Read Sangir NEHEMIA 2 Bible Online

NEHEMIA 2 - Sangir bible

NEHEMIA 2

¹Piạ su sěhěllo, ěpạ u wul᷊ang tuhụ e, kụ su wul᷊ang Nisan, piạ e Ratu i Artahsasta kạkaěnge, iạ e něnadiang anggorẹ̌ si sie ringangu gati mal᷊uẹ̌. Bědang tawe ikẹ̌kasilo iạ e mal᷊uẹ̌ su těngone kere su ěllo ene.

²Ual᷊ingu ene i sie e nakiwal᷊o, ”Unụe i kau e kinasilo kereng kasusane, sumbal᷊iau tawẹ sakị e? Nal᷊ahẹ u mang piạ u ikẹ̌kaghěnggangu.” Iạ e himěkosẹ̌,

³ kụ bọu e simimbang, ”Biahẹ̌ i Tuan Datu waugu sarang marěngụ-děngụ! Kereapa wue ěllang e tawe masusa, kereu soa tampạ u lěbing manga i upungu ěllang e kụ ini e kate manga ěnạ e samatang dingangu manga tukadu pasěllangenge seng naghagholang nikaěngu putung.”

⁴Datu e nakiwal᷊o, ”Kụ apa wue ilẹ̌ěnningu?” Su ral᷊ungu naung iạ e měkẹ̌kal᷊iomaneng su Ruata měngangawasa su sorga,

⁵wọu e iạ nẹ̌bera su ratu, ”Kereu i Tuang botonge ringangu mapulu rumaringihẹ̌ dorongu ěllang, dolohe ěllang e sarang ěntanang Yehuda e waugu měmangung kapia soa tampạu lěbing u manga i upungu ěllang.”

⁶Mase ratu kụ kụkaiang su rěduhu Wawụ Datu e rimaringihẹ̌ dorongku. I sie e nakiwal᷊o pira ěllo iạ e sarung matanạ paị sene ringangu angerẹ mẹ̌bal᷊ị, tangú takụ ihabarẹ̌ si sie tanggalẹ̌ kụ sen takụ nitantu e.

⁷Mase iạ e nẹ̌dorong suratẹ̌ baugu manga guběrnurẹ̌ su propinsing Efrat sěmběkam Bahẹ,[3] tadeạu i sire e mapakal᷊owọu raral᷊engku sarang Yehuda.

⁸Su l᷊iung ene, iạ e lai mẹ̌dorong suratẹ̌ baugʼi Asaf, měnanitị kěhung kararatuang, tadeạu i sie měnadiang kalu waugu tukadu pasěllangengu těndạ su rěduhu Wal᷊em MAWU, dingangu waugu meselu soa ore lai wal᷊e kụ sarung pẹ̌tanakengku. Datu e měnẹ̌nukụ kěbị dorongku ene, ual᷊ingu Ruata e nẹ̌tul᷊ungu iạ.

⁹Sěndinganengu manga pěrwira pirang katau ringangu sordado piạ kawal᷊one, kụ ual᷊ingu laoron datu e tụtaking si siạ, kụ nẹ̌buạ e iạ sarang Efrat sěmběkaʼm Bahẹ. Sene suratu ratu ene takụ nionggọ su manga guběrnurẹ̌.

¹⁰Kaiso piạ e i Sanbalat, tau Bet-Horon, dingangu Tobia, sěngkatau mapapangkatẹ̌ bọu Amon, nakaringihẹ̌ u iạ diměnta waugu pandungangu tau Israel, i sire kai tawẹ karal᷊uase.

¹¹Iạ e nahumpạ su Yerusalem, mase něngirul᷊e těllu ěllo.

¹²Karěngụu ene iạ e tawe něhabarẹ̌ si sai-sai batụu Ruata e něngonggọu sipirang si siạ baugu měmangung kapia soang Yerusalem. Sěngkariọěllone reng bědang hěbi e iạ nẹ̌bangung bọu e němaringang manga hapị pirang katau e nakoạ sarang likudu soa. Su l᷊iung kalide takụ sẹ̌sakenang, i kami e tawe nẹ̌bawa binatang sasakeěng bal᷊ine.

