Read Sangir NEHEMIA 11 Bible Online

NEHEMIA 11 - Sangir bible

NEHEMIA 11

¹Apaʼm pangahạ e kụ těbe matanạ su Yerusalem dingangu kawanua e měnawụ lotẹ̌ baugu měmile sěmbalagheng bọu apaʼm balagẹ̌ mapul᷊o e kụ harusẹ̌ matanạ su soa susi su Yerusalem. Kụ apan tawe napile e wotongewe matanạ su manga soa wal᷊ine.

²Su tal᷊oaran sire e piạ u mapulu matanạ su Yerusalem dingangu i sire e rẹ̌daloěngu kawanua e.

³ Su manga soa wal᷊ine e, kawanuang Israelẹ̌ e, manga imang, tau Lewi, ringangu apang mělahal᷊ẹ̌ u Wal᷊em MAWU e, ringangu hiteng manga mẹ̌tatangkiang i Salomo e nẹ̌tanạ su ěntana tataghuaneng i sire ringangu su manga soan sire hala e.

⁴Pirang katau taumata wọu ghal᷊ipohong Yehuda ringangu i Benyamin natanạ su Yerusalem. Kai ini e rol᷊ẹ̌ u areng i sire: Manga rarolohang ghal᷊ipohong Yehuda: I Ataya anạ i Uzia ringangu pulung i Zakharia. Pirang katau wọu tal᷊oarang manga i upung i sire e ute kai: i Amarya, i Sefaca, ringangi Mahalaleel, Peres, Yehuda. Kal᷊awọe 468 su kataune kụ matatoghasẹ̌ badange mapapia. I Maaseya anạ i Barukh dingangu pulung i Kolhoze. Pirang katau wọu tal᷊oarang manga i upung i sire e ute kai: i Hazaya, i Adaya, i Yoyarib, i Zakharia, i Syela, i Yehuda.

⁷Manga rarolohang ghal᷊ipohom Benyamin: I Salu anạ i Mesulam dingangu pulung i Yoëd. Pirang katau wọu tal᷊oarang manga i upunge ute: i Pedaya, i Kolaya, i Maaseya, i Itiel dingangu i Yesaya. I Gabai ringangi Salai. I sire apang anạ u sěngkatau mararanin[17] Salu e. Kěbị e kal᷊awọe 928 su kataune lẹ̌ahakeng

⁹i Yoël anạ i Zikhri ringangu tumatimbange, i Yehuda anạ i Hasenua.

¹⁰Manga imang: I Yedaya anạ i Yoyarib děduang Yakhin. I Seraya anạ i Hilkia ringangu pulung i Mesulam. Pirang katau wọu tal᷊oarang manga i upunge ute: i Zadok, i Merayot, i Ahitub kụ něngumpaedẹ̌ diabatange Imang Mawantugẹ̌.

¹²Kěbị e 822 su kataune imang kụ měmẹ̌munara su Wal᷊em MAWU e. I Adaya anạ i Yeroham dingangu pulung i Pelalya. Pirang katau wọu tal᷊oarang manga i upunge ute: i Amzi, i Zakharia, i Pasyhur dingang i Malkia.

¹³Apan těmbonangu sěmbalagheng su ral᷊ungu ghal᷊ipoho ene e kal᷊awọe 242 su kataune. I Amasai anạ i Asareel dingangu pulung i Ahzai. I upung gaghurange ute kai: i Mesilemot dingangu i Imer.

¹⁴Bọu ghal᷊ipoho ini kai piạ 128 su kataune wawahani kụ mahuagatẹ̌ mahasa e. Těmbonang i sire ute kai i Zabdiel, anạ i Gedolim.[18]

¹⁵Taumatan Lewi: I Semaya anạ i Hasub dingangu pulung i Azrikam. I upung gaghurange sěnggạ ute i Hasabya ringangu i Buni. I Sabetai rẹ̌duang Yozabad, tau Lewi e kahumotongange kụ měnanitị munara su l᷊ikudu Wal᷊em MAWU. I Matanya anạ i Mikha e ringangu pulung i Zabdi, wọu hiteng Asaf. I sie pangahạ u mẹ̌kakantarị baugu kakal᷊iomaneng u tatarimakasẹ. I Bakbukya tumatimbang i Matanya. I Abda anạ i Samua ringangu pulung i Galal, bọu hiten Yedutun. Kěbị e kal᷊awọe 284 su kataune.

¹⁹Manga měndariagạ u tukadu pasěllangeng: I Akub, i Talmon dingangu manga ringang i sire. Kěbị e kal᷊awọe 172 su kataune.

²⁰Kawanuang Israel, manga imang dingangu tau Lewi kụ lěmbene, matanạ su ěntanan sire su haghin soa su Yehuda.

²¹Manga mělahal᷊ẹ̌ su Wal᷊em MAWU mạtanạ su wahageangu soang Yerusalem kụ isẹ̌sěbạ Ofel. I sire mělẹ̌hal᷊ẹ̌ su al᷊ungu ahạ i Ziha ringangu i Gispa.

²²Měnanahimata tau Lewi kụ mạtanạ su Yerusalem ute kai i Uzi anạ i Bani ringangu pulung i Hasabya. I upunge sěnggạ ute i Matanya ringang i Mikha. I sie nasowa ghal᷊ipohong Asaf, piạ munarane měngangurusẹ̌ musikẹ̌ su tempong pẹ̌kakal᷊iomaneng su Wal᷊em MAWU.

²³Bihingu apang gal᷊ipoho waugu měngurusẹ̌ musikẹ̌ su Wal᷊em MAWU ěllo-ěllo e nitantu tuhụ atorangu ratu.

²⁴I Petahya anạ i Mesezabeel bọu ghal᷊ipohong Zera ringangu ghal᷊ipohong Yehuda, nakoạ timbangu tau Israel su istanang Persia.

²⁵Mal᷊awọ bọu tal᷊oarang kawanua e mạtanạ su manga soa kụ mẹ̌dẹ̌darěduhẹ̌ dingangu manga rahamin sire e. Pirang katau wọu ghal᷊ipohong Yehuda e mạtanạ su wanua wěllạu Bersyeba sěmběkan timuhẹ̌ dingangu Wal᷊ang Hinom sěmběkan sawěnahẹ̌. I sire mạtanạ su manga soa tuhụ e ini ringangu manga weọ e mạngělikụ e: Kiryat-Arba, Dibon, Yekabzeel Yesua, Molada, Bet-Pelet Hazar-Sual, Bersyeba Ziklag, Mekhona En-Rimon, Zora, Yarmut Zanoah, Adulam, Azeka, Lakhis.

³¹Pirang katau taumata wọu hěntom Benyamin mạtanạ su Geba, Mikhmas, Ai, Betel dingangu manga weọ e su rěduhe,

³²su Anatot, Nob, Ananya,

³³Hazor, Rama, Gitaim,

³⁴Hadid, Zeboim, Nebalat,

³⁵Lod, Ono ringangu su Wal᷊am Manga Basẹ̌.

³⁶Pirang katau gapaěngu tau Lewi e kụ kal᷊imona e mạtanạ su wanuang Yehuda e nioro pẹ̌tẹ̌tanạ dingangu taumataʼm Benyamin.