Read Sangir NEHEMIA 10 Bible Online

NEHEMIA 10 - Sangir bible

NEHEMIA 10

¹Taumata humotong něnekeng ute kai Guběrnurẹ̌ i Nehemia anạ i Hakhalya. Bọu ene nakatol᷊e i Zedekia. Bọu ene taumata tuhụ e ini němpěnekeng lai:

²Manga imang i: Seraya, Azarya, Yeremia, Pasyhur, Amarya, Malkia, Hatus, Sebanya, Malukh, Harim, Meremot, Obaja, Daniel, Gineton, Barukh, Mesulam, Abia, Miyamin, Maazya, Bilgai dingangu i Semaya.

⁹Taumatan Lewi e i: Yesua anạ i Azanya, Binui hiteng ghal᷊ipohong Henadad, Kadmiel, Sebanya, Hodia, Kelita, Pelaya, Hanan, Mikha, Rehob, Hasabya, Zakur, Serebya, Sebanya, Hodia, Bani ringangu Beninu.

¹⁴Apan těmbonangu wansa i: Paros, Pahat-Moab, Elam, Zatu, Bani, Buni, Azgad, Bebai, Adonia, Bigwai, Adin, Ater, Hizkia, Azur, Hodia, Hasum, Bezai, Harif, Anatot, Nebai, Magpias, Mesulam, Hezir, Mesezabeel, Zadok, Yadua, Pelaca, Hanan, Anaya, Hosea, Hananya, Hasub, Halohes, Pilha, Sobek, Rehum, Hasabna, Maaseya, Ahia, Hanan, Anan, Malukh, Harim dingangu Baana.

²⁸I kami kawanuang Israel, manga imang tau Lewi e, apaʼm měndariagạ pasěllangengu Wal᷊em MAWU, apam měnanualagu musikẹ̌ dingangu manga mělahal᷊ẹ̌ u Wal᷊em MAWU e, kawing dingangu manga anạ i kami e kụ seng matatěllang dingangu kěbị taumata kụ matuhụ su toratu Ruata ringangu seng něhaeng batangeng bọu taumata raghị kụ mạtanạ su wanuang kami.

²⁹I kami kěbị e mẹ̌těngkal᷊aụ dingangu manga těmbonang i kami ringangu nẹ̌salu kụ mẹ̌biahẹ̌ tumuhụ toratu Ruata kụ seng nionggọʼE limiung Musa, ěllangʼE. Karimạko Ruata e měngane si kami, kereu i kami e mapakasěhụu riandi ini. I kami nẹ̌salu sarung tumuhụ kal᷊awọu tita, toratẹ̌ dingangu tiahaʼm MAWU, Ruatang kami.

³⁰ I kami e nẹ̌salu waugu tawe mẹ̌kawing kal᷊aukang dingangu manga wansa tau raghị e kụ matanạ su wanuang kami.

³¹ Kereu piạ taumata raghị kụ mapulu mẹ̌bal᷊ụ u gandung arau apal᷊iwụ bal᷊ine si kami su ěllon Sabatẹ̌ arau ěllo susi lai wal᷊ine, i kami e sarung tawe měmělli. Apan taung kapitune, i kami e tawe mahěnsinuang dingangu tawe měnětul᷊ẹ utang.

³² Apan taung i kami sěngkatau-sěngkatau e sarung měnongkang sal᷊aka limang harang baugu kětạkengu ongkosu Wal᷊em MAWU.

³³I kami e hědom mẹ̌nadiang kal᷊awọu apang pandungangu wal᷊eng pẹ̌kakal᷊iomaneng su Wal᷊em MAWU, kere manga: borotẹ̌ sẹ̌sadiaěng, sasěmba gandung měllo-měllo e, binatang baugu sasěmba měllo-měllo tẹ̌tutungang e, sasěmbạewe susi lai wal᷊ine e, sasěmbạeng kal᷊aampungu rosang Israel, dingangu kal᷊awọu apang gẹ̌gausang baugu Wal᷊eng MAWU e.

³⁴I kami kawanua, manga imang dingangu tau Lewi sarung měnawụ lotẹ̌ apan taung, baugu měnantu měnsang ghal᷊ipoho sude hinong měnadiang kalum putung baugu sasěmba tẹ̌tutungang su MAWU Ruatang kami, tumuhụ atoru Toratẹ̌ e.

³⁵ Apan taung i kami e sarung mẹ̌bawa sarang Bal᷊eng MAWU gẹ̌sing gandung humotonge ringangu wua-bua masasasạ humotonge su manga kakaluang i kami e.

³⁶ I kami e sarung mẹ̌bawa manga anạ i kami esẹ laiakang e su manga imang su Wal᷊em MAWU waugu měnarakang i sie su Ruata, matuhụewe kere su atoru Toratẹ̌ e. I kami e sarung měnarakangu anạu sapi e lai, anạu domba arau anạu kambing i kami e humotong ipěhanạ.

³⁷ I kami e sarung mẹ̌bawa su manga imang su Wal᷊em MAWU e kaugu tapoěngu gandung humotong nipěnsạ suapan taung, kerene lai manga sasěmba wal᷊ine kere anggorẹ̌, lanang zaitun dingangkewe laing kal᷊awọu haghim bua-bua. Sasěmba pẹ̌sěngkatahạpul᷊one wọu ghěsing sasuang i kami e sarung bawaěng i kami e su tau Lewi kụ makaěbạ manga sasěmba pẹ̌sěngkatahạpul᷊one su manga soang pělahěnsinuangeng.

³⁸ Arawe sěngkatau imang hiteng Harun harusẹ̌ tumaking tau Lewi ene kereu i sire e lumuhu manga sasěmba ene. Kụ pẹ̌sěngkatahạpul᷊one wọu kěbị sasěmba e harusẹ̌ bawaěngu tau Lewi ene sarang manga kamaru wiahẹ̌ su Wal᷊em MAWU.

³⁹Kawanuang Israel dingangu tau Lewi e harusẹ̌ mẹ̌bawa tatongka tatapẹ̌ kere manga gandung, anggorẹ̌ dingangu lanang zaitun su manga kamaru wiahẹ̌ tampạ pěndesokangu manga apal᷊iwụ u Wal᷊em MAWU. Sene lai tampạ katatanakengu manga imang kụ kapěmẹ̌munarane, apang měndariagạ pasěllangengu Wal᷊em MAWU e ringangu apang mẹ̌kakantarị e. I kami e tawe měngale-ale mẹ̌tangkuang Bal᷊eʼm MAWUNG kami e.