¹³Ěllo e wědang marěndung, piạ i kami e něněntangu soa limiu Tukadu Pasěllangengu Wal᷊ane su sěmběkaʼm bahẹ. I kami e nẹ̌timona sarang sěmběkan timuhẹ̌, sarang Tukadu Pasěllangengu Onasẹ̌, lumiu Simbul᷊u Akẹ u Nagạ. Su ral᷊ungu raral᷊eng ene, iạ e měmarikẹ̌sa apaʼm meselu soa naghagholange ringangu takụ lai kinasilo manga tukadu pasěllangeng kụ seng nasueng kaěnge su putung.

¹⁴Mase wọu wahageang sěmběkan daki wọu soa e i kami apidu sarang sěmběkan sawěnahẹ̌, sarang Tukadu Pasěllangeng u Akẹ Mẹ̌gẹ̌giasẹ̌ dingangu Liwuạ u Ratu. Arawe sene tawẹ apa tampạ u raral᷊engang kalide kụ takụ sakenang ene e, ual᷊ingu tumanịu mal᷊awọ lěmbeng golang.

¹⁵Kụ i kami e rimẹ̌sung sarang Bal᷊ang Kidron dingangu něnurusẹ̌ raral᷊eng su hěbi ene, apidu němarikẹ̌sa meselu soa. Bọu ene i kami e nělenga kụ nẹ̌sul᷊e sarang soa limiu Tukadu Pasěllangengu Wal᷊ane.

¹⁶Tawẹu sarang sěngkatau e wọu apan těmbonangu kawanua kụ masingkạ u sarang apa iạ rumal᷊eng, dingangu iạ e kai kapẹ̌ngẹ̌ngol᷊ange apa. U sarang tempo ene iạ e wědang tawe nẹ̌berang manga apa su taumata apang sěngkawanuang i kami, baebe su manga imang arau waẹbe su apan těmbonange, arau suapan sawohị dingangu walạewe měnsang i sai kụ sarung sěngkapěmangung soan Yerusalem.

¹⁷Arawe wọu ene iạ e nẹ̌bera si sire, ”Kakěllạe kakakoạ i kitẹ e kụ masunsara ini! Yerusalem nalěmbe kate manga ěnạ e ringangu manga tukadu pasěllangenge nasueng kaěnge su putung. Bọete i kitẹ e měmangung kapia manga meselu soang Yerusalem tadeạu i kitẹ e semben tawe lai hinakaneng.”

¹⁸Bọu e takụ iwěke si sire kereapa Mawu Ruata e mẹ̌tul᷊ung u iạ dingangu apan nạung seng piněhengetangu ratu e si siạ. I sire simimbang, ”Bọete i kitẹ e měnětạ měmangung!” Bọu e nẹ̌dariahị e i sire e mědeạu měnětạ měmunara.

¹⁹Piạ e ol᷊ang i kami ene kinasingkateng i Sanbalat, Tobia ringang i Gesyem, sěngkatau tau Arabẹ̌, i sire mạhul᷊ěge ringangu mẹ̌bẹ̌baheaung kami. Angkuěng i sire e, ”Kai apạ e sarung koateng i kamene? Mapulu i kamene mẹ̌bawal᷊ětohẹ̌ su těngon datu tangú?”

²⁰Iạ simimbang, ”Duata měngangawasa su sorga e sarung mapakariading hal᷊ẹ̌ i kami e piạ lětạ e. I kami e kai manga ěllangʼE ringangu i kami e sarung měnětạ měmangung. Kaiso i kamene e tawẹ apa wahageange arau tataghuaneng i kamene apa su Yerusalem. Saral᷊aing kamagengu taumata e mahumbisarang Yerusalem, arengu e tawe sasěbakeng.”