Read Sangir ESTER 3 Bible Online

ESTER 3 - Sangir bible

ESTER 3

¹Tawẹ kararěngụ e wọu ene Datu i Ahasyweros něhengkẹ u sěngkatau arenge i Haman nakoạ měntěri kahumotongange. I Haman e kai ahusi Hamědata hěnton Agag.[4]

²Datu e nẹ̌parenta su kěbị sawohị e tadeạu pěngadatẹ̌ si Haman dingangu pẹ̌samal᷊ẹ su těngone. Kěbị e timuhụ parenta ene, tabeạu katewe i Mordekhai.

³Apan sawohị bal᷊ine su istana e nakiwal᷊o si sie unụ e i sie limewang parentan datu,

⁴ringangu apang kal᷊aěllo i sire e měnẹ̌nahěsẹ si sie tadeạu měngkate tuhuke, kaiso i sie tawe rumaringihẹ̌. Angkuěnge, ”Iạ kai tau Yahudi; iạ mạdiri mẹ̌suba su taumata.” Bọu e i sire něhabarẹ̌ hal᷊ẹ̌ ene si Haman, batụu i sire e kai mapulu makakasingkạ u kai kerea kakanoạ e si Mordekhai.

⁵I Haman nẹ̌bawal᷊uang marihutu piạ e nakakasingkạ u i Mordekhai kawe mạdiri mẹ̌suba si sie.

⁶Kụ piạ e kinasingkateng u i Mordekhai kawe tau Yahudi, i sie němutusu waugu měhukung si Mordekhai ringangu wal᷊inewe tumbạu i sie samatang, kaiso sarung ipakawinasane lai patikụ tau Yahudi su kararatuangu Persia.

⁷Su taung kapul᷊o duane pẹ̌paparentan Datu i Ahasyweros, su wul᷊ang humotong, kụ bul᷊ang u Nisan, i Haman něngoro piněnawụ lotẹ̌ kụ isẹ̌sěbạ ”purim” baugu makakasingkạ u ěllo ringangu wul᷊ang sude mẹ̌tatarang baugu mẹ̌koạ kapulune ral᷊akisẹ̌ ene. Tangú nipoěnge tanggalẹ̌ mapul᷊o těllu su wul᷊ang kapul᷊o duane, kụ kai wul᷊ang u Adar.

⁸Mase nẹ̌berạ e i Haman su ratu, ”Tuang, piạ bansa sěmbaụ kụ makạdal᷊inaụ kụ nakeke su apam propinsing kararatuang ini e. Tundun sire e mẹ̌dẹ̌darol᷊e marau wọu tundu manga wansa wal᷊ine. I sire tawe tumatuhụ manga tiahang kararatuang. Kụ kapiaěnge i Tuan Datu e kumbahang mapakawalan sire e mẹ̌batụ kapulun sire hala e.

⁹Kereu i Tuan Datu tawẹ kạbaratange, ute mapiawe pěněbangu suratu parenta baugu pakawinasan sire. Dingangu kereu i Tuan Datu e měnarimạ u těguku, ute ěllangu e sadia mapakasuẹ̌ u sal᷊aka su wowong 340.000 su kilone sarang dal᷊ungu kasẹ̌ i Tuan Datu.”

¹⁰Nakaringihẹ̌ ene, datu e něnawụ sinsing bọu tal᷊imědone ipẹ̌pakẹ e waugu pěnyẹ̌nyapẹ̌ apam bohang tutune, mase nighěllị e si Haman, sědụu tau Yahudi matědụ ene.

¹¹Angkuěngu ratu si sie, ”Bansa ene ringangu lai roite takụ isarakang si kau. Pěkoạ e apang kụ ikasilonu e mapia si sire.”

¹²Tangú su tanggalẹ̌ mapul᷊o těllu bul᷊ang humotong, i Haman nẹ̌kui apang měmamohẹ u ratu. I sire niorone piněmohẹ suratẹ̌ natuhụewe kere su laorone, mase suratẹ̌ ene nitungkange sarang kěbị bera ringangu nial᷊ing su kěbị bohẹ kụ ipẹ̌pakẹ su kararatuang ene. Suratẹ̌ ene niwohẹ ual᷊ingu arengu Ratu i Ahasyweros kụ nicapẹ̌ u sinsinge mase niringọ e lighạ su apang měngangawasa, guběrnurẹ̌ dingangu manga těmbonange su kěbị propinsi. Lohone ute parenta u su tanggalẹ̌ mapul᷊o těllu bul᷊ang u Adar, patikụ apan tau Yahudi, baẹbe maghurang arau lai mangudạ, baewe wawine arau lai manga rariọ, harusẹ̌ pateěng tawẹ ampunge, dingangu arětạ i sire e pul᷊ahoěng.

¹⁴Parenta ene e harusẹ̌ iwohang su apan propinsi tadeạu kěbị taumata e seng sadia su ěllo kụ seng nitantu ene.

¹⁵Apan darolohang e apidu němpẹ̌dal᷊eng němpěnondan suratẹ̌ ene sarang patikụ propinsing kararatuang. Ual᷊ingu rarolohu ratu e, parenta ene mal᷊aing niwohang su Susan, niupunangu soang Persia. Bọu ene ratu ringangi Haman kạpahungkaiange apidu kạpěnginunge anggorẹ̌, arawe soang Susan nẹ̌gěgahu habarẹ̌ ene.