Read Sangir NEHEMIA 5 Bible Online

NEHEMIA 5 - Sangir bible

NEHEMIA 5

¹Pira tempo nal᷊iu mal᷊awọ tau Yahudi, waẹbe manga esẹ arau lai wawine e, nanětạ e mạsusan taumatan sire wansa sěmbaụ e.

²Piạ u nẹ̌bera u, ”Anạku e mal᷊awọ. I kami e mẹ̌gausẹ̌ gandung baugu ipẹ̌biahẹ̌.”

³Piạbe lai nẹ̌bera u, ”Iạ e katewe nasihasa něnggadẹ u winal᷊aeng, baelu anggorẹ̌, dingangu wal᷊eng kami waugu ipěmělli gandung tadeạu kumbahangbe maten lunusẹ̌.”

⁴Kụ piạbe lai nẹ̌bera u, ”I kami e seng něngědang doitẹ̌ baugu ipěngipẹ̌ pajakẹ̌ kụ nitantun datu waugu rahami ringangu waelu anggorʼi kami.

⁵Bal᷊inewe lai i kami e tau Yahudi? Bal᷊inewe lai mẹ̌sul᷊ung anạ i kami e ringangu manga anạu tau Yahudi wal᷊ine e tangu? Maningbe kerene i kami e nasihasa mapakawalang manga anạ i kami e makoạ ěllang. Saral᷊aing manga anạ i kami wawine e kụ seng niwal᷊ụ nakoạ ěllang. I kami e tawe makapẹ̌koạ manga apa batụu rahami e ringangu waelu anggorʼi kami e seng nighadẹ i kami.”

⁶Nakaringihẹ̌ kakindoạ i sire ene, iạ e naawị pěduku e tạ sihinge,

⁷ kụ něngal᷊ạ e putusangu mẹ̌kakanoạ e. Mase takụ nitěguang apan těmbonange ringangu apaʼm pangahạ u kawanua e. Angkuěngku, ”I kamene měmpěnẹ̌nědạ manga anạ u sěngkataunu hala e!” Bọu e iạ nẹ̌koạ pẹ̌dal᷊ahintau lawọ baugu sěngkapẹ̌taghul᷊ima hal᷊ẹ̌ ene,

⁸ringangu nẹ̌bera, ”Kụ sěngapang katoghase i kitẹ e seng něnubusẹ̌ manga anạu sěmbaụ i kitẹ tau Yahudi kụ nasihasa nẹ̌bal᷊ụ u watangenge su taumata raghị. Arawe orasẹ̌ ini maal᷊ạ i kamene něnihasa si sire pěbẹ̌bal᷊ụ u wadang i sire e si kamene, sumbal᷊iau i kamene lai tau Yahudi!” Apan těmbonange ene tawe makasimbahẹ̌ sarang manga sěmpědi.

⁹Mase waweraku e lai, ”Kakanoạu ene e ral᷊akị! Tumuhụ hinone i kamene e mẹ̌biahẹ̌be ringangu pěndangu matakụ su Ruata. Ual᷊ingu kerene tangú sědụ i kitẹ e kụ tawẹ mawun sire ene e tawe nionggotang i kamene loahe waugu měhinakang si kitẹ.

¹⁰Iạ sẹ̌saku, manga anạu sěmbaụku ringangu manga hapịku seng napěngědangu roitẹ̌ dingangu gandung su kawanua. I kami e sen tawe sarung mẹ̌dorong kapia.

¹¹Kěnangko i kamene e lai měndědasẹ̌ manga utang u[9] kawanua si kamene ene, baewe roitẹ̌ arau gandung, arau lai anggorẹ̌ arau lanan zaitun. Sul᷊ẹ e pakarol᷊ạ dahami, waelu anggorẹ̌, baelu zaitun dingangu wal᷊en sire!”

¹²Manga pangahạ e ene simimbang, ”Sasasa ene e sarung tuhukang i kami. I kami e sarung mapakawal᷊ị u kěbị dingangu tawe sarung měnuntụ bawaehẹ̌ manga apa wọʼi sire!” Mase takụ kuiang manga imang dingangu takụ irolohẹ̌ manga pangahạ e kanini pẹ̌salu su těngong manga imang ene, u apang kụ seng niweran sire ene, kahěnga-hěngang sarung koateng i sire e.

¹³Bọu ene takụ lukaěng bawandang su kal᷊uwaengku,[10] mase takụ punaseng kụ kapẹ̌berane, ”Kere ini hinone Ruata e měmunasẹ̌ apan taumata kụ tawe mitụ kědone. Taumata ene sarung makoạ masigěsạ, bal᷊ẹ ringangu kal᷊awọu arětạ e sarung al᷊akeng u Ruata!” Kal᷊awọu komol᷊ang e mẹ̌berang, ”Aming!” bọu ene mẹ̌dalo MAWU. Tangú apang pangahạ e mitụewe riandin sire e.

¹⁴Iạ e seng nakoạ guběrnurẹ̌ u Yehuda mapul᷊o dua su taunge karěngụ e, kụ kai nanětạ bọu taung karuam pul᷊one sarang taung katěllum pul᷊o duane su parentan Datu i Artahsasta. Karěngụu tempo ene iạ dingangu manga anạ u sěngkatauku e tawe něngẹ̌ngal᷊ạ tatendengku e ual᷊ingu guběrnurẹ̌.

¹⁵Manga guběrnurẹ̌ kal᷊imonang iạ, seng nakoạ bawawaěng su kawanua watụ u i sire e měnuntụ 40 su kal᷊ěpane roitẹ̌ sal᷊aka sěhěllo[11] e waugu kumaěng dingangu měnginung anggorẹ̌. Saranglai manga sawohị i sire e mal᷊aing měmpěnědạ kawanua. Arawe iạ e madiri mẹ̌koạ kerene ual᷊ingu iạ e matakụ u Ruata.

¹⁶Kal᷊awọu kuatẹ̌ku e takụ iwěmbing su pěmamětị meselẹ̌ dingangu iạ e tawe makahombang ěntana sarang kadidị kere wawalare, maningbeng kěbị tumatimbangku e mal᷊aing mělẹ̌hal᷊ẹ̌ baugu pěmangunang ene.

¹⁷Mahasụ limam pul᷊o su kataune tau Yahudi ringangu apan těmbonang i sire tiasa takụ ipẹ̌sakeng kaěng su wal᷊eku, wědang tawe nạdekeng manga sake wọu apam bansa ipẹ̌lẹ̌lampung i kami e.

¹⁸Ěllo-ěllo pẹ̌sěmbaụ sapi takụ dẹ̌diahiang, domba matatawa ěnnungu waụ dingangu manụ natimu, ual᷊ingu ongkosẹ̌ku hala. Su l᷊iung ene apaʼm mapul᷊o ěllo e takụ ipakasukụ sadiang anggorẹ̌ku e. Manilaing kerene kai iạ e tawe měnanuntụ tatendengu diabatangu guběrnurẹ̌ e, ual᷊ingu iạ e masingkạ u wawawaěngu kawanua e seng tumanịu mawěhạ.

¹⁹Iạ mělẹ̌harapẹ̌ o Ruata, pẹ̌tahěndungko kal᷊awọu apa kụ sen takụ kinoạ baugu wansa ini kụ al᷊amatẹ e iạ.