Read Sangir NEHEMIA 6 Bible Online

NEHEMIA 6 - Sangir bible

NEHEMIA 6

¹Sanbalat, Tobia, Gesyem dingangu manga rokạ i kami e lai wal᷊ine e makạdingihẹ̌ u i kami e masueng ul᷊ị e meselẹ̌ e, dingangu kěbị lohange seng nihěping, manilaing su tempo ene i kami wědang tawe němẹ̌masẹ̌ u pěpal᷊u tukadẹ̌ e su manga tukadu pasěllangengu soa.

²Tangu i Sanbalat dingangu i Gesyem něndingọ u gaghausẹ̌ si siạ tadeạu ruměnta mẹ̌koạ pẹ̌sasombang dingang i sire su soa kadodọ sěmbaụ su Wal᷊ang Ono. Kaiso iạ e masingkạ u i sire mapulu mapakasilakạ u iạ.

³Ual᷊ingu ene, takụ dingotang sasimbange ini e si sire, ”Iạ e tawe makakarěnta watụ u kai kạkoạ e hal᷊ẹ̌ gẹ̌guwạ. Hal᷊ẹ̌ ene kai tawe masue kamagengu takụ itěntang baugu mẹ̌sombang i kamene e.”

⁴Sarang ěpạ u sul᷊e i sire něndingọ u gaghausẹ̌ mẹ̌sul᷊ung si siạ, kụ suapạeweng kerene tangu kerene lai takụ gělirang u sasimbange mẹ̌sul᷊ung.

⁵Su kal᷊ima sul᷊ene sěngkatau taumatan Sanbalat diměnta ringangu nẹ̌gěllịu suratẹ̌ kạbawuka[12]

⁶kụ lohone kere ini: ”I Gesyem mal᷊uasẹ̌ su piạ habarẹ̌ niusẹ̌ u su ghal᷊ipohong manga wansa mạngělikụ sini e, kụ mẹ̌bera u i kau ringangu kal᷊awọu tau Yahudi e mělẹ̌hingidu pěnggaghohaeng, kụ kai ual᷊ingu ene hakịu i kau e měngul᷊ị meselu soa. I sie nẹ̌bera u i kau e sarung měnduị u watangeng makoạ datung Yehuda,

⁷ringangu seng něněbọu manga nabi pira waugu měnduị i kau e su Yerusalem. Habarẹ̌ niusẹ̌ ene mamben nasahẹ u nahumpạ u anun datu. Ual᷊ingu ene, děntạ e kụ pẹ̌dal᷊ahintaukong hal᷊ẹ̌ ene.”

⁸Arawe iạ e měndingọu sasimbange ini, ”Patikụ apang niweranu e tawẹ lohone ringangu kai pěnganguwụu iněngen tal᷊imědonu e hala.”

⁹I sire e něnal᷊ukạ měmatakụ si kami tadeạu i kami e měngědong hal᷊ẹ̌ i kami ene. Iạ e nẹ̌kal᷊iomaneng, ”O Ruata, toghase wue iạ!”

¹⁰Su sěmpalang u tempo ene lai, iạ e tamai sarang bal᷊en Semaya anạ i Delaya ringangu pulung i Mehetabeel, ual᷊ingu i sie kai masahaghe ruměnta su anuku. Angkuěnge si siạ, ”Intạ e i kaduạ tamai mẹ̌kěmbuni su Wal᷊em MAWU. Kunsikang i kaduạ kěbị tukadẹ̌ e, u kai piạ taumata mapulu měmate si kau. Aramanung su sehěbi ini i kau e sarung pateěng.”

¹¹Kaiso iạ e sumimbang, ”Iạ ini e wal᷊inewe taumata kụ puluang tumal᷊angu watangeng. Kere sěngkatau taumata wiasa iạ e tawe wotonge makakasuẹ̌ su Wal᷊em MAWU e watụ u iạ e sarung mate. Tala, iạ e mạdiri!”

¹²Takụ nitimbang-nitimbang hal᷊ẹ̌ ene, nakaěnnạ e iạ e paparingang i Semaya ene e wal᷊inewe wọu anum Duata, kaiso kawe wọʼi Tobia ringangu i Sanbalat. I sire e seng něnorokẹ̌ si Semaya waugu měhabaru nubuetẹ̌ ene e si siạ.

¹³Timonan sire e ute tadeạu iạ mạtakụ dingangu tumuhụ těgun sire hakịu měmpẹ̌koạ dosa. Ual᷊ingu kerene tangú i sire nakaěbạ loahe měndal᷊akị arengku hakịu iạ makoạ su wuang biwihu taumata.

¹⁴Iạ e mẹ̌kal᷊iomaneng, ”O Ruata, tahěndungeko apang nikoạ i Tobia rẹ̌duan Sanbalat ene. Hukungko i sire! Kerene lai nabi wawine arenge i Noaja ringangu manga nabi wal᷊ine kụ mapulu měmpěmatakụ si siạ.”

¹⁵Pangangul᷊ị meselẹ̌ e kimaěng tempo 52 su ěllone ringangu nasue su tanggalẹ̌ duam pul᷊o l᷊ima su wul᷊angu Elul.

¹⁶Piạ e manga rokạ i kami su tal᷊oarang manga wansa e su sěnaung tampạ ene mạngělikụ e nakaringihẹ̌ hal᷊ẹ̌ ene, i sire e matakụ u sen tawe kapěngumbalaěng, u kěbị taumata e masingkạ u hal᷊ẹ̌ ene e kinoạ ual᷊ingu tul᷊umangu Ruata.

¹⁷Těntal᷊ang ene e apang pangahạ u Yahudi e wědang lai mẹ̌kẹ̌koạ pẹ̌sasasuratẹ̌ dingang i Tobia.

¹⁸Mal᷊awọ tau Yahudi e nẹ̌dal᷊ahapị i Tobia, batụu i sie kai anạ mirarating si Sekhanya anạ i Arah. Kutẹu lai i Yohanan anạ i Tobia, nẹ̌kawing dingangu anạ i Mesulam bawine anạ i Berekhya.

¹⁹Manilaing i Tobia masau su sul᷊ene měmẹ̌mohẹ suratẹ̌ si siạ mědeạu měmatakụ si siạ, kaiso manga pangahạ u Yahudi ene měngkai mẹ̌sẹ̌sěbạu kal᷊awọu kapian Tobia e su těngoku. Su l᷊iung ene e kěbị apan takụ niwera e, nihabarʼi sire si sie.