Read Sangir NEHEMIA 13 Bible Online

NEHEMIA 13 - Sangir bible

NEHEMIA 13

¹ Su tempon toratʼi Musa niwasa waugu kawanua e, kinaěbakengke tatualagẹ̌ kere ini: ’Tau Amon dingangu Moab, mamben těngadẹ̌ tawe wotonge mẹ̌dal᷊aụ u umatʼu Ruata;

² batụu piạ nạung tau Israel su raral᷊engang suměbang bọu Misirẹ̌, bansa rarua ene tawe něngonggọu kaěng dingangu akẹ su wansa ene. Katewe maal᷊ạ i sire něnewa si Bileam piněngane tau Israel, kaiso Ruatang kitẹ e seng němal᷊ui laane ene e nakoạ al᷊amatẹ̌.’

³Ene tau Israel nakaringihẹ̌ ene, i sire napẹ̌dal᷊ahaeng kěbị taumata raghị bọu kawanuang Israel.

⁴Kal᷊imonang ene tangu Imang i Elyasib, kụ nioro piněnahimata manga kamaru laidopẹ̌ su Wal᷊em MAWU, piạ kal᷊ahěmpukange mapia ringangi Tobia.

⁵I Elyasib nẹ̌gěllịu kamarẹ̌ gẹ̌guwạ sěmbaụ si Tobia kụ nạung kawe nisạdia tani waugu pěndesokangu manga gandung, kamania, manga apal᷊iwụ kụ pẹ̌paketang su Wal᷊em MAWU, sasěmba waugu manga imang, sasěmba gandung pẹ̌sěngkatahạpul᷊one, anggorẹ̌, dingangu lanan zaitun, kụ sarung pahiakeng su taumatan Lewi, manga měnanualagu musikẹ̌ dingangu manga měndariagạ pasěllangengu Wal᷊em MAWU.

⁶Piạ e hal᷊ẹ̌ ene nariadi, iạ tawẹdise su Yerusalem, batụu su taung katěllum pul᷊o duane su parentan Artahsasta,[22] ratum Babel, iạ e nakoạ sarang Babel, něhabarẹ̌ su ratu. Tawe nararěnnạ wọu ene iạ e nipakawala

⁷waugu mẹ̌bal᷊ị sarang Yerusalem. Nasongo sini e, iạ himěkosẹ̌ nakakasingkạ u i Elyasib seng něngonggọu kamarẹ̌ sěmbaụ si Tobia su Wal᷊em MAWU.

⁸Iạ e nẹ̌pědu kahěngang dingangu něnděmmẹu pal᷊iwụ i Tobia kěbị sarang likude.

⁹Bọu ene iạ něngoro tadeạu koateng tundu pěmamurěsi waugu manga kamarẹ̌ ene. Wọu ene iạ měnul᷊e sene kal᷊awọu sasěmba gandung dingangu kamania ore lai manga apal᷊iwụ u Wal᷊em MAWU.

¹⁰ Su l᷊iung ene e kinaěbakengku e manga ledeng u musikẹ̌ e ringangu taumatan Lewi e seng něněntangu Yerusalem dingangu mẹ̌sul᷊e sarang manga rahaming sěngkatau-sěngkatau, ual᷊ingu kawanua e tawe makasukụ patikụ apang gẹ̌gausang i sire e.

¹¹Tangú takụ těguang apan těmbonange ual᷊ingu i sire e seng němalam Bal᷊eʼm MAWU e nilawoehang. Mase takụ nikuiang tau Lewi kapia ringangu měnanalangu musikẹ̌ ene kụ saụ takụ nioro nipěhal᷊ẹ̌ kapia.

¹² Bọu ene kal᷊awọu kawanuang Israel nanětạ e saụ něngonggọu gandung pẹ̌sěngkatahạpul᷊one, anggorẹ̌ dingangu lanan zaitun, ore niwawane sarang manga kamaru manga laidopẹ̌.

¹³Iạ e měngoro si sire ini e pěnitị manga kamaru laidopẹ̌ ene: Imang Selemya, Zadok, sěngkatau masasingkạ u Toratẹ̌ dingangu Pedaya tau Lewi. I Hanan anạ i Zakur dingangu pulung i Matanya takụ ioro paontol᷊ẹ̌ si sire. Iạ e masingkạ u taumata ene e kapěngumbalaěng dingangu sarung měngurusẹ̌ pẹ̌papahiạ u manga apal᷊iwụ ene e su manga hapị sěhal᷊ěkange ringangu katul᷊ide.

¹⁴O Ruataku, pẹ̌tahěndungko kal᷊awọu apang takụ kinoạ baugu Wal᷊e-Nu ringangu pẹ̌tatangkiange.

¹⁵ Su tempo ene iạ nakasilo u su ěllon Sabatẹ̌ e pirang katau su Yehuda měmpẹ̌měha anggorẹ̌. Piạ lai taumata wal᷊ine měmpẹ̌lẹ̌lurangu gandung, anggorẹ̌, buang anggorẹ̌, buang ara ringangu manga barang bal᷊ine su wowong kalidene kụ bawaěng sarang Yerusalem. Takụ isěding i sire mahumbal᷊ụ su Yerusalem.

¹⁶Pirang katau wọu Tirus kụ mạtanạ su Yerusalem nẹ̌bawa kinạ dingangu haghing apal᷊iwụ iwal᷊ụ su Yerusalem su ěllon Sabatẹ̌, mědeạu wal᷊ukang su tau Yahudi.

