Read Sangir NEHEMIA 4 Bible Online

NEHEMIA 4 - Sangir bible

NEHEMIA 4

¹Piạ i Sanbalat nakaringihẹ̌ u i kami tau Yahudi kapěngẹ̌ngul᷊ị e meselu soa, i sie mambeng limangehẹ̌ marasai kụ něnětạ e nẹ̌baheau si kami.

²Su těngong manga hapị e ringangu sordadon Samaria, i sie nẹ̌bera, ”Apa nạung kẹ̌koatengu tau Yahudi orasẹ̌ ini, kạěngkěhang bue apang kụ mamben tawe makakoạ apa-apa ene? Apa měnsang i sire mapulu měmangung kapia soa ini? Su naung i sire e hal᷊ẹ̌ ene e wotongewe masue su ral᷊ungu sěhěllo, kụ kětạeng dingangu měněmba binatang? Apa niěndukangu onasẹ̌ e seng nahěngisẹ̌ ene wotonge koateng i sire manga watuʼm meselẹ̌ e tangu?”

³Mase i Tobia kụ dụdarisị su sěndihange mal᷊aing nẹ̌bera, ”Kakěllạ e meselẹ̌ kụ nipětị i sire! Asung kěhu e mal᷊aing botonge makahaka!”

⁴Tangú nẹ̌kal᷊iomanengke iạ, ”O Ruata, daringihẹ̌ko kereapa i kami e nihinakaneng! Ěnsạ e lahinakang ene su wowom pusigʼi sire hala e. Balạekere kal᷊awọu tataghuaneng i sire e nipul᷊aho, ringangu i sire hala e niwawa kere tinaweng sarang banuan tau raghị.

⁵Kumbahang mangampung karal᷊akisʼi sire e ringangu kumbahang miwul᷊en dosan sire, watụ u i sire e seng něhinakang si kami kụ kapẹ̌mangunge ini e.”

⁶Těntal᷊ang ene i kami e tiniạ měngul᷊ị meselẹ̌ ene, ringangu tawẹ kararěngụ e wọu ene kal᷊awọu meselẹ̌ ene masueng ul᷊ị e sarang dangẹ e maloara, batụu kawanua e maghaghising měmpěhal᷊ẹ̌.

⁷Piạ e i Sanbalat, i Tobia ringangu i sire wọu Amon dingangu Asdod ore lai tau Arabẹ̌ nakaringihẹ̌ u pěngangul᷊ị meselu Yerusalem ene e mangkeng kakạdal᷊enge ringangu uade manga lohange su meselẹ̌ e seng nanětạ nihěping, i sire e mambeng nẹ̌bawal᷊uang.

⁸I sire e sěngkanaung měnekẹ Yerusalem baugu mapakariading pẹ̌tatongkarasẹ̌.

⁹Ual᷊ingu ene i kami e mẹ̌kal᷊iomaneng su Ruatang kami ringangu mělukadẹ̌ soa ene ěllo ringangu hěbi.

¹⁰Arawe tau Yehuda e něnětạ e nẹ̌kantarị u lagung dal᷊umpasiang ini: ”Katoghasʼi kitẹ e nasue waugu ipěhengkẹ lurang, arawe onasẹ̌ e wědang lawọ niěndukange. Pěndangeng tawe makaumal᷊ẹ̌ i kitẹ e měhal᷊ẹ̌ kere ini, měmangung meselu soa ini.”

¹¹Těntal᷊ang ene sědụ i kami e mẹ̌kẹ̌karaki baugu měnekẹ si kami sěngkělěndị e, mase měmate si kami e sarang hal᷊ẹ̌ i kami maědo.

¹²Arawe tau Yahudi kụ mạtanạ su rěduhʼi sire e, mẹ̌kẹ̌kakuwal᷊ị duměnta su anung kami waugu měhabaru karakin dokạ[7] ene.

¹³Ual᷊ingu ene iạ e mapẹ̌papahiạu peda, wěngko, ringangu papitị su kawanua, mase takụ pělokang i sire e tuhụ ghal᷊ipohon sěmbaụ-sěmbaụ e su l᷊ikudu meselẹ̌, suapan tampạ kụ bědang tawe nạsueng koạ e.

¹⁴Piạ e takụ kinasilo u kawanua e mạtakụ, iạ nẹ̌bera si sire ringangu su manga těmbonange, ore lai apam pangahạ e, ”Abe katakụ u rokạ! Pẹ̌tahěndungko su Mawu e matoghasẹ̌ dingangu mahuagatẹ̌, mase pẹ̌tawakal᷊iko waugu manga anạ u sěngkataunu, manga anạ, kawing dingangu wal᷊enu!”

¹⁵Manga sědụ i kami e nakaringihẹ̌ u karakin sire e seng kinasingkateng i kami. Tangú nakahěngangke i sire u Ruata e seng nakawatal᷊ẹ̌ karakin sire ene. Bọu ene i kami kěbị něhal᷊ẹ̌ něngul᷊ị meselẹ̌ ene.

¹⁶Arawe něnětạ bọu ěllo ene kětạeng sěngkapahiakeng darua wọu taumataku e kụ mělẹ̌hal᷊ẹ̌, arawe sěngkapahiakeng darua lai wal᷊ine ute mẹ̌dẹ̌dal᷊ukadẹ̌ dingangu pakeangu pẹ̌seketang kụ aghide wěngko, kěllung dingangu papitị. Apan těmbonangu kawanua e mạmahansangbe mapia su kawanua

¹⁷kụ kapěngẹ̌ngul᷊ị e meselẹ̌ ene kapia. Apaʼm měmamasaěng manga kakoạ u bangunang e měmpẹ̌kẹ̌koạ hal᷊ẹ̌ i sire e lima sěmběka, arawe limạete sěmběka tangú pělẹ̌hěgọewe aghidẹ̌.

¹⁸Apaʼm basẹ̌ u watu e kapělẹ̌hal᷊ẹ̌ e ringangu pedan sire kạl᷊aehẹ su kal᷊uwaeng. Měnaniụ slompretẹ̌ tatialan silakạ e měngkai ene su sěndihangku.

¹⁹Mase iạ nẹ̌bera su kawanua, apan těmbonange ringangu apaʼm měngangahạ e, ”Hal᷊ẹ̌ ini e seng nakeke sarang tampạ mararau, hakịu i kitẹ e nahiạu welede kanandung meselẹ̌ ini, sěngkatau-sěngkatau e marau wọu wal᷊ine.

²⁰Kụ kereu i kamene makaringihẹ̌ tingihu slompretẹ̌, ute pakarol᷊ạ e pẹ̌tampung su rěduhi kami e sini. Duatang kitẹ e sarung mẹ̌sekẹ baugʼi kitẹ.”

²¹Kerene i kami e němunara něnětạ bọu kalonge sarang manga wituinge kinasilo su l᷊angị. Deng kapahiaken darua e wọu kawanua měngěngul᷊ị meselẹ̌ arawe wal᷊ine ute mẹ̌dẹ̌dariagạ dingangu wěngko su l᷊ima.

²²Karěngụu ene tangú kal᷊awọu mělahal᷊ẹ̌ dingangu taumatan sire e, takụ nioro pinẹ̌tikị su Yerusalem. Ual᷊ingu kerene tangú su tempong hěbi i kami e nakariagạ soa ringangu naěllọ e ute němangungke meselẹ̌.

²³Iạ sẹ̌saku, manga hapịku, taumataku ringangu apang měndal᷊ukadẹ̌ku e hanesẹ̌ měluhe pakeangu lahal᷊ẹ̌, baewe ěllo arau hěbi. I kami e tiniạ kapẹ̌dẹ̌dariagạ e ringangu aghidẹ̌ su l᷊ima.[8]