Read Sangir ESRA 7 Bible Online

ESRA 7 - Sangir bible

ESRA 7

¹Dingangu taunge wọu ene, piạ i Artahsasta nẹ̌parenta kere sěngkatau ratum Persia, piạ sěngkatau esẹ arenge i Esra, wọu hiteng Imang Mawantugẹ̌ i Harun. Běhịu hitene wọu wawa taraị ute kai kere ini: I Esra I Seraya I Azarya I Hilkia

²I Salum I Zadok I Ahitub

³I Amarya I Azarya I Merayot

⁴I Zerahya I Uzi I Buki

⁵I Abisua I Pinehas I Eleazar Imang Mawantugẹ̌ i Harun.

⁶I Esra sěngkatau piạ sikol᷊ane ringangu i sie masingkạ mal᷊awọ su hal᷊ẹ̌ u Tita nionggọu MAWU, Ruatang Israel si Musa. Ual᷊ingu i Esra nial᷊amateng u MAWU Ruatane, tangu ratu e nẹ̌gěllịu patikụ apang dẹ̌dorongange. Su taung kapitune su parentan Datu i Artahsasta, nẹ̌buạ e i Esra wọu Babel nẹ̌timona Yerusalem dingangu tau Israel sěmbuntuang i sire manga imang, tau Lewi, mẹ̌kakantarị dingangu měndariagạ pasěllangengu Wal᷊em MAWU, ringangu apang mělahal᷊ẹ̌.

⁸I sire naněntangu Babel su tanggalẹ̌ humotong bul᷊ang humotong kụ dingangu tul᷊umangu Mawu Ruata, nahumpạ e i sire su Yerusalem su tanggalẹ̌ humotong su wul᷊ang kal᷊imane.

¹⁰I Esra něngukahu kasěllahu ral᷊ungu naunge su pěnananẹ̌sui Titam MAWU, mědeạu měndal᷊engu ene ore lai maněntirong kal᷊awọu tiahane ringangu pělatorange su tau Israel.

¹¹Seng ini e tatěntang nionggọ u Ratu i Artahsasta si Esra, sěngkatau imang dingangu masasingkạ u Toratẹ̌,

¹²”Bọu Ratu i Artahsasta su Imang i Esra, mapapanden Toratʼu Mawu Ruata měngangawasa su sorga.[12]

¹³Iạ e měngoro tadeạu kal᷊awọu imang, tau Lewi ringangu tau Israel bal᷊ine su patikụ kararatuangku, kụ mẹ̌měningu makoạ sol᷊ong Yerusalem, ipakawala tamai ringangu.

¹⁴U iạ dingangu měnanasaku i sire pitu e rumolohʼi kau sol᷊ong Yerusalem dingangu Yehuda mědeạu pananẹ̌sui kakakoạ e ringangu makasilo měnsang Toratʼu Mawu Ruata kụ seng niumbala si kau e, kahěnga-hěngangbe rẹ̌daringihang.

¹⁵Iạ dingangu apang měnanasaku e mapulu maněmbang bul᷊aeng dingangu sal᷊aka su Ruatang Israel, Duata e su mạtanạ su Yerusalem. Bawako sasěmbang kami ene.

¹⁶Bawako l᷊ai wul᷊aeng dingangu sal᷊aka nikomol᷊u e su kasěllahu Babel dingangu kal᷊awọu gaghěllịu tau Israel ringangu manga imange waugu Wal᷊em MAWU Ruatan sire su Yerusalem.

¹⁷Pakẹ e roitẹ̌ ene pakaudupẹ̌ kụ pěměllị e sapi esẹ, domba esẹ, pěgol᷊u domba, gandung dingangu anggorẹ̌. Sěmbako kěbị ene su wowom pananěmbaěng su Wal᷊em MAWU su Yerusalem.

¹⁸Sal᷊aka ringangu wul᷊aeng kụ bědang nal᷊ěmbe wotonge i kau mẹ̌pakẹ baugu pandungangu ringangu sěndinganengu, kerẹewe su kapulun Duatanu e.

¹⁹Sarakangke su Ruata su Yerusalem kal᷊awọu apal᷊iwụ apang nisarakang si kau waugu pẹ̌kakal᷊iomaneng su Wal᷊en Duata.

²⁰Dingangu patikụ apang pandungang bal᷊ine waugu Wal᷊em MAWU wotonge i kau mẹ̌dorong bọu kasẹ̌ u kararatuang.

²¹Baugu kal᷊awọu mělahal᷊ẹ̌ u kasẹ̌ u kararatuang su propinsing Efrat sěmběkam Bahẹ takụ nioro tadeạu walạewe měnsang apa kụ nirorongang u Imang i Esra, mapapanden Toratʼu Mawu Ruata měngangawasa su sorga, nionggọ si sie tạ kararěnane,

²²sarangkewe kal᷊awọe ini: sal᷊aka hakịu 3.400 su kilone, gandung hakịu 10.000 su kilone, anggorẹ̌ hakịu sarang 2.000 su litere, lanang zaitun hakịu sarang 2.000 su litere, ringangu asing kal᷊awọeweng gausang.

²³Pẹ̌koạ e pakaudupẹ̌ su ral᷊ungu měndiahi kal᷊awọu apan dẹ̌dorongangu Ruata měngangawasa su sorga waugu WanalanʼE, tadeạu i Sie tawe lumangehẹ̌ si siạ arau suapan taumata kụ měpẹ̌parenta samuring iạ.

²⁴I kamene tawe wotonge měmurụ pajakẹ̌ bọu manga imang, tau Lewi, mẹ̌kakantarị, lukadu tukadu pasěllangeng, mělahal᷊ẹ̌, arau walạewe měnsang i sai kụ piạ kal᷊ahěmpukange ringangu Wal᷊em MAWU.

²⁵Ei anuku Esra, pẹ̌pakẹkong kapelesa kụ seng nionggọu Mawu Ruata si kau e, ringangu hengkẹko manga těmbonange ringangu manga měl᷊ahukung waugu mẹ̌parenta kal᷊awọu taumata su propinsing Efrat sěmběkam Bahẹ kụ měbẹ̌biahẹ̌ tutuhụ Toratʼu Mawunu. Mal᷊owọko i kau e reng maněntirong Toratẹ̌ ene su patikụ taumata apang bědang běga.

²⁶Apan taumata kụ tawe rumararingihẹ̌ kal᷊awọu titam Mawu Duatanu arau kal᷊awọu titang kararatuang e harusẹ̌ lighạ ihukungu papate, arau irěmmẹ, arau hampaseng darotonge, arau itahungku.”

²⁷Bọu e angkuěng i Esra, ”Pědaloko MAWU Ruata isẹ̌sěmbang manga i upung i kitẹ! I sie seng něnganoạ naungu ratu, hakịu i sie mapulu měnaung samatang baugu Wal᷊em MAWU su Yerusalem.

²⁸Ual᷊ingken tul᷊umangu Ruata, iạ e ilẹ̌lahimpulun datu, ual᷊ingu manga měnanasa ringangu manga mapapangkate kụ kawasa e; MAWU Ruataku seng nẹ̌gěllịu ghiange si siạ, hakịu iạ e nakaparingang kal᷊awọu těmbonangu ghal᷊ipohong Israel baugu mapul᷊ẹ sol᷊ong Yerusalem.”