Read Sangir ESRA 9 Bible Online

ESRA 9 - Sangir bible

ESRA 9

¹Sarang kěbị e seng bọu nikoạ e pirang katau těmbonang u tau Israel diměnta su anuku. I sire něhabarẹ̌ u kawanuang Israel, nasowa l᷊ai manga imang, dingangu tau Lewi e tawe nẹ̌těngkahaeng batangeng i sire wọu tal᷊oarang manga wansa kụ mẹ̌tẹ̌tanạ sene mạngělikụ e, kụ kai tau Amon, Moab, Misirẹ̌, Kanaan, Het, Feris, Yebus dingangu Amori. Sarang l᷊ai manga imang dingangu tau Lewi e mal᷊aing měmpẹ̌kẹ̌koạ kerene. I sire kěbị měkẹ̌koạ kakanoạ i sire mal᷊ahasa kẹ̌koateng u manga wansa ene.

²Manga esẹ tau Yahudi e němpẹ̌kawing u manga wawine tau raghị, hakịu umatẹ̌ sahị tẹ̌taghuanengu MAWU e seng bal᷊inewe matilang. Katewe hakịu apang kakal᷊imonaěnge němpẹ̌koạ tamai ene e kai manga těmbonange ringangu mapapangkatʼu Israel.

³Nakaringihẹ̌ hal᷊ẹ̌ ene, iạ e nakapěndang nẹ̌sasěsilẹ̌ hakịu něnggehẹ pakeangku ringangu něngěbụ utạ dingangu wianggụku bọu e naiang dingangu ral᷊ungu naung měngkate apa napěnsu.

⁴Iạ měngkate tatapẹ̌ mạiang kerene sarang panarakangu sasěmba tẹ̌tutungang bawěllo. Bọu ene riměntạ e taumata němpěliwung si siạ. I sire měngkate mạtakụ mẹ̌tahěndung papatakụ u Ruatang Israel waugu rosan sire apang kụ němpẹ̌sul᷊e wọu pinamembangeng ene.

⁵Su tempọen sasěmba wawěllo e nanětạ nisarakang, něpětịe iạ bọu tampạ kinasusangku e kụ dingangu pakeangku ghehẹ, iạ nẹ̌tumpěkuhẹ̌ dingangu něngul᷊uhu l᷊imaku su MAWU Ruataku.

⁶Iạ e nẹ̌bera, ”O Ruataku, iạ ini e mạmea měhengkẹ u těmbọku su těngo-Nu. Dosang kami e seng nẹ̌tatimbo su pusigʼi kami sarang manumbụ l᷊angị.

⁷Nanětạ bọu manga i upung i kami sarang orasẹ̌ ini, i kami umatʼU e nẹ̌dosa su těngo-Nu. Hakịu ene i kami, manga ratu ore lai manga imang i kami e seng nikawatạ u mararatung tau raghị. I kami e nipate, nipěhampaseng dingangu nihengkẹ kere tau nitaweng. I kami e seng nitahumeang tawẹ sihinge, kerẹewe kakakoạ e su sahěllo ini.

⁸Arawe orasẹ̌ ini o MAWU Ruatang kami, i Kau wuhụewe mal᷊ondo si kami. I Kau seng něliwiru pirang katau wọu tal᷊oarang kami e wọu pẹ̌tatahamawuang baugu pẹ̌bawiahẹ̌ dingangu karal᷊unsemahẹ̌ su tampạ kụ nahae ini. I Kau e něngonggọu pẹ̌bawiahẹ̌ buhu si kami.

⁹Su tempong i kami e wědang su ral᷊ungu pẹ̌tatahamawuang, i Kau e tawe naněntang i kami. I Kau e nakakariading kami e itẹ̌tal᷊ěntụu mararatun Persia ringangu nipakawala nẹ̌biahẹ̌ dingangu němangung kapia Wal᷊e-Nu kụ seng kate nal᷊ěmbe manga ěnnạe. I Kau e nẹ̌gěllịu kal᷊aěllung si kami sini e, su Yehuda ringangu Yerusalem.

¹⁰Arawe orasẹ̌ ini e, o MAWU Ruata, samuring kal᷊awọu karariadi ene, kai apạe iwerang kami? I kami e seng tawe nẹ̌pandung kal᷊awọu tita-Nu e lai,

¹¹kụ seng nionggọ u si kami e limiung manga nabi, manga ěllangʼU. I sire naul᷊ị si kami u ěntana kụ hědong pẹ̌tanakeng i kami e mal᷊amuhụ kahiang kal᷊awọu tumanạe wọu pondol᷊e sarang pondol᷊e nẹ̌koạ karal᷊amuhụ dingangu tatingkaị.

¹² Manga nabi ene nẹ̌sěding i kami e mẹ̌kawing towagẹ̌ e ringangi sire ene, arau l᷊ai měnongkạ si sire mědeạu mataghupia ringangu mal᷊unsemahẹ̌. Maengu i kami e mararingihẹ̌, i kami e sarung matoghasẹ̌ dingangu makatemang gẹ̌sing ěntana e ringangu mapal᷊ohong ene su pal᷊ahiteng kami e sarang marěngụ-děngụ.

¹³I kami e seng nẹ̌dosa ringangu limampa tita-Nu, ringangu i Kau e seng něhukung si kami. Arawe i kami e masingkạ, o Ruatang kami, u hukumang nionggọ u e wal᷊inewe kere hinong ikatarimạ i kami e kawěhạ e, kaiso i kami e wědangbeng niapakasal᷊amatʼU.

¹⁴Kụ kawe mariadiwe kereapa, i kami e kawe tawẹ agise si kal᷊awọu hengetangʼU e lai ringangu mẹ̌kẹ̌kawing towagẹ̌ dingangu taumata raral᷊akisẹ̌ ene? Kereu i kami e mẹ̌koạ ene, nal᷊ahẹu i Kau e apạe lumangehẹ̌ hakịu mapakaupung kami e tawẹ ampunge, ringangu tawe mapakawalang sarang sěngkatau e wiahẹ̌.

¹⁵MAWU Ruatang Israel, i Kau e adilẹ̌, kai maning kerene kai i Kau e mang mapěbẹ̌biahi. I kami e měngakuʼm pẹ̌sasal᷊ang kami e si Kau, si kami e tawẹ hakẹ̌ baugu mẹ̌těngong Kau e.”