Read Sangir NEHEMIA 8 Bible Online

NEHEMIA 8 - Sangir bible

NEHEMIA 8

¹Su wul᷊ang kapitune tau Israel seng něnatapẹ̌ su soan sire sěngkatau-sěngkatau. Su tanggalẹ̌ humotong bul᷊ang ene e i sire kěbị e nẹ̌tampung su Yerusalem, su rělahẹ̌ su těngon Tukadu Pasěllangengu Akẹ. I sire nẹ̌dorong tadeạu Bukẹ̌ u Toratẹ̌ e al᷊akeng u Imang i Esra, sěngkatau masasingkạ su ral᷊ungu Toratẹ̌ kụ nionggọ u MAWU su Israel wọʼi Musa.

²Mase i Esra nẹ̌bawa bukẹ̌ ene su těngong komol᷊angu manga esẹ, manga wawine, ringangu manga rariọ kụ seng matatěllang mědeạu makaěnna.

³Bọu ene, wọu mal᷊ukadẹ̌ sarang ěllo marangẹ, i Esra e mẹ̌basan Toratẹ̌ ene si sire. I sire kěbị e rumaringihẹ̌ mapia-pia.

⁴I Esra rimarisị su wowom mimbarẹ̌ kalu nikoạ baugu pandungangu pẹ̌kakomol᷊ẹ̌ ene. Su sěmběkane koanenge mạhundarisị i sire ini: i Matica, i Sema, i Anaya, i Uria, i Hilkia, ringangu i Maaseya; arawe su kaihine rụdarisị e: i Pedaya, i Misael, i Malkia, i Hasum, i Hasbadana, i Zakharia ringangu i Mesulam.

⁵Ěnsal᷊ị tampạ u rararisikang i Esra ene e limembong karangẹ e wọʼi sire ene, hakịu i sire kěbị e makasilo. Masahawụ i sie e něningkahẹ̌ bukẹ̌ ene, kụ i sire kěbị e rimarisị.

⁶I Esra e nẹ̌bera, ”Pẹ̌daloko MAWU, Ruata kụ masaria!” Kal᷊awọu kawanua e něhengkẹ lima marangẹ-dangẹ dingangu simimbangu, ”Amin, amin!” Bọu ene i sire e nẹ̌tumpěkuhẹ̌ něněmba Mawu Ruata.

⁷Bọu ene i sire nẹ̌pětị dingangu rimarisị su tampạ i sire sěmbaụ-sěmbaụ, těntal᷊ang pirang katau tau Lewi e něnarangkangu Toratẹ̌ ene e si sire. Tau Lewi ene ute kai: i Yesua, i Bani, i Serebya, i Yamin, i Akub, i Sabetai, i Hodia, i Maaseya, i Kelita, i Azarya, i Yozabad, i Hanan dingangu i Pelaya.

⁸I sire něnungkangu Titan Duata[14] ene sěmbahageang, sěmbahageang ore lai měnualagẹ̌ ene,[15] hakịu kawanua e makaěnna wawasaěng ene.

⁹Nakaringihẹ̌ pẹ̌bawasang Tita ene, kawanua e mamben nasusa, bọu e simangị. Tangú Guběrnurẹ̌ i Nehemia ringangu Imang i Esra masasingkạ u Tita ene e, ore lai tau Lewi kụ něnualagu Tita ene e, nẹ̌bera su patikụ kawanua e kerene, ”Ěllo ini kai ěllo naněntani waugu MAWU Ruatanu, kụ kumbahangbe masusa arau sumangị.

¹⁰Ini e kapul᷊ẹ e; kaěngko ringangu pěnginungko ringangu ral᷊uasẹ̌. Pěgěllịko sěnggạ bọu kaěng dingangu anggoru e si sire kụ mal᷊awọ kakawusange. Ěllo ini e ěllo tani waugu Mawung kitẹ, kụ kumbahangbe masusa. Karal᷊uasẹ̌ kụ nionggọu MAWU e si kamene e sarung mapakatoghasʼi kamene e.”

¹¹Kerene lai tau Lewi e mapakal᷊enehu kawanua ringangu mẹ̌bera mẹ̌kẹ̌kakuwal᷊ị, ”Kumbahang masusa naungu e su ěllo kụ tani e ini.”

¹²Tangú napul᷊ẹ e kal᷊awọu kawanua waugu kumaěng dingangu měnginung mase mẹ̌papahiạu kaěng su taumata wal᷊ine e. I sire nahul᷊uasẹ̌ ual᷊ingu seng nakaěnna mangal᷊ene wawasaěng kụ kinaringihʼi sire ene e.

¹³Sěngkarịěllone nẹ̌tampungke kěbị těmbonangu ghal᷊ipoho, manga imang dingangu tau Lewi e, wọu e nakoạ sarang anung Esra waugu měngěndung těntirong Toratu MAWU e.

¹⁴I sire e nakaěbạ u su ral᷊ungu Toratẹ̌ kụ nionggọ u MAWU e wọʼi Musa, MAWU e něngoro tau Israel katanạ su ral᷊ungu manga selo pěněntal᷊ang karěngụu sal᷊imbangu Selon Daukalu.

¹⁵ Ual᷊ingu ene su kasěllahu Yerusalem su manga soa ringangu manga weọ e, i sire němohangu parenta ini,[16] ”Dakọ e sarang bawul᷊urange ringangu pěngal᷊ạko manga lelangu kalun cěmara, zaitun, kalung lana, palma ringangu manga kakaluang bal᷊ine waugu kakoạ selo tuhụ atorange su ral᷊ungu Bukẹ̌ u Toratẹ̌.”

¹⁶Mase rimal᷊engke kawanua e něngal᷊ạ manga lelange ene. I sire kěbị e němpẹ̌koạ manga selo su manga atụ matene su wowom bal᷊en sire, su rělahu wal᷊e, su rělahu Wal᷊em MAWU su těngone, su ěntana mal᷊oahẹ̌ maranin Tukadu Pasěllangeng u Akẹ dingangu su ěntana mal᷊oahẹ̌ su rěduhu Tukadu Pasěllangeng i Efraim.

¹⁷Kal᷊awọu kawanua kụ seng napul᷊ẹ bọu pěmamembangeng ene e nẹ̌koạ manga selo ene; wọu e nẹ̌tanạ sene. Seng ini e kahumotongange hal᷊ẹ̌ ene kinoạ dokeng tempong Yosua anạ i Nun, tangu kěbị e mal᷊uasẹ̌ dingangu mal᷊unsemahẹ̌.

¹⁸Pitu ěllo karěngụ e i sire e nẹ̌sal᷊iwang. Apang ěllo apaʼm bahageangu bukẹ̌ u Toratu Mawu e niwasang Esra. Su ěllo kaual᷊une nikoạ komol᷊angu pangangunsị, natuhụewe su atorangu Toratẹ̌ e.