungu arsipẹ̌ u kararatuang kạdaresọ su Babel.

²Kaiso wohẹ u hal᷊ẹ̌ ene e kinaẹ̌bakenge wal᷊inewe su Babel, kaiso kawe su soang Ahmeta su wanuang Media. Wohẹ ene niwohẹ su pěmamohekang e mạdul᷊ung kụ bawerane kere ini,

³”Su taung humotong su parentan Datu i Kores, i sie napasěbangu parenta tadeạu Bal᷊em MAWU su Yerusalem iwangung kạpia makoạ kere tampạ u taumata mẹ̌bawa sasěmba ringangu manutung sasěmba. Dangẹ u Wal᷊e ene harusẹ̌ 27 su metere, ringangu wěnahe mal᷊aing 27 su metere.

⁴Manga rarěndunge harusẹ̌ koạ kere ini: su wowong apang katěllu hawengu watu e harusẹ̌ pasěkangu kalu sěhaweng. Tiasa kai tanggunangu kasẹ̌ u kararatuang.

⁵Kerene lai manga apal᷊iwụ bul᷊aeng dingangu sal᷊aka kụ nipakẹ su Wal᷊em MAWU ringangu seng nial᷊ạ bọu Yerusalem kahian Datu i Nebukadnesar kutẹu l᷊ai niwawa sol᷊ong Babel, harusẹ̌ isul᷊e suěnnạe.”

⁶Bọu ene i Darius něndingọ u sasimbahe kere ini, ”Baugʼi Tatnai, guběrnurẹ̌ u propinsing Efrat sěmběkam Bahẹ, dingangu i Syetar-Boznai ringangu manga mapapangkatẹ̌ su Efrat sěmběkam Bahẹ. Kumbahang měnenggehẹ̌ tau Yahudi e,

⁷ringangu kumbahang měnahaghe pěmamětịu Wal᷊em Pẹ̌kakal᷊iomanengang i sire. Walạekere guběrnurẹ̌ u Yehuda ringangu manga těmbonang u Yahudi e mamětị kapia Wal᷊e ene.

⁸Eneʼ iạ e mẹ̌parenta si kamene ontol᷊eko i sire su hal᷊ẹ̌ u pěmamětị ene kere ini: Kal᷊awọu wawaehẹ̌ pěmamětịe pěngal᷊ạ bọu lěttạ u pajak u něgara su propinsing Efrat sěmběkam Bahẹ, kụ harusẹ̌ baehẹ̌ si sire kụ abe měngkai měmpěnohọ u ene.

⁹Su l᷊iung ene walạewe apa ghausang tuhụewe su manga imang su Yerusalem, kere manga sapi esẹ měndangeng, domba esẹ, pěgol᷊u domba waugu sasěmba su Mawu Ruata kawasa su sorga, ringangu gandung, asing, anggorẹ̌, dingangu lanang zaitun, harusẹ̌ ionggọ si sire apang kal᷊aěllo kụ piawe kawul᷊enang.

¹⁰Koạ bue kěbị ene tadeạu i sire makaonggọbe sasěmba makal᷊uasẹ̌be naungu Ruata kawasang sorga, ringangu tadeạu i sire mẹ̌gausẹ̌be al᷊amatẹ̌ baugu iạ dingangu waugu manga ahusẹ̌ku.

¹¹Iạ e měngoro tadeạu taumata apang lumampa tita ini e wọu wal᷊ene pěngẹ̌bukang dihi sěmbua, ěhabẹ̌ pondol᷊e, wọu ene susụ su ral᷊ungu wadang u tau ene sarung tuměpasẹ̌. Bal᷊ene harusẹ̌ goghahẹ̌ koạ tampạ u onasẹ̌.

¹²Mal᷊awọko Ruata kụ seng němile Yerusalem kere tampạ i Sie raloěng, měnggolọ apan datu arau wansa kụ bahani lumampa tita ini ringangu měnal᷊ukạ měnggoghahẹ̌ Bal᷊em MAWU su Yerusalem ene. Iạ e i Darius, seng něnita kere ini. Koạ e pakapia.”

¹³Titan Datu i Dariusẹ̌ e nikoạ pinakapia kahian Tatnai, guběrnurẹ̌ u Efrat sěmběkam Bahẹ, dingangu i Syetar-Boznai ringangu sěndinganeng i sire.

¹⁴ Nisěgareng kol᷊ai manga nabi i Hagai, i Zakharia, manga těmbonang u Yahudi měněpasu pěmamětị u Wal᷊em MAWU ene. I sire masahawụ nangěnsue pěmamětị ene natuhụewe kere su titan Duatang Israel dingangu parentang Kores, i Darius, dingangu i Artahsasta, mararatun Persia e.

¹⁵Bal᷊em MAWU e nasueng koạ e su tanggalẹ̌ těllu su wul᷊ang u Adar, su taung kaěnnunge su parentan Datu i Darius.

¹⁶Bọu ene ringangu mal᷊uasẹ̌ tau Israel, manga imang, tau Lewi, ringangu patikụ taumata nạung bọu nawembang e něnahuntěngadẹ̌ pěnanabisẹ̌ Bal᷊em MAWU ene.

¹⁷Su munara ene tangu i sire něněmbang sapi esẹ 100 su waụ e waugu MAWU, domba esẹ 200 su waụ e ringangu pěgol᷊u domba 400 su waụ e. Baugu sasěmba ampungu rosa e, nisarakang kambing esẹ 12 su waụ e, baugu apan tau Israel, kambing esẹ pẹ̌sěmbaụ.

¹⁸Bọu ene waugu tatangkiang su ral᷊ungu Wal᷊em MAWU, i sire něnusungu pěral᷊ahaedu manga imang, ore lai tau Lewi timuhụewe atorange mạbawohẹ su ral᷊ungu bukẹ̌ i Musa.

¹⁹ Su tanggalẹ̌ 14 bul᷊ang humotong su taung tuhụ e, taumata apan seng napul᷊ẹ bọu pinamembangenge němantugẹ̌ko Paskah.

²⁰Patikụ manga imang dingangu tau Lewi e seng nẹ̌koạ tunduʼm pamamurěsing batangeng mědeạu seng ikoạ kere wurẹ̌si. Bọu ene tau Lewi e němpamotọ manga binatang baugu sasěmbang Paskah waugu manga imang, baugʼi sire hala ringangu patikụ nạung apan nawembang bal᷊ine.

²¹Manga sasěmba ene nikinạ u kal᷊awọu tau Israel apang něngkawal᷊ị bọu pinamembangeng dingangu tumanạu wanua ene apan seng něněntangu kakakoạ u pẹ̌bawiahʼi sire warạdosa e ringangu riměnta waugu mẹ̌kal᷊iomaneng su MAWU, Ruatang Israel.

²²Sěngkamisa karěngụe i sire mạhul᷊uasẹ̌ mạmantugẹ̌ Sal᷊iwangu Borotẹ̌ Tawẹ Kabọ e. I sire mal᷊uasẹ̌ tạ sihinge watụ u MAWU e seng napakariading datung Asyur[11] mal᷊ondo si sire kụ mẹ̌tẹ̌tul᷊ung si sire su hal᷊ẹ̌ u mamětị kapia Wal᷊em MAWU, Ruatang Israel.