Read Sangir NEHEMIA 9 Bible Online

NEHEMIA 9 - Sangir bible

NEHEMIA 9

¹Su tanggalẹ̌ duam pul᷊o ěpạ bul᷊ang ene lai, kawanuang Israel nẹ̌tampung. I sire němpẹ̌puhědang baugu něnodẹu pẹ̌sasěsilu rosan sire. I sire nẹ̌těngkahae wọu kal᷊awọu taumata raghị. Nakoạ kere tatialang naung masusa, ute i sire nẹ̌pakẹu pakeang i sire karong dingangu němpěnawuhu ěntana su těmbọ i sire. Bọu ene i sire rimarisị dingangu něngakung kal᷊awọu rosan sire dingangu rosang manga i upung i sire.

³Karěngụu manga těllung kaorasẹ̌, bukẹ̌ u Toratu MAWU, Ruatan sire, niwasa si sire ringangu karěngụu těllung kaorasẹ̌ tuhụ e i sire něngakung kal᷊awọu rosan sire e. Bọu ene i sire e nẹ̌tumpěkuhẹ̌ dingangu něněmba MAWU, Ruatan sire.

⁴Sene piạ mimbarẹ̌ baugu tau Lewi kụ su wowone e rimarisị e i Yesua, i Bani, i Kadmiel, i Sebanya, i Buni, i Serebya, i Bani ringangu i Kenani. I sire němpẹ̌kal᷊iomaneng su MAWU Ruatan sire.

⁵Pẹ̌kakal᷊iomaneng su ěllo ene nitětạu tau Lewi tuhụ e ini: I Yesua, i Kadmiel, i Bani, i Hasabneya, i Serebya, i Hodia, i Sebanya ringangu i Petahya. I sire e nẹ̌bera, ”Darisị e ringangu pẹ̌daloko MAWU Ruatang kitẹ! Pẹ̌gěllikon daralo si Sie sarang marěngụ-děngụ! Karaloko arengʼE kụ napenẹ u kawawantugẹ̌, arenge masěllahẹ̌, namal᷊iu patikụ daralo!”

⁶Bọu e kawanuang Israel nẹ̌kal᷊iomaneng kere ini, ”Seng i Kau e MAWU, i Kau e mamben těnga-těngadẹ̌ Mang Sěmbaụ; niriadi-Nu e wituing dingangu patikụ sarul᷊uang; kerene lai laudẹ̌ dingangu dunia ore lai kal᷊awọu ral᷊ohone, mase nionggotangʼU e pẹ̌bawiahẹ̌ dingangu nịlahikingʼU. Baugi Kau e kal᷊awọu kawasa su l᷊angị mẹ̌tumpěkuhẹ̌ měněmba; i sire e mẹ̌samal᷊ẹ si Kau ringangu mẹ̌taingu wuku.

⁷ Seng i Kau e Ruata, MAWU kụ Mang Sěmbaụ. Nipile-Nu e i Abram bọu tal᷊oarang manga wansane. Ur su Babel seng nitěntange, ual᷊ingu i Kau e hala měngangahạ e. Mase nionggotangʼU arenge wuhu si sie: Abraham, kai ene arenge rokeʼm bọu tempo ene.

⁸ Kinaěbakengu e i sie satia si Kau ringangu mararingihẹ̌. Mase nikoạʼU e pẹ̌dariandi matoghasẹ̌ dingang i sie. Ěntanang Kanaan, Het dingangu Amori, ěntanang Feris, Yebus ringangu Girgasi, kěbị ene e sarung ionggọʼU e si sie; kere tampạ u pẹ̌tatanakengu kal᷊awọu hitene. Bọu ene nipakasěhụʼU e riandi ene si sie, batụu i Kau adilẹ̌ dingangu satia.

⁹ Kinasilo-Nu e sunsarang i upung i kami su tempo nal᷊iu; kinaringihẹ̌ kakiạ e su Misirẹ̌ dingangu su L᷊audu Teberau.

¹⁰ Baugu ratung Misirẹ̌ kinoạʼU e hal᷊ẹ̌ kụ tawẹ sihinge marihutu, kerene lai waugu sawohị ore lai kawanuane, u i Kau e masingkạ kereapa umatʼU nipakasakị i sire. Mase timelengke arengʼU e sarang ěllo ini.

¹¹ Baugu mẹ̌koạ dal᷊eng gunang umatʼU e, laudẹ̌ e niwẹ̌ka-Nu; niapal᷊iunu e i sire e wọu wěntan laudẹ̌ e kụ tawe naholo. Měnanahusune e něngkawul᷊usẹ̌ su ral᷊ungu akẹ maral᷊ung, mẹ̌sul᷊ungu watu nawul᷊usẹ̌ su l᷊audẹ̌ makatatakụ.

¹² I Kau e něngahạ i sire su tempong ěllo e ringangu winawa sěmbua. Kụ su tempong hěbi e ral᷊enge nitualagʼU ringangu rihi piạ putunge.

¹³ Bọu langị i Kau limintụ sarang bowom Bul᷊udu Sinai, mase i Kau nẹ̌bisara ringangu umatʼU e hala. NionggotangʼU e toratẹ̌, atorange ringangu tita kụ adilẹ̌, kahěngang, dingangu piạ kěhase.

¹⁴Ěllon Sabatẹ̌ kụ susi e hinong bantugang i sire, kụ limiung Musa e toratʼU e nionggọʼU.

¹⁵ Piạ i sire nahutung dingangu kinakawusangu kaěng, kai borotẹ̌ bọu langị niapakatěntungʼU. Kụ wọu watu masimạ, matoghasẹ̌ dingangu makětị e niapaelehʼU akẹ maihạ laundang dou e. Nioro-Nu e i sire nipẹ̌tanạ su wanua kụ niriandi-Nu e si sie piạ salune.

¹⁶ Kaiso i upung i kami e maobotẹ̌ dingangu naunge makul᷊i; kal᷊awọu manga tita-Nu e tawe tatuhukang i sire e.

¹⁷ I sire e tawẹ satiane, kal᷊awọu kapia-Nu e kẹ̌kawul᷊enang, kụ kěbị kakanoạʼU makạdal᷊inaụ e mailang bọu naung i sire e. I sire němpěmile sěngkatau tuměllange baugu pẹ̌bawa si sire sarang Misirẹ̌, pẹ̌sul᷊e kapia makoạ ěllang. Arawe i Kau Ruata kụ puluang mẹ̌gěllịu ampung, masabarẹ̌, mal᷊ondo, ringangu napenẹu kakěndagẹ̌. KakěndagʼU e mamben tawẹ sihinge; i Kau e tawe měnaněntang i sire.

¹⁸ I sire e nẹ̌koạ mahan duata e kere awẹ u sapi. Mase i sire nẹ̌bera, ’Seng ini e Ruatanu, kụ nẹ̌bawa si kamene wọu Misirẹ̌ e wọu pẹ̌tatahuěllang.’ O Ruata, i Kau sẹ̌sanu e lẹ̌hinakaneng i sire e!

¹⁹ Kaiso su wanua l᷊inggi ene i sire tawe nitěntangʼU, ual᷊ingu i Kau e napenẹu kakěndagẹ̌. Dihi winawa ringangu dihi putung tawe nisawụu kapia, tatěbọ dal᷊eng i sire e su tempong ěllo ringangu su tempong hěbi e.

²⁰Dingangu kawasa-Nu mapia e, nitěntiroěngu i sire. I sire kụkaěng manna ringangu mạnginung akẹ matimu e.

²¹Karěngụu ěpạ u pul᷊o su taunge su wanua l᷊inggi, nipakasukụʼU e kěbị gẹ̌gausang i sire. Pakeang i sire tawe maghaghehe, laedʼi sire e tawe matatědụ arau sumasahěnụ,

²² I Kau e něngonggọu kal᷊auntu si sire namatạ kararatuang mal᷊awọ dingangu wansa mal᷊awọ su pẹ̌saraěngu ěntanan sire e. Hesybon banuan Datu i Sihon, nikaianeng i sire; Basan banuan Datu i Og, pinẹ̌tanakeng i sire.

²³ Pinakariadinu hiten sire e kere wituing su langị e kal᷊awọe. Nionggotangu e i sire ěntana mědeạu pẹ̌tanakeng i sire ěntana kụ seng niriandi-Nu su manga i upunge.

²⁴ Hiten sire e němatạ ěntanang Kanaan; tumanạ e paị sene e nipẹ̌samal᷊ẹʼU. UmatʼU e nionggotangʼU e kawasa pẹ̌batụ kapulune baugu manga wansang Kanaan ringangu manga ratune.

²⁵ UmatʼU e němul᷊aho manga těndạ u wal᷊oarị, ěntana kụ matawa ringangu wal᷊e kụ napenẹ u kakakalạ. Manga sumu e ringangu simbul᷊u akẹ e nipul᷊ahon sire, waelu anggorẹ̌, kalun zaitun dingangu manga wua-bua wal᷊ine e. I sire e matatawa ual᷊ingu kụkaěng tuhụ kapulun naung i sire e. Kal᷊awọu gaghěllịʼU mapia e kateěngang i sire.

²⁶ Arawe umatʼU e nẹ̌pahuwungkadẹ̌ dingangu tawe tumuhụ si Kau, tawẹ pandunge su toratẹ̌ dingangu manga tiaha-Nu měmate manga nabi kụ mẹ̌gěllịu ingate si sire, ringangu apang něngoro si sire e pẹ̌sul᷊e su anu-Nu, Ruatane. O Mawu, walạewe apang i Kau e hinakaneng i sire e lai,

²⁷tangú nisarakangʼU e i sire su sědụ i sire kụ dingangu katatingkaị e nẹ̌kawasa ringangu něnědạ si sire. Kaiso su ral᷊ungu kasasigěsạ kụ měmẹ̌hạ e, i sire kụkahiorọ si Kau makịtul᷊ung. Bọu sorga i Kau e rụdaringihẹ̌; dingangu kakěndagʼU e masaria i Kau e nẹ̌gěllịu sasimbange. Niringọ u pangahạ e ringangu mawawahanine kụ pinělěsọ si sire wọu rokạ.

²⁸Kaiso piạ e wanuane nal᷊enehe kapia, i sire saụewe lighạ němpẹ̌dosa. Tangú nisarakangʼU e i sire kapia su sekẹ kụ něnědạ e. Kaiso, piạ i sire nakahěngangke ringangu napenẹ u pẹ̌sasasěsilẹ̌ e, i sire e kimahiorọ si Kau mẹ̌dorong ipakasal᷊amatẹ̌. Tangú wọu sorga i Kau rimaringihẹ̌, dingangu nitul᷊ungu e masaung kuwal᷊ị e, batụu i Kau e tụtal᷊ěntụ i sire e ringangu tumanịu matal᷊ěntụ.

²⁹ Nitumbal᷊ungangʼU e i sire tadeạu kal᷊awọu těntiro-Nu e tuhukang, kaiso i sire e něnuhudu toratʼU e ringangu kararangẹ u naung. Sumbal᷊iau, kamagengu toratʼU e koateng, nal᷊ahẹ u sarang masukụ pẹ̌bawiahẹ̌. I sire e makětị těmbọ e ringangu naung i sire e makakul᷊i, tawe rumaringihẹ̌, tawe tumatuhụ.

³⁰ Taun-taung i Kau e masabarẹ̌ mapẹ̌tahěndungu ene; lumiung manga nabi e, Rohkẹ̌ʼU e něhengetang si sire. Arawe umatʼU e ene něněnsing tul᷊in sire, mase nisarakangʼU su manga wansa suapan banua.

³¹Kaiso ual᷊ingu kakěndagʼU masaria tạ sihinge, tawe nitěntangʼU arau tawe nipakagholọʼU e i sire. Těngadẹ̌ bue, i Kau e Ruata tạu kapanihingange; masaria kakěndagʼU, napenẹ u tatal᷊ěntụ!

³² O Ruata, Ruatang kami e matoghasẹ̌! Duata e masěllahẹ̌ ore lai mahuagatẹ̌! NiumpaedʼU e kal᷊awọu pẹ̌dariandi e ringangu kasasatia; manga riandi-Nu niapakasěhụʼU ringangu kinoạʼU. Dongkeng tempong manga ratung Asyur kụ měnẹ̌nědạ si kami e sarang orasẹ̌ ini, lawọ sigěsạ kẹ̌kahombangeng i kami. Mararatung kami e, imang dingangu nabi ringangu apam matatěbone, kerene lai manga i upung dingangu kawanua, seng nasigěsạ kěbị. Abe kiwul᷊eng kal᷊awọu sigěsạ ene! Kumbahang ipakailang u bọu tatahěndungangʼU!

³³KakanoạʼU e adilẹ̌; nihukungʼU e i kami apaʼm baradosa; i Kau těbe satia manilaing i kami e napenẹ u karal᷊akisẹ̌.

³⁴I upung i kami, ratu, imang dingangu apaʼm matatěbone, lụlampa toratʼU ringangu tawẹ agise. Kal᷊awọu tita ringangu těntiro ighẹ̌gěllị tawe laarẹ̌gaěnge, tawe lai rararingihang.

³⁵NionggọʼU e su manga ratu kụ mẹ̌pẹ̌parenta umatʼU, piạ i sire e mạtanạ su ěntana mal᷊oahẹ̌ dingangu matawa gaghěllịʼU. Kaiso i sire e tawe měněntangu pẹ̌bawiahẹ̌ kụ dal᷊akisẹ̌, madiri mẹ̌tahamawu si Kau ore lai mẹ̌kal᷊iomaneng.

³⁶Tangú orasẹ̌ ini e i kami nakoạ ěllang su ěntana kụ nionggọʼU makoạ pusakạ. Ěntana ini e matawa, napenẹ u ghěsing ěntana, kụ hinong ikateěng i kami e.

³⁷Kal᷊awọu ěbạ u ěntana ini e hinong isarakang su manga ratuʼm banua. Manga měngangawasa e nihengkẹʼU waugu umatʼU, kere hukumangu rosang kami e si Kau. I sire nẹ̌parenta nẹ̌batụ kapulun naungʼi sire waugʼi kami e ringangu waugu binatang kụ tẹ̌taghuaneng i kami. Batụu ene i kami tumanịu masunsara, nasěsẹ dingangu masusa su naung!”

³⁸Iwala su karariadi ene, i kami, kawanuang Israel nẹ̌koạ pẹ̌dariandi matoghasẹ̌ dingangu kạbawohẹ, kụ piạ capẹ̌ u manga těmbonang i kami, tau Lewi ringangu sěngkatau imang i kami.