¹⁷Takụ sal᷊ěntihokang apa těmbonangu Yehuda ringangu takụ pẹ̌beraěng, ”Kai tawe nakahěngang i kamene u i kamene seng nẹ̌koạ dal᷊akisẹ̌ ual᷊ingu nakal᷊amuhụ ěllon Sabatẹ̌?

¹⁸Hatede ual᷊ingu rosa kere ini e tangú Ruata seng něhukung i upung i kitẹ e dingangu napakagholangu soa ini. Měnsang orasẹ̌ ini i kamene mapulu měnamba ral᷊angehu Ruata su Israelẹ̌ ual᷊ingu nakal᷊amuhụ ěllon Sabatẹ̌ e tangú?”

¹⁹Ual᷊ingu ene takụ ioro tadeạu su tětạ u apang ěllon Sabatẹ̌ e, kụ su Sambaiang hěbi e, manga tukadu pasěllangengu soa lighạ hěpingang mạeng seng mawawěllo,[23] ringangu tawe wotonge topeěng kal᷊imonang ěllon Sabatẹ̌ e mal᷊iu, su ěllong Kaehẹ̌ mahěbi. Takụ pělokang taumataku e pirang katau su manga tukadu pasěllangeng ene waugu pěnahimata tadeạu su ěllon Sabatẹ̌ e tawẹ apa apal᷊iwụ bal᷊ụ kụ bawaěng sarang dal᷊ungu soa.

²⁰Arawe kạdingạ pirang katau taha pědagang dingangu mẹ̌bawal᷊ụ apal᷊iwụ e měmpẹ̌tẹ̌tikị su l᷊ikudu meselẹ̌ su ěllong Sambaiang mahěbi.

²¹Iạ e něhengetang si sire, ”Tawẹ kěhase i kamene měngampal᷊ẹ̌ sarang mal᷊ukadẹ̌ sene. Pakaingatẹ̌, kereu koateng i kamene sěnsul᷊ẹ̌ko l᷊ai, iạ e sarung kumanoạ matědụ!” Měnětạ bọu ene i sire tawe rimẹ̌děnta lai su ěllon Sabatẹ̌.

²²Mase tau Lewi e takụ nioro pinẹ̌koạ tundu pěmamurěsi watangeng dingangu pěndiagạ manga tukadu pasěllangeng baugu pěnahimata tadeạu taumata e měngadatẹ̌ ěllon Sabatẹ̌. Iạ e mẹ̌kal᷊iomaneng, ”O Ruata, pẹ̌tahěndungko si siạ ual᷊ingu hal᷊ẹ̌ ene lai, ringangu tal᷊ěntukong iạ tuhụewe kakěndagʼU e masaria.”

²³ Su tempo ene kinasiloku e lai kawe mal᷊awọ tau Yahudi seng nẹ̌kawing dingangu manga wawine wọu wansang Asdod, Amon dingangu Moab.

²⁴Sěmbahageang bọu manga anạ i sire e tawe nakaěnna werang Yahudi, kaiso kawe werang Asdod arau waweran tau raghị bal᷊ine e.

²⁵Takụ sal᷊ěntihokang dingangu takụ aneěng i sire e. Piạben takụ bẹ̌baheng dingangu takụ gambul᷊ang utạ e. Bọu ene takụ oroěng i sire e pẹ̌salu su arengu Ruata u i sire ringangu manga anạ i sire e seng tawe mẹ̌kawing kal᷊aukang lai.

²⁶ Angkuěngku, ”Kai wal᷊inewe lai rosa ini e nikoạ u Ratu i Salomo? Tawẹ apa ratu su dunia ini kụ limembong kasariane wọʼi sie. Duata e kụ kěndagʼi sie ringangu napakariadin sie naratu su kasěllahu Israel. Maningbe kerene i sie seng niologangu manga wawinen tau raghị apẹ̌kẹ̌koạ dosa.

²⁷Mamben dal᷊akisẹ̌ kakanoạ u! I kamene e wahani rumokạ Duata ringangu mẹ̌kawingu manga wawinen tau raghị!”

²⁸ I Yoyada e kai ahusu Imang Mawantugẹ̌ i Elyasib, arawe sěngkatau wọu anạ i Yoyada e nakoạ anạ i Sanbalat mirarating bọu soang Bet-Horon. Ual᷊ingu ene i Yoyada e takụ tokol᷊ang bọu Yerusalem.

²⁹Iạ e nẹ̌dosa, ”O Ruataku, pẹ̌tahěndungko kereapa taumata ene e mapakal᷊amuhụ u diabatang imang dingangu pẹ̌dariandi-Nu ringangu manga imang dingangu tau Lewi.”

³⁰Kerene takụ niwurěsi tau Israel bọu kal᷊awọu sạbarang kụ bědang tawe kinanarangeng. Takụ itantu kal᷊awọu atorange waugu manga imang dingangu tau Lewi, hakịu i sire sěngkatau-sěngkatau e piạ hal᷊ẹ̌ i sire hala.

³¹Takụ iatorẹ̌ lai tadeạu su tempo apan tinantu e, kalum putung baugu sasěmba tẹ̌tutungang e botonge sadiaěng dingangu kawanua e wotonge mẹ̌bawa sasěmba gěsing ěntana humotonge. Pěngěnsueěnge iạ mẹ̌kal᷊iomaneng, ”Duataku, tahěndungko kěbị ini e ringangu al᷊amatẹ̌ko iạ